Teutaronome 29:1-29
29 KO e tau kupu hanai he maveheaga ne pehe mai a Iehova kia Mose ke eke ai mo e fanau a Isaraela ke he motu ko Moapi, ka e kehe e maveheaga ne eke ai e ia mo lautolu i Horepa.
2 Ti ui atu ai e Mose kia Isaraela oti, kua pehe atu a ia kia lautolu, Ne kitia e mutolu e tau mena oti ne eke ai e Iehova ki mua ha mutolu ke he motu ko Aikupito kia Farao, mor e hana tau fekafekau oti, katoa mo e hana motu oti.
3 Ko e tau mena kamakamata lalahi ne kitekite ki ai hau a tau mata; ko e tau fakamailoga ia mo e tau mana lalahi;
4 Ka e nakai foaki mai e Iehova kia mutolu e tau loto ke iloa ai, mo e tau mata ke kitekite ai, mo e tau teliga ke fanogonogo ai, ke hoko mai ni ke he aho nai.
5 Ne takitaki ai foki e au a mutolu ke he tutakale ke he tau tau ne fagofulu; ti nakai popo ha mutolu a tau tapulu ne fakatapulu ai a mutolu, ti nakai popo foki ha mutolu a tau afi aloalohui ke he ha mutolu a tau hui.
6 Nakai kai areto a mutolu, ti nakai inu ai foki e mutolu e uaina po ke kava, kia iloa ai e mutolu, ko au ko Iehova ko e ha mutolu a Atua.
7 Ne hohoko mai a mutolu ke he mena nai, ti o mai ai a Sikono ko e patuiki a Hesepona, mo Oko ko e patuiki i Vasana, ti feleveia ai a tautolu ke tau, ti keli ai e tautolu a laua.
8 Ti fofo ai e tautolu ha laua a kelekele, mo e foaki atu ai ke eke mo tufaaga ma e tau tagata Reupena, mo Kato, mo e taha veveheaga he magafaoa a Manase.
9 Ko e hanai kia omaoma a mutolu ke he tau kupu he maveheaga nai, mo e eke ai e mutolu, kia monuina ai a mutolu ke he tau mena oti ni ke eke ai e mutolu.
10 Kua tutu a mutolu oti ke he aho nai ki mua a Iehova ha mutolu a Atua; ko e tau iki he ha mutolu a tau magafoa, mo e ha mutolu a tau patu, mo e ha mutolu a tau takitaki, ko e tau tagata oti ni a Isaraela;
11 Ko e ha mutolu a tau ta ma ikiiki, mo e ha mutolu a tau hoana, mo e tagata kehe ha ia koe ke he hau a heagaapi, ko ia kua fai gaafi māu katoa mo ia kua utu mai hau a tau vai;
12 Kia eke ai e maveheaga mo Iehova hau a Atua, mo e hana omonuo, kua eke ai e Iehova hau a Atua mo koe ke he aho nai;
13 Kia fakamau ai e ia a koe ke he aho nai ke eke mo motu māna ke eke foki a ia mo Atua māu; tuga ne vagahau mai e ia kia koe, ke lata foki mo e mena ne omonuo ai e ia ke he hau a tau matua, ko Aperahamo, mo Isaako, mo Iakopo.
14 Ti nakai eke ai e au e maveheaga nai mo e omonuo nai mo mutolu hoko mutolu;
15 Ka e katoa mo lautolu kua tutu fakalataha mo tautolu ki hinei ke he aho nai ki mua a Iehova ha tautolu a Atua, katoa mo lautolu kua nakai fakalataha mai mo tautolu ki hinei ke he aho nai;
16 Ha ko e mena iloa e mutolu ha tautolu a nonofo ke he motu ko Aikupito, mo e ha tautolu a o mai he tau motu ne o mai ai a mutolu;
17 Ne kitia foki e mutolu ha lautolu a tau mena fakalialia, mo e ha lautolu a tau tupua, ko e tau akau mo e tau maka, ko e ario mo e auro, ne ha ia lautolu,
18 Neke ha ha ia mutolu he tane, po ke fifine, po ke faoa, po ke magafaoa, kua haga kehe hana loto ke he aho nai mo Iehova ha tautolu a Atua, ke fano ke fekafekau ai ke he tau atua kehe he tau motu na; neke ha ha ia mutolu ha vaka akau ke tupu mai ai e tau mena kona mo e laena;
19 Ka logona foki e ia e tau kupu he kaialu nai, ti fakamonuina e ia a ia ke he hana loto, kua pehe hifo, To monuina ai au, pete ni he fano au mo e mao he haku a loto, mo e lafilafi atu ke he fia inu, ko e inu ke konahia;
20 To nakai finagalo a Iehova ke fakamagalo ia kia ia, ka e ahua mai he ita a Iehova mo e hana ita tafua ke he tagata ia; to toka atu foki kia ia e tau malaia oti kua tohia ke he tohi nai; to holoholo kehe foki e Iehova hana higoa mai he lalolagi.
21 To vevehe kehe foki e Iehova a ia mai he tau magafaoa oti ni a Isaraela ke kelea ai, ke lata mo e tau malaia oti he maveheaga kua tohia ke he tohi he fakatufono nai;
22 Ko e hau foki a mui he ha mutolu a fanau ke tutupu mai ka mole atu a mutolu, mo e tagata kehe ka hau ai he motu mamao, to pehe mai a lautolu, ka kitia ai e lautolu e tau mauku he motu na, mo e tau gagao ne fakahoko mai e Iehova ke gagao ai e tau tagata;
23 Ko e taio mo e masima, ke huhunu ai e fuga kelekele oti; ko e mena ia nakai to mena ai, to nakai fua mai ai, to nakai tutupu ai e tau lau kou ke tuga ne moumou ai a Sotoma mo Komora, ko Atama mo Sipoima, ne moumou ai e Iehova ke he hana ita mo e hana ita lahi;
24 To pehe age ni he tau motu oti, Ko e ha ne eke pihia e Iehova ke he motu na? ko e heigoa e kakano he hana ita kua lahi mahaki ai?
25 Ti tali mai ai e lautolu, Ha kua tiaki e lautolu e maveheaga mo Iehova ko e Atua he ha lautolu a tau matua, ne eke e ia mo lautolu he ta mai ai e ia a lautolu he motu ko Aikupito;
26 Ha kua o a lautolu mo e fekafekau ai ke he tau atua kehe, mo e hufeilo ki ai; ko e tau atua nakai iloa e lautolu, ti nakai ago foki e lautolu ha mena ma lautolu;
27 Ti tupu ai e ita a Iehova ke he motu na, ti fakahoko atu e ia ki ai e tau malaia oti kua tohia ke he tohi nai;
28 Ti taaki ai e Iehova a lautolu mai he motu ha lautolu ke he hana ita, mo e hana ita lahi, mo e hana vale kua lahi mahaki, ti liti atu foki e ia a lautolu ke he taha motu, tuga ne eke ai ke he aho nai.
29 Ha ia Iehova ha tautolu a Atua e tau mena galo; ka ko e tau mena kua fakakite mai ha ia tautolu ia mo e ha tautolu a fanau tukulagi, kia eke ai e tautolu e tau kupu oti he fakatufono nai.