Teutaronome 27:1-26
27 KUA poaki atu e Mose mo e tau patu Isaraela ke he motu, kua pehe atu, Kia omaoma a mutolu ke he tau poakiaga oti ni kua poaki atu ai e au kia mutolu ke he aho nai.
2 Ko e aho foki ke o atu ai a mutolu ke he fahi atu a Ioritana, ke he motu kua foaki mai e Iehova hau a Atua kia koe, kia to ai e koe māu e tau maka lalahi, mo e vali ai e koe ia ke he puga;
3 Ti tohi ai e koe e tau kupu oti ni he fakatufono nai, ka kua hoko a koe ke he fahi atu, ke fina atu ai a koe ke he motu kua foaki mai e Iehova hau a Atua kia koe, ko e motu kua tafe ai e puke huhu mo e meli; tuga ne talahau mai e Iehova ko e Atua he hau a tau matua kia koe.
4 Ka kua o atu a mutolu ke he fahi atu a Ioritana, ti to ai e mutolu e tau maka na, kua poaki atu e au kia mutolu ke he aho nai, ke he mouga ko Evalu, ti vali ai e koe e tau maka ia ke he puga.
5 Ti ati ai e koe ke he mena ia e fatapoa ma Iehova hau a Atua, ko e fatapoa maka, aua neke ta aki e tau maka ke he lapatoa.
6 Ko e tau maka ai pihia ke ati aki e fatapoa a Iehova hau a Atua, ti eke ai e koe e tau poa huhunu kia Iehova hau a Atua ki luga hana;
7 Kia eke ai e koe e tau poa fakaaue, ti kai ai e koe ke he mena ia, mo e fiafia ai ki mua a Iehova hau a Atua.
8 Ti tohi ai e koe ke he tau maka e tau kupu oti ni he fakatufono nai, kia hihika fakamitaki ni.
9 Ti vagahau atu a Mose mo e tau ekepoa, ko e tau tagata Levi kia Isaraela oti ni, kua pehe atu, Isaraela na e, kia haga mai, mo e fanogonogo mai; kua eke a koe ke he aho nai mo motu ma Iehova hau a Atua.
10 Kia fanogonogo foki a koe ke he leo a Iehova hau a Atua, ti eke ai e koe hana tau poakiaga oti, mo e hana tau fakatufono kua poaki atu ai au kia koe ke he aho nai.
11 Kua poaki atu foki a Mose ke he motu ke he aho ia ni, kua pehe atu,
12 Ka kua o atu a mutolu ke he fahi atu a Ioritana, kia tutu ai a lautolu nai ke he mouga ko Keresema ke fakamonuina atu ke he motu; ko Simeona, mo Levi, mo Iuta, mo Isakara, mo Iosefa, mo Peniamina.
13 Ti tutu ai a lautolu nai ke he mouga ko Evalu ke kaialu; ko Reupena, ko Kato, mo Asera, mo Sepulona, ko Tano, mo Nafatali.
14 Ti fakamatala he tau tagata Levi mo e leo lahi, kua pehe atu ke he tau tagata oti ni a Isaraela,
15 Kia malaia e tagata kua eke e tupua kua ta, po ke tupua lapatoa, ko e tau mena fakalialia kia Iehova haia, kua eke ai ke he tau lima he tufuga, mo e tuku ai ke he mena galo, Ti tali mai ai he motu oti ni, kua pehe mai, Amene.
16 Kia malaia a ia kua ekefakakelea ke he hana matua tane po ke hana matua fifine. Ti tali mai ai he motu oti, Amene.
17 Kia malaia a ia kua tolo e katofia he tagata ne katofia mo ia. Ti tali mai ai he motu oti, Amene.
18 Kia malaia a ia kua fakahele ai e tagata matapouli ke he puhala. Ti tali mai ai he motu oti, Amene.
19 Kia malaia a ia kua fakakeukeu ai e fakafiliaga he tagata kehe, mo ia kua nakai fai matua, mo e fifine takape. Ti tali mai ai he motu oti, Amene.
20 Kia malaia a ia kua mohe mo e hoana he hana matua; ha kua veu e ia e kafu he hana matua tane, Ti tali mai ai he motu oti, Amene.
21 Kia malaia a ia kua mohe mo e manu, Ti tali mai ai he motu oti, Amene.
22 Kia malaia a ia kua mohe mo e hana mahakitaga, ko e tama he hana matua tane, po ke tama he hana matua fifine, Ti tali mai ai he motu oti, Amene.
23 Kia malaia a ia kua mohe mo e hana matua fugavai fifine. Ti tali mai ai he motu oti, Amene.
24 Kia malaia a ia kua keli fufu e tagata ne katofia mo ia. Ti tali mai ai he motu oti, Amene.
25 Kia malaia a ia kua talia e mena fakaalofa ke kelipopo ai e tagata nakai hala. Ti tali mai ai he motu oti, Amene.
26 Kia malaia a ia kua nakai tumau ai ke he tau kupu oti he fakatufono nai ke eke ai. Ti tali mai ai he motu oti, Amene.