Teutaronome 30:1-20
30 KA hoko foki kia koe e tau mena oti nai, ko e monuina mo e malaia, kua tuku atu ai e au ki mua hau, ti manatu ai e koe ke he tau motu oti kua vega a koe ki ai e Iehova hau a Atua.
2 Mo e liu mai kia Iehova hau a Atua, ko koe mo e hau a fanau, mo e hau a loto katoa mo e hau a agaga katoa; mo e fanogonogo ai a koe ke he hana leo ke he tau mena oti ni kua poaki atu ai au kia koe ke he aho nai;
3 Ti liuaki ni e Iehova hau a Atua hau a paeaaga, mo e fakaalofa atu a ia kia koe, mo e liu fakapotopoto mai e ia a koe he tau motu oti kua fakamavehevehe atu a koe ki ai, e Iehova hau a Atua.
4 Kaeke ke vega ai a mutolu ke he motuaga he lagi, to fakapotopoto mai ai a koe e Iehova hau Atua, ti ta mai ai e ia a koe;
5 Ti fakahoko atu ai e Iehova hau a Atua a koe ke he motu ne eke ma e hau a tau matua, to eke foki ia māu; ti eke fakamitaki e ia a koe, mo e fakatokologa fakalahi e ia a koe ke mua a koe ke he hau a tau matua.
6 To fakaperitome foki e Iehova hau a loto, mo e tau loto he hau a fanau, kia fakaalofa atu a koe kia Iehova hau a Atua mo e hau a loto katoa, mo e hau a agaga katoa, kia moui ai a koe.
7 To tuku atu foki e Iehova hau a Atua e tau malaia oti na kia lautolu kua fai fi kia koe, mo e fakavihia a koe ko lautolu kua tutuli mai kia koe;
8 To liu mai foki a koe ke fanogonogo ke he leo a Iehova, mo e eke ai e koe hana tau poakiaga oti kua poaki atu ai e au kia koe ke he aho nai.
9 To fakalahi ai e Iehova hau a Atua a koe ke he tau gahua oti he hau a tau lima, ko e hau a fanau, mo e tau punua he hau a tau manu, mo e tau fua he hau a kelekele, ke mitaki ai; ha ko e mena liu fiafia mai foki a Iehova kia koe ke mitaki ai, tuga ne fiafia ai a ia ke he hau a tau matua;
10 Kaeke ke fanogonogo a koe ke he leo a Iehova hau a Atua, ke omaoma ke he hana tau poakiaga, mo e hana tau fakatufono kua tohia ke he tohi he fakatufono nai; kaeke ke liu mai a koe kia Iehova hau a Atua mo e hau a loto katoa, mo e hau a agaga katoa.
11 Ha ko e poakiaga nai kua poaki atu ai e au kia koe ke he aho nai, nakai galo ia kia koe, to nakai mamao foki ia.
12 Nakai ha ha he lagi a ia ke pehe age, Ko hai ke hake ke he lagi ma tautