Teutaronome 25:1-19
25 KAEKE ke taufetoko e tau tagata, mo e uta ai ha lautolu a taufetoko ke he fakafiliaga, kia fakafili ai he tau fakafili a lautolu; ti talahau ai e lautolu kua tututonu a ia ne tututonu, ka e fakahala ni e lautolu a ia ne mahani kelea.
2 Kaeke foki kua lata ke fahi a ia ne mahani kelea, ti pehe atu ai he fakafili ke takoto a ia, mo e fahi ai a ia ki mua hana, kia fakalata ai e katoatoa he hana tau ta ke he hana mahani kelea.
3 Ka fagofulu hana tau ta, ti tokai, ka e aua neke lafilafi atu ki ai, neke lafilafi a ia ki ai, mo e ta ai a ia ke he tau ta loga, ti vihiatia ai hau a matakainaga ki mua hau.
4 Aua neke lili e koe e gutu he povi ka kua taholi e ia e tau saito.
5 Kaeke kua nonofo fakalataha e tau matakainaga; ti mate ai taha ia laua, ka e nakai fai tama a ia, ti ua fai tane e hoana he tagata ne mate ke he tagata kehe; ka kia fano ki ai e matakainaga he hana tane, ke eke ai mo hoana hana, mo e eke ai e mahani he matakainaga he hana tane kia ia.
6 Ti ui ai e higoa he hana matakainaga ne mate, ke he tama uluaki ke fanau mai e ia, ke aua neke holoholo kehe ai hana higoa ia Isaraela.
7 Kaeke foki ke nakai loto he tagata ke eke mana e hoana he hana matakainaga, ti hake ai e hoana he hana matakainaga ke he tau patu ke he gutuhala he maga, mo e pehe age, Nakai maeke ke he matakainaga he haku a tane ke fakamau ai i Isaraela e higoa ma e hana matakainaga, nakai fia eke e ia e mahani he matakainaga he haku a tane kia au.
8 Ti ui he tau patu he hana maga kia ia, ti vagahau ai a lautolu mo ia; kaeke foki ke tu ai a ia mo e pehe age, Nakai loto au ke eke a ia mo hoana haku;
9 Ti fakatata ai e hoana he hana matakainaga kia ia ki mua he tau patu, ti aki ai e ia hana afialoalohui he hana hui, mo e anu ke he hana mata, mo e tala age kia ia, pehe, Kia eke ni pihia ke he tagata kua nakai ati hake ai e fale he hana matakainaga.
10 Ti ui ai hana higoa i Isaraela, ko e magafaoa he tagata ne aki ai hana afialoalohui.
11 Kaeke ke latau e tau tagata, ko e taha tagata; mo e taha tagata, ti unu atu e hoana he taha ke laveaki mai hana tane he lima hana ne keli a ia, ti fakaolo atu e ia hana lima, mo e toto ai hana mouiaga.
12 Ti hio kehe ai ni hana tauululima, aua neke fakaalofa a koe kia ia.
13 Aua neke ha ia koe, ke he hau a kato e tau maka kehekehe ke fafati aki e tau mena ko e maka lahi, mo e maka tote.
14 Aua neke ha ia koe ke he hau a fale e tau efa kehekehe, ko e efa lahi mo e efa tote.
15 Kia ha ha ia koe e tau maka fafati katoatoa mo e tonu kia ha ia koe foki e efa katoatoa mo e tonu; kia loga ai hau a tau aho ke he motu ke foaki mai ai e Iehova hau a Atua kia koe.
16 Ha ko e mena vihiata e Iehova hau a Atua a lautolu oti kua eke e tau mena ia, ko lautolu oti takitokotaha kua mahani hepehepe.
17 Kia manamanatu ā e tau mena ne eke ai e Amaleka kia koe ke he puhala, he o mai ai a mutolu i Aikupito;
18 Ne hau a ia ke fonofono a koe ke he puhala, mo e keli ai e ia hau a tau tagata ne mumui, ko lautolu oti kua lolelole ne mumui atu kia koe, ka kua nakai fahia, mo e mategugu a koe; ti nakai matakutaku foki a ia ke he Atua.
19 Ka foaki atu ai e Iehova hau a Atua e okiokihaga kia koe ia lautolu oti kua fai fi kia koe, ko lautolu ne agagai kia koe, ke he motu kua foaki mai ai e Iehova hau a Atua kia koe ke eke mo tufaaga hau, kia eke ni māu, ti holoholo kehe e koe e fakamanatuaga a Amaleka mai he lalolagi; aua neke nimo ia koe.