Teutaronome 21:1-23
21 KAEKE ke moua ai e tagata kua mate he keli ke he motu kua foaki mai e Iehova hau a Atua kia koe ke eke māu, kua takaveli a ia ke he vao, ka e nakai iloa po ko hai ne keli a ia;
2 Ti o atu e tau patu hau, mo e tau fakafili hau, mo e fafati ai e lautolu e vaha mamao he mena ne ha i ai a ia kua keli mo e tau māga ne agaagai ai;
3 Ko e maga foki ne tata ke he mena ne ha i ai a ia kua keli, kia uta he tau patu he maga ia, taha punua povi fifine kua nakaila eke gahua, kua nakaila toho mena ke he akau hahamo;
4 Ti takitaki ai he tau patu he maga ia e punua povi fifine ke he pahua ne tafe mau ai e vai, nakai gahua ai ha tagata, nakai gana ai foki e tau saito, ti papaki ai e lautolu e ua he punua povi fifine ke he pahua;
5 Ti fakatata ai e tau ekepoa, ko e fanau a Levi; nukua fifili e Iehova hau a Atua a lautolu ke fekafekau kia ia, mo e fakamonuina atu ke he higoa a Iehova; ko e ha lautolu a tau kupu ni ke tonu ai e tau taufetoko oti mo e tau tā oti ni;
6 Ko e tau patu oti foki he maga ia ne tata age ke he mena ne tokai e tagata kua keli, to holoholo ai e lautolu ha lautolu a tau lima ki luga he punua povi fifine ne papaki ai hana ua ke he pahua;
7 Ti talahau ai e lautolu kua pehe age, nakai fakamaligi ai he tau lima ha mautolu e toto nai, ti nakai kitia ai foki ha mautolu a tau mata.
8 Iehova na e, kia fakamagalo mai e koe hau a motu ko Isaraela, ne laveaki mai ai e koe; ti aua neke tuku mai ai e toto he tagata nakai hala ke he hau a motu ko Isaraela. Ti magalo ai ni a lautolu he toto.
9 Ti tuku kehe ni ia koe e toto he tagata nakai hala, ka eke ai e koe e tau mena tonu ki mua a Iehova.
10 Ka fina atu a koe ke tau mo e tau tagata kua fai fi kia koe, ka tuku mai foki e Iehova hau a Atua a lautolu kia koe, ti uta e koe a lautolu mo tau tagata ne fofo he tau,
11 Ti kitia ai e koe ia lautolu ne fofo he tau e fifine tino mitaki, ti manako a koe ki ai ke uta e koe a ia ke eke mo hoana hāu;
12 Ti ta mai e koe a ia ke he hau a fale; ti hifi puga ai e ia hana ulu, mo e helehele hana tau mahina mata lima;
13 Kia aki foki e ia hana tapulu he tagata ne fofo he tau, mo e nofo a ia ke he hau a fale, ti tagi ai a ia ke he hana matua tane mo e hana matua fifine ke he mahina katoa, ka mole ia ti fina age a koe kia ia, ke eke ai a koe mo tane hana, ke eke foki a ia mo hoana hau.
14 Kaeke foki ke nakai fiafia a koe kia ia, ti toka atu e koe a ia ke fano he hana loto; ka e aua neke fakatau e koe a ia ke he tau tupe, ti aua neke eke e koe a ia mo tupa, nukua fakakelea e koe a ia.
15 Kaeke ke tokoua e hoana he taha tagata, kua fakaalofa a ia ke he taha, ka e fakavihia e ia taha, ti fanau ai e laua tokoua e tau tama tane, ko ia kua ofania mo ia kua vihiatia; kaeke foki kua fanau fakamua e tama hana kua vihiatia;
16 Ka hoko ke he aho ke tufatufa ai hana tau mena ke he hana tau tama tane, nakai maeke ke eke mo tama uluaki, e tama hana kua ofania, ke mua a ia ke he tama hana kua vihiatia ha ko e tama uluaki ni a ia;
17 Ka kia talahau ai e ia ko e tama uluaki, ko e tama ni hana kua vihiatia, ke uta kia ia ua e veveheaga he tau mena oti ha ha ia ia; ko e mataulu a ia he hana malolo; ti hana ni e tufaaga he uluaki.
18 Kaeke ke faliuliu to matauka e tama tane he taha tagata, nakai fanogonogo a ia ke he tau kupu he hana matua tane, po ke tau kupu he hana matua fifine, kua oti he akonaki atu ki ai, ka e nakai ni fanogonogo a ia kia laua.
19 Ti toto ai hana matua tane mo e hana matua fifine a ia, mo e takitaki e laua a ia ke he tau patu he hana maga, ke he gutuhala he hana maga;
20 Ti pehe age a laua ke he tau patu he hana maga, Ko e tama nai ha maua kua faliuliu to matauka a ia, nakai ni fanogonogo mai a ia ke he tau kupu ha maua; ko e tagata kai loto kai foki a ia, mo e inu a ia ke konahia.
21 Ti pini aki he tau tagata oti he hana maga a ia ke he tau maka ke mate a ia; ti tuku kehe ai e kelea ia koe; ti fanogonogo ai a Isaraela oti ni mo e matakutaku ai a lautolu.
22 Kaeke foki kua hala he tagata ke lata ke mate ai a ia, ka hoko kia ia e mate, kua fakatautau e koe a ia ke he akau;
23 Aua neke ahogia hana tino ke he akau, ka kia tanu ni a ia ke he aho ia; (ha kua ulāfia he Atua a lautolu oti kua fakatautau;) neke kelea ai hau a kelekele kua foaki mai e Iehova hau a Atua kia koe ke eke mo tufaaga māu.