Teutaronome 28:1-68
28 KAEKE foki ke fanogonogo fakamakutu a koe ke he leo a Iehova hau a Atua, ke taofi ke eke ai hana tau poakiaga oti ni kua poaki atu ai e au kia koe ke he aho nai, ti eke ai e Iehova hau a Atua ke mua ue atu a koe ke he tau motu oti ni he lalolagi;
2 To moua foki e koe e tau mena oti nai ke monuina ai; to hoko ia kia koe, ka fanogonogo a koe ke he leo a Iehova hau a Atua.
3 To monuina a koe ke he maga, to monuina foki a koe ke he fonua.
4 To monuina a koe ke he hau a fanau, mo e tau fua he hau a fonua, mo e tau punua he hau a tau manu huifa, ko e tau punua he hau a tau povi, mo e hau a tau fuifui mamoe.
5 To monuina hau a kato, katoa mo e hau a mena ke laku ai e falaoa.
6 To monuina a koe ka hau ai a koe, to monuina foki a koe ka fina atu ai.
7 To tuku mai ai e Iehova a lautolu kua fai fi kia koe, ko lautolu ke tutu mai kia koe, ke mahala ai a lautolu ki mua hau; ko e puhala taha ke o mai ai a lautolu kia koe, ka ko e tau puhala ne fitu ke fehola atu ai a lautolu ki mua hau.
8 To pule foki a Iehova ke monuina a koe ke he hau a tau fale saito, mo e tau mena oti ni ke eke ai ke he hau a tau lima; ti fakamonuina ai a ia a koe ke he motu kua foaki mai e Iehova hau a Atua kia koe.
9 To eke foki e Iehova a koe mo motu tapu mana, tuga ne omonuo mai e ia kia koe, kaeke ke omaoma a koe ke he tau poaki a Iehova hau a Atua; mo e fano ai ke he hana tau puhala.
10 Ti iloa ai he tau motu oti he lalolagi kua fakahigoa ai a koe ke he higoa a Iehova; ti matakutaku ai a lautolu kia koe.
11 To fakalahi ai e Iehova e tau mena mitaki kia koe, ko e hau a fanau, mo e tau punua he hau a tau manu huifa, mo e tau fua he hau a kelekele, ke he motu ne omonuo ai e Iehova ke he hau a tau matua, ne foaki mai ai e ia kia koe.
12 To vevete ai e Iehova hana tau fale koloa mitaki mau; ko e lagi haia, ke foaki mai ai e uha ke he hau a motu ke he hana ni a vaha, to fakamonuina foki e ia e tau gahua oti he hau a tau lima, to ta age e koe e tau mena ke he tau motu loga, ka e nakai ogo mena mai ai e koe.
13 To eke foki e Iehova a koe mo ulu, ka e nakai eke mo hiku; to ha i luga hokoia a koe, ka e nakai ha i lalo; kaeke ke fanogonogo a koe ke he tau poakiaga a Iehova hau a Atua, kua poaki atu ai au kia koe ke he aho nai, ke taofi, mo e eke ai.
14 Aua neke fano kehe a koe mo e tau kupu oti kua poaki atu ai e au kia mutolu ke he aho nai, ke he fahi matau, po ke fahi hema, ke mui atu ke he tau atua kehe, mo e fekafekau ai.
15 Kaeke foki ke nakai fanogonogo a koe ke he leo a Iehova hau a Atua, ke taofi ke eke ai hana tau poakiaga oti mo e hana tau fakatufono kua poaki atu ai e au kia koe ke he aho nai; ti moua mai ai a koe he tau malaia oti nai, ti hoko ia kia koe.
