Teutaronome 3:1-29
3 TI liliu age a tautolu, mo e o hake ai ke he puhala ki Vasana, ti o mai a lautolu, ko Oko ko e patuiki a Vasana, ko ia mo e hana motu oti ke fonofono a tautolu ke tau i Etirei.
2 Ti pehe mai a Iehova kia au, Aua neke matakutaku a koe kia ia, ha kua tuku atu ai e au a ia ke he hau a lima, mo e hana motu oti, katoa mo e hana kelekele; ti eke e koe kia ia tuga ne eke e koe kia Sikono ko e patuiki he tau tagata Amori, ne nofo i Hesepona.
3 Ti tuku mai e Iehova ha tautolu a Atua ke he tau lima ha tautolu a Oko ko e patuiki a Vasana, mo e hana motu oti ni; ti kelipopo ai e tautolu a lautolu oti, nakai ni toe ha tagata tokotaha kia ia.
4 Ti fofo ai e tautolu hana tau maga oti ke he vaha ia, nakai fai maga nakai uta ai e tautolu ia lautolu, ko e onogofulu ni e maga, ko e fahi oti ko Arakopo ne pule ai a Oko i Vasana.
5 Ko e tau maga oti ia ni ne puipui ai ke he pa tokoluga, ko e tau gutuhala kua eke mo e tau akau fakalava ke fakamau aki; katoa mo e tau maga nakai puipui ne loga lahi ni.
6 Ti fakaotioti ai e tautolu a lautolu tuga ne eke e tautolu kia Sikono ko e patuiki a Hesepona, ne fakaotioti ai e tautolu e tau tane, ko e tau fifine mo e tau tama ikiiki ke he tau maga oti ni.
7 Ka ko e tau manu oti, mo e tau koloa he tau maga, ne eke ai e tautolu e tau mena ma tautolu.
8 Ne uta e lautolu ke he vaha ia e kelekele mai he tau lima he tau patuiki he tau tagata Amori ne tokoua, ne ha i ai ke he fahi mai nai a Ioritana, ne kamata mai he vailele ko Aranona, ti hoko atu ni ke he mouga ko Heremoni.
9 (Ne fakahigoa ai he tau tagata Saitonu a Heremoni, ko Siriona, ka e ui ai he tau tagata Amori a ia ko Senira;)
10 Ko e tau maga oti ke he kelekele tatai, mo Kiliata oti, mo Vasana oti ke hoko atu ki Saleka, mo Eserei, ko e tau maga ke he motu ne pule ai a Oko i Vasana.
11 Ha ko Oko ni ko e patuiki i Vasana ne toe tokotaha he tau tagata makimaki; kitiala hana mohega, ko e mohega lapatoa, nakai kia tokai i Rapa ia, ko e maga he fanau Amoni? Ne hiva e kupita hana loa, ti fa e kupita hana laulahi, ko e kupita he tagata haia.
12 Ko e motu ia ne eke e tautolu ma tautolu ke he vaha ia, ke kamata i Aroeru ne tata age ke he vai ko Aranona, mo e taha fahi he mouga ko Kiliata, mo e hana tau maga ne foaki atu ai e au ke he tau tagata Reupena, mo e tau tagata Kato.
13 Ko e fahi ne toe a Kiliata, mo Vasana oti, ne pule ai a Oko kua foaki atu ai e au ke he taha veveheaga he magafaoa a Manase; ko e fahi oti ko Arakopo, ko Vasana oti ni, ne talahaua ko e motu he tau tagata makimaki.
14 Ne eke ai e Iairo ko e tama a Manase e fahi oti ko Arakopo, ke hoko atu ke he tau katofia a Kesuri, mo Maaka, ti ui e ia ki ai hana higoa ni, ko Vasana-havotiiairo, ke hoko mai ni ke he aho nai.
15 To foaki atu foki e au a Kiliata kia Makiro;
16 Ti foaki atu foki e au ke he tau tagata Reupena, mo e tau tagata Kato, ke kamata i Kiliata, to hoko atu ke he vailele ko Aranona, ha he lotoga he pahua, mo e katofia; kua hoko atu ni ke he vailele ko Iapoka, ko e katofia haia he fanau Amoni.
17 Ko e kelekele tatai foki, mo Ioritana, mo e hana fahi, ke kamata i Kinereta, ke hoko atu ke he tahi ha ha he kelekele tatai, ko e tahi kona haia ko Asetotapeseka ke he fahi uta.
18 Ti poaki atu e au kia mutolu ke he vaha ia kua pehe atu, Kua foaki mai e Iehova ha mutolu a Atua e motu nai ke eke ma mutolu; kia tauteute a a mutolu oti ne malolo, ke o atu ke he tau ki mua he tau matakainaga ha mutolu ko e fanau, a Isaraela.
19 Ka ko e ha mutolu a tau hoana, mo e ha mutolu a tau tama ikiiki, mo e ha mutolu a tau manu, ha ko e mena iloa e au kua loga ha mutolu a tau manu, kia nonofo ai a lautolu ke he tau maga ha mutolu ne foaki atu e au kia mutolu;
20 Ato ta atu ai e Iehova ha okiokihaga ke he tau matakainaga ha mutolu, ke tuga ni a mutolu, ato eke foki e lautolu ma lautolu e motu kua foaki atu ai e Iehova ha mutolu a Atua ma lautolu ke he fahi atu a Ioritana; ti liliu mai ai a mutolu, takitaha ke he fonua kua eke mana kua foaki atu e au ma mutolu.
21 Ti poaki age e au kia Iosua ke he vaha ia kua pehe age, Kua kitia tuai he tau mata hau e tau mena oti ne eke ai e Iehova ha mutolu a Atua ke he na patuiki tokoua ia, to eke pihia ni e Iehova ke he tau kautu oti ke fina atu a koe ki ai.
22 Aua neke matakutaku a mutolu kia lautolu, ha ko Iehova ko e ha mutolu a Atua, ko ia ke tau ma mutolu.
23 Ko e vaha ia ne olelalo atu e au kia Iehova, kua pehe atu,
24 Ko e Iki na e, ko Iehova, kua kamata tuai e koe ke fakakite mai ke he hau fekafekau hau a homo atu, mo e hau a lima malolo, ha ko hai kia e Atua ha ha he lagi, po ke ha ha he lalolagi ke eke e tau mena tuga ne eke ai e koe, ke tuga foki hau a malolo?
25 Kia toka e koe au ke fina atu, kia kitia ai e au e motu mitaki ha he fahi atu a Ioritana, ko e mouga mitaki na, mo Lepanona.
26 Ka e ita mai a Iehova kia au ha ko mutolu, ti nakai fanogonogo mai foki a ia kia au, ka kua pehe mai a Iehova kia au, Tokai, neke liu fai kupu mai a koe kia au ke he mena na.
27 Kia hake a koe ke he tapunu mouga ko Peseka, ti haga hake a koe hau a tau mata ke he fahi lalo, mo e fahi tokelau, mo e fahi toga, mo e fahi uta, ti kitia ai e koe ke he hau a tau mata; ha ko e mena nakai fano a koe ke he fahi atu a Ioritana na.
28 Ka kia poaki atu a koe kia Iosua, mo e fakamafana e koe a ia, mo e tomatoma atu kia ia ke fakamalolo, ha ko e mena fina atu ni a ia ki mua he motu nai, ko ia ke tufatufa ma lautolu e motu ke kitia ai e koe.
29 Ti nonofo ai a tautolu ke he pahua ne fehagai mo Petepeoro.