Teutaronome 26:1-19
26 KA hoko atu foki a koe ke he motu kua foaki mai ai e Iehova hau a Atua kia koe, ke eke mo tufaaga hau, ti eke ni e koe mau, mo e nofo ai a koe;
2 Ti uta ai e koe he tau fua uluaki he tau fua oti ni he hau a kelekele, ne ta mai ai he hau a motu kua foaki mai e Iehova hau a Atua kia koe, ti tuku ai e koe ke he kato, mo e fano ai ke he mena ke fifili ai e Iehova hau a Atua, ke tuku ai hana higoa;
3 Ti fano a koe ke he ekepoa ke ha i ai ke he vaha ia, mo e pehe age a koe kia ia, Kua fakakite atu e au ke he aho nai, kia Iehova hau a Atua, kua hoko mai au ke he motu ne omonuo ai e Iehova ke he ha tautolu a tau matua ke foaki mai kia tautolu.
4 Ti uta ai he ekepoa e kato mai he lima hau mo e fakatoka ai ki mua he fatapoa a Iehova hau a Atua.
5 Ti talahau ai e koe, mo e pehe atu ki mua a Iehova hau a Atua, Ko e haku a matua ko e tagata Suria a ia ko e mate ha ne fai a ia; ti hifo ai a ia ki Aikupito, ti nofo ai a ia mo e tau tagata tokogahoa, ti eke ai a ia mo motu lahi, to malolo, to tokologa;
6 Ti ekefakakelea mai he tau tagata Aikupito kia tautolu, mo e fakamamahi ai e lautolu a tautolu, mo e tuku mai e tau gahua mamafa kia tautolu;
7 Ti tagi atu ai a tautolu kia Iehova ko e Atua he tau matua ha tautolu, ti fanogonogo mai a Iehova ke he ha tautolu a leo, mo e kitekite mai a ia ke he ha tautolu a mamahi, mo e ha tautolu a tau gahua mamafa, mo e ha tautolu a matematekelea:
8 Ti ta mai ai e Iehova a tautolu i Aikupito ke he lima malolo, mo e lima fakaolo, katoa mo e tau mena ke matakutaku lahi ai, mo e tau fakamailoga, mo e tau mana;
9 Kua fakahoko mai foki e ia a tautolu ke he mena nai, ti kua foaki mai foki e ia kia tautolu e motu nai, ko e motu kua tafe ai e puke huhu mo e meli;
10 Ko e hanai foki Iehova na e kitiala, kua ta mai tuai e au e tau fua uluaki he kelekele, kua foaki mai ai e koe kia au. Ti tuku atu ai e koe, a ia ki mua a Iehova hau a Atua, ti hufeilo atu ai a koe ki mua a Iehova hau a Atua;
11 Ti fiafia ai a koe ke he tau mena mitaki oti ni kua foaki mai e Iehova hau a Atua kia koe mo e hau a magafaoa, ko koe, mo e tau tagata Levi, mo e tagata kehe ha ia koe.
12 Ka kua oti he uta e koe e tau mena oti ne hogofulu aki hau a tau mena kua moua mai ke he tau tolu, ko e tau haia ke uta ai e tau mena ne hogofulu aki, mo e ta age ai e koe ke he tau tagata Levi, mo e tagata kehe, mo ia kua nakai fai matua, mo e fifine takape, kia kai e lautolu, mo e mamakona ai ke he hau a tau maga;
13 Ti pehe atu ai a koe ki mua a Iehova hau a Atua, Kua ta mai tuai e au e tau mena tapu he haku a fale, mo e ta age ai ke he tau tagata Levi, mo e tagata kehe, mo ia kua nakai fai matua, mo e fifine takape, tuga ne tau poakiaga oti hāu kua poaki mai ai e koe kia au; nakai holi e au hau a tau poakiaga, ti nakai nimo foki ia au;
14 Nakai kai ai e au ke he haku a fakatutuku nakai uta foki ha mena he tau mena ia ke he mena nakai mea, nakai age foki e au ha mena he tau mena ia ma lautolu ne mamate; kua fanogonogo ai au ke he leo a Iehova haku a Atua, kua eke ai e au tuga ne tau mena oti ni ne poaki mai e ia kia au.
15 Kia kitekite mai a koe he hau a haeleaga tapu, mai he lagi mo e fakamonuina mai e koe hau a motu ko Isaraela, mo e kelekele kua foaki mai ai e koe kia mautolu, tuga ne omonuo ai e koe ke he ha mautolu a tau matua, ko e motu kua tafe ai e puke huhu mo e meli.
16 Ko e aho nai ni kua poaki mai ai e Iehova hau a Atua kia koe ke eke e tau fakatufono na mo e tau fakafiliaga; kia omaoma foki a koe ki ai, mo e eke ai e koe mo e hau a loto katoa mo e hau a agaga katoa.
17 Kua talahau ni e koe ke he aho nai ko Iehova ko e hau a Atua haia; ke fano ai a koe ke he hana tau puhala, mo e omaoma ke he hana tau fakatufono, mo e hana tau poaki, mo e hana tau fakafiliaga, mo e fanogonogo ai ke he hana leo;
18 Ti pehe mai ni a Iehova ke he aho nai ke eke a koe mo motu hana, ko e koloa uho, tuga ne talahau mai e ia kia koe, kia omaoma foki a koe he hana tau poaki oti ni,
19 Kia eke foki e ia a koe ke mua ue atu ke he tau motu oti kana ne eke e ia; ke he fakahekeaga, mo e talahaua, mo e fulufuluola; kia eke foki a koe mo motu tapu kia Iehova hau a Atua, tuga ne talahau mai e ia.