16 To malaia a koe ke he maga, to malaia foki a koe ke he fonua.
17 To malaia hau a kato, katoa mo e hāu a mena ke laku ai e falaoa.
18 To malaia hau a fanau, mo e tau fua he hau a kelekele, ko e tau punua he hau a tau povi mo e hau a fuifui mamoe.
19 To malaia a koe ka hau ai a koe, to malaia foki a koe ka fina atu ai.
20 To fakahoko mai e Iehova e malaia kia koe, mo e fakaatukehe, mo e akonakiaga ke he tau mena oti ni ke toto ai ke he hau a tau lima ke eke ai, ato fakaoti ai a koe, mo e mahaikava vave ni; ha ko e kelea he hau a mahani ne tiaki ai e koe au,
21 To eke e Iehova ke pipiki atu kia koe e tatalu, ato fakaoti ai e ia a koe mai he fugakelekele kua fina atu a koe ki ai ke eke mau.
22 To ta ai e Iehova a koe ke he gagao pipili, mo e gagao vevela, mo e gagao fufula, mo e vevela lahi ni; mo e vevela he la, mo e fifigo, mo e polopologa; ti tutuli ai a koe he tau mena ia ato mahaikava ai a koe.
23 To eke foki hau a lagi ki luga hau mo apa kula, mo e lalolagi ha i lalo hau to eke ia mo lapatoa.
24 To eke ai e Iehova e uha ke he hau a motu mo efuefu ikiiki mo e efuefu; to to hifo ia mai he lagi ki luga hau, ato fakaoti ai a koe.
25 To toka e Iehova a koe ke mahala ai ki mua ha lautolu kua fai fi kia koe; ko e taha ni e puhala ke fina atu ai kia lautolu, ka e fitu e puhala ke fehola ai a mutolu ki mua ha lautolu; to tuku atu foki a koe ke ekefakakelea ki ai he tau kautu oti he lalolagi.
26 To eke foki hau a tino mate mo mena kai ma e tau manu lele oti he pulagi likoliko, mo e tau manu huifa he kelekele, ti nakai ha i ai taha ke vega a lautolu.
27 To ta ai e Iehova a koe ke he tau fakafoha a Aikupito, mo e tau hemeroiti. Mo e gagao matafune, mo e magiho, ti nakai maeke ke fakamalolo ai a koe.
28 To ta ai e Iehova a koe ke he gagao heketia, mo e matapouli, mo e loto fakaatukehe;
29 To tamotamo ai e koe ke he tupou lā, tuga ne tamotamo ai he tau matapouli ke he pouli kikio; to nakai fai monuina foki ke he hau a tau puhala, to pehia hokoia ni a koe, mo e fofo ai hau a tau mena ke he tau aho oti ni, ka e nakai ha i ai taha ke laveaki a koe.
30 To mau ai e pulega ha mua mo e fifine ke eke mo hoana hau, ka e toho he taha tane a ia, to ta e koe e fale ka e nakai nofo ai; to to e koe e ulu vine, ka e nakai kai ai e koe hana tau fua.
31 To keli ai hau a povi ki mua hau, ka e nakai kai ai e koe; to fofo ai hau a asini mai mua hau, ti nakai liuaki atu kia koe; to age hau a tau mamoe kia ia kua fai fi kia koe, ti nakai ha ia koe taha ke laveaki mai.
32 To foaki age hau a tau tama tane mo e hau a tau tama fifine ke he motu kehe, to kitekite ai foki hau a tau mata, mo e fakapula ai, to ha i ai foki a lautolu ke he aho katoa; to nakai fai malolo foki a koe ke laveaki mai.
33 Ko e tau fua he hau a kelekele, mo e hau a tau gahua oti ni, to kai ai he motu kua nakai iloa e koe; ti pehia ai a koe mo e tukimakaefu mau ai ke he tau aho oti ni;
34 To heketia foki a koe ha ko e tau mena kua kitekite ki ai hau a tau mata.
35 To ta e Iehova a koe ke he tau fakafoha kelea ke he hau a tulihui mo e hau a tau hui, ti nakai maeke ke fakamaulu ai; to kamata mai he hau a tau aloalohui ti hoko ni ke he tumuaki ulu.
36 To takitaki atu e Iehova a koe, mo e hau a patuiki ke fakauku ai e koe māu, ke he motu kua nakai iloa e koe po ke hau a tau matua; to fekafekau ai foki a koe ke he mena ia ke he tau atua kehe, ko e tau akau me e tau maka.
37 To eke foki a koe mo mena ke ofo ai, mo e kupu fakatai, mo e mena ke va ki ai ke he tau motu oti ni ke takitaki a koe ki ai e Iehova.
38 To uta e koe e tau fua loga ke to ke he fonua, ka e gahoa e tau mena ke tatanaki mai ai; ha ko e mena kai ni he tau he akerise.
39 To to e koe e uluvine, mo e gahua ai, ka e nakai inu e uaina ne tatau mai ai hana tau fua; ha kua kai ai he tau uaga.
40 To to ai e koe e ulu olive ke he hau a tau katofia oti, ka e nakai uku ai a koe ke he puke lolo ia; ha kua mokulu ai e tau fua he hau a tau olive.
41 To fanau ai kia koe e tau tama tane, mo e tau tama fifine, ka e nakai eke ai a lautolu māu; ha ko e mena uta a lautolu ke fakapaea.
42 Ko e tau akau oti mo e tau fua he hau a kelekele, to fakaotioti ai he tau he telatela.
43 Ko e tagata kehe ha ia koe; to mua ue atu ni a ia kia koe; ka e hifo taha ni a koe ki lalo ia ia.
44 To ogo mena a koe ia ia, ka e nakai ogo mena a ia ia koe; to eke a ia mo ulu ka e eke a koe mo hiku.
45 To moua ai a koe he tau malaia oti na, to tutuli e lautolu a koe, mo e hoko atu ni kia koe, ato mahaikava ai a koe; ha kua nakai fanogonogo a koe ke he leo a Iehova hau a Atua, ke omaoma ke he hana tau poakiaga mo e hana tau fakatufono ne poaki mai e ia kia koe.
46 To ha ia koe mo e hau a fanau e tau mena ia, ke eke mo fakamailoga mo e tau mena ke ofomate ai tukulagi.
47 Nukua nakai fekafekau ai a koe kia Iehova hau a Atua mo e fiafia, mo e olioli he loto, ha ko e loga he tau mena oti;
48 Ko e mena ia ke fekafekau ai a koe mo e fia kai, mo e fia inu, mo e nakai fai felevehi, mo e nofogati ke he tau mena oti kia lautolu kua fai fi kia koe ke fakafano mai e Iehova kia koe; to tuku atu foki e lapatoa hahamo ke he hau a tukeua, ato fakaoti e ia a koe.
49 To ta mai e Iehova kia koe e motu mai he mena mamao, mai he kala he lalolagi, tuga ne lele mai he aeto, ko e motu nakai logona ai e koe ha lautolu a vagahau;
50 Ko e motu matavale, nakai haga atu a lautolu ke he tau tagata motua, to nakai fakaalofa atu foki ke he tau tama;
51 To kai foki e lautolu e tau punua he hau a tau manu, mo e tau fua he hau a kelekele, ato mahaikava a koe; nakai toka e lautolu māu ha fua saito, po ke uaina, po ke puke lolo, ko e tau punua he hau a tau povi, po ke tau punua he hau a tau fuifui mamoe, ato fakaotioti ai e ia a koe.
52 To pa takai e lautolu a koe ke he hāu a maga oti, ato tulei hifo ai hau a tau kaupa ne tokoluga to uka, ne tua ki ai a koe, ke he hau a motu oti; to pa takai e lautolu a koe ke he tau maga oti he hau a motu katoa kua foaki mai e Iehova hau a Atua kia koe.
53 To kai ai foki e koe hau a fanau kua foaki mai e Iehova hau a Atua kia koe, ko e tau tino ni he hau a tau tama tane mo e hau a tau tama fifine, nukua pa takai ai a koe, mo e mamahi, ne fakamamahi atu ai a koe e lautolu ne fai fi kia koe.
54 Ko e tagata ha ia koe ne tino lolelole, mo e fakahelehele lahi ni, to nakai fakaalofa a ia ke he hana matakainaga, mo e hana hoana fakahele, mo e hana fanau kua toe, ne toka ai e ia;
55 To nakai age e ia ke he taha ia lautolu ha maga kakano he hana tau tama tane ne kai ai e ia; ha kua nakai ni toe ha mena māna ha kua pa takai ai a koe, mo e mamahi, kua fakamamahi ai a koe e lautolu ne fai fi kia koe ke he hau a tau maga oti.
56 Ko e fifine ha ia koe kua tino lolelole, mo e fakahelehele ni, nakai fakafifitaki e ia ke fakatu ai hana tau aloalohui ke he kelekele, ha ko e lolelole he hana tino mo e hana tino kua fakahelehele, to nakai fakaalofa a ia ke he hana tane fakahele, mo e hana tama tane, mo e hana tama fifine,
57 Mo e hana fonua ne to hifo ai he vaha he hana tau hui, mo e hana fanau ne fanau ai e ia; ha ko e mena kai fufu e ia a lautolu ha ko e hogeia he tau mena oti ni he pa takai ai a koe, mo e mamahi, ne fakamamahi atu ai a koe e lautolu kua fai fi kia koe ke he hau a tau maga oti.
58 Kaeke ke nakai taofi e koe ke eke ai e tau kupu oti ni he fakatufono kua tohia ke he tohi nai, ke matakutaku ai a koe ke he higoa lilifu mo e matakutakuina nai, KO IEHOVA HAU A ATUA;
59 Ti fakahoko atu e Iehova e tau mauku kia koe, mo e tau mauku ke he hau a fanau, ke ofomate ai a mutolu ko e tau mauku lalahi ni, mo e tumau, mo e tau gagao kelea, mo e tumau,
60 Ti fakahoko atu foki e au kia koe e tau gagao oti a Aikupito, ne matakutaku ai a koe, ti pipiki atu ia kia koe.
61 Ko e tau gagao oti foki, mo e tau mauku oti ni, kua nakai tohia ke he tohi he fakatufono nai, to fakahoko atu ai e Iehova kia koe, ato mahaikava ai a koe.
62 Ti toe ai a mutolu tokogaogao, ko mutolu ne tokologa ke tuga ne tau fetu he lagi; ha kua nakai fanogonogo a koe ke he leo a Iehova hau a Atua.
63 Ti tuga ne fiafia a Iehova kia mutolu, ke eke fakamitaki atu kia mutolu, mo e fakatokologa ai a mutolu; to fiafia ni pihia a Iehova ke fakamahakava e ia a mutolu, mo e fakaotioti ai e ia a mutolu; ke tafi kehe ai e ia a mutolu mai he fuga kelekele kua fine atu a koe ki ai ke eke mau.
64 To fakamavehevehe foki e Iehova a koe ke he tau motu oti, ke kamata mai he taha kala he lalolagi ke hoko atu ke he taha kala he lalolagi; to fekafekau ai foki a koe ke he tau atua kehe, ko e tau akau, mo e tau maka, kua nakai iloa e koe po ke hau a tau matua.
65 To nakai moua ai foki e koe ha okiokihaga ke he tau motu ia, to nakai fai mena ai foki a koe ke tu ai hau a aloalohui; to fakahoko atu foki e Iehova kia koe ke he tau motu ia e loto vivivivi, mo e tau mata vavanu, mo e loto lolelole;
66 To nofo fahahanoa a koe po ke moui po ke mate, to matakutaku foki a koe ke he po katoa mo e aho, to nakai tua foki a koe ke he hau a moui.
67 To pehe a koe ke he magaaho pogipogi, Kua fia hoko atu ke he afiafi, to pehe foki a koe ke he afiafi, Kua fia hoko atu ke he pogipogi, ha ko e matakutaku he hau a loto ne matakutaku ai a koe, ha ko e tau mena foki ne kitekite ki ai hau a tau mata.
68 To liuaki atu foki e Iehova a mutolu ki Aikupito ke he tau foulua, (ko e puhala ne pehe atu ai au kia koe, To nakai liu foki ke kitia ai e koe), to fakafua atu ai foki a mutolu ke he mena ia kia lautolu kua fai fi kia mutolu, ti eke ai a mutolu mo tau fekafekau tane mo e tau fekafekau fifine; ato nakai fai tagata ke fakafua mai ai a mutolu.