Teutaronome 22:1-30
22 KA kitia e koe e povi he hau a matakainaga po ke mamoe hana kua hehe, aua neke haga kehe a koe ia ia; ka kia takitaki atu ai ke he hau a matakainaga.
2 Kaeke foki ke nakai fetataaki a mua mo e hau a matakainaga, po ke nakai iloa e koe a ia, ti takitaki e koe a ia ke he hau a fale, ti tokai ni kia koe ato kumi mai a ia he hau a matakainaga, ti liuaki atu ai e koe kia ia.
3 Ti eke pihia foki e koe ke he hana asini; ti eke pihia ke he hana tapulu; ti eke foki pihia ke he tau mena galo oti he hau a matakainaga, kua galo ni kia ia, ka e moua ai e koe; nakai maeke ke haga kehe a koe mo e tau mena ia.
4 Aua neke kitia e koe e asini he hau a matakainaga po ke povi hana kua veli ke he puhala mo e haga kehe ai; ka kia lagaaki a mua tokoua mo ia a ia.
5 Aua neke tapulu ai e fifine ke he tapulu he tane, ti aua neke tapulu ai e tane ke he tapulu he fifine; ha ko e mena fakalialia kia Iehova hau a Atua a lautolu oti ni kua eke e tau mena ia.
6 Kaeke ke ha i ai ki mua hau ke he puhala e fata manu, ke he akau po ke ha he kelekele, ne ha i ai e tau punua po ke tau fufua, ko e matua foki ne mohe ai ki luga hana tau punua, po ke hana tau fufua, aua neke uta ai e koe e matua fakalataha mo e hana tau punua.
7 Kia toka ni e koe e matua ke hola, ka e uta māu hana tau punua; kia mataki ai a koe, mo e loga ai hau a tau aho.
8 Ka ta ai e koe e fale fou, ti eke e koe e pa ke puipui aki takai hau a tua fale ki luga, neke fakamaligi ai e toto ha ko e fale hau, ka to hifo ai taha.
9 Aua neke to ai e koe e tau fua kehekehe ke he hau a uluvine; neke kelea ai e tau mena ke tutupu mai ai hau a tau fua ne to, katoa mo e tau fua he hau a uluvine.
10 Aua neke keli aki e koe e kelekele ke he povi mo e asini fakalataha.
11 Aua neke tapulu ai a koe ke he tapulu ie kua lalaga fiofio ke he tau mena kehekehe, ko e tau fulu mamoe mo e lino.
12 Kia eke e koe māu e tau mena fakahafehafe ke he tau matapotu ne fa he hau a tapulu kua tapulu ai a koe.
13 Kaeke ke fai hoana e tagata, mo e fina atu a ia ki ai, ti vihiatia e ia a ia,
14 Mo e eke mena ke tupu ai e loma kia ia, mo e talahaua kelea ai a ia, kua pehe age foki a ia, Ne fai hoana au ke he fifine nai, ti fina atu ai au kia ia ti kitia ai e au nakai ko e tamafine tote a ia;
15 Ti uta ai he matua tane mo e matua fifine he tama fifine e tau fakamailoga he hana tamafine tote, mo e uta ai ke he tau patu he maga, ke he gutuhala;
16 Ti pehe atu ai e matua tane he tama fifine ke he tau patu, Ne ta age e au haku tama fifine ke he tagata nai ke eke mo hoana hana ka kua vihiatia e ia a ia;
17 Kitiala kua tupu ai e loma ke he tama fifine ha ko ia, kua pehe a ia, Kua kitia e au hau a tama nakai ko e tamafine tote a ia; ka ko e tau fakamailoga hanai he tamafine tote he haku a tama. Ti fofola atu ai e laua e ie ki mua he tau patu he maga.
18 Ti uta ai he tau patu he maga ia e tagata na, mo e fahi e lautolu a ia;
19 Ti fakahala ai foki e lautolu a ia ke he tau tupe taha e teau, mo e ta age ke he matua tane he tama fifine, ha ko ia ne talahaua kelea ai e tamafine tote i Isaraela. Ti eke foki a ia mo hoana hana; nakai maeke ke tuku kehe e ia a ia ke he hana tau aho oti ni.
20 Ka ko e mena kaeke ke moli e tau kupu na, ti nakai moua ai ma e tama fifine e tau fakamailoga he tamafine tote.
21 Ti uta ai e lautolu e tama fifine ke he gutuhala he fale he hana matua tane, ti pini maka ai a ia he tau tagata oti he hana maga ke mate ai a ia: nukua eke ai e ia e mena kelea i Isaraela, he feuaki a ia ke he kaina he hana matua tane; ti tuku kehe ai e mutolu e kelea ia mutolu.
22 Ka kitia ai e tane kua momohe a laua mo e fifine kua fai tane, kia mamate ai a laua tokoua, ko e tane ne mohe mo e fifine, katoa mo e fifine; ti tuku kehe ai e koe e kelea ia Isaraela.
23 Kaeke ke he i ai ha tama fifine ko e tamafine te kua fakatutane, ti moua he taha tagata a ia ke he maga, mo e mohe mo ia;
24 Ti uta e mutolu a laua ke he gutuhala he maga na, mo e pinimaka ai a laua ke mamate; ko e tama fifine, he nakai fakatutu ai a ia ke he maga; ko e tane foki ha kua fakakelea ai e ia e hoana he tagata ne katofia mo ia; ti tuku kehe ai e kelea ia koe.
25 Kaeke ko e vao kua moua ai he tagata e tama fifine kua fakatutane, ti taofi ai he tane a ia mo e mohe mo ia; kia mate ai e tane ne mohe mo ia tokotaha ni;
26 Ka e aua neke eke ai ha mena ke he tama fifine; nakai fai hala e tama fifine ke mate a ia; tuga ne tu atu he tagata ne katofia mo ia mo e kelipopo a ia kua pihia la e mena na;
27 Nukua moua ai a ia ke he vao, ti fakatutu ai he tama fifine ne fakatutane, ka e nakai ha i ai taha ke laveaki a ia.
28 Kaeke foki ke moua he tagata e tama fifine ko e tamafine tote kua nakai fakatutane, ke he taha, ti tapaki e ia a ia, mo e mohe mo ia, ti moua ai a laua;
29 Ti ta age he tagata ne mohe mo ia ke he matua tane he tama fifine e tau tupe ne limagofulu, ti eke ai a ia mo hoana hana; nakai maeke ke tuku kehe e ia a ia ke he hana tau aho oti, ha kua fakakelea e ia a ia.
30 Aua neke faihoana e tagata ke he hoana he hana matua; aua neke hu foki he kafu he hana matua tane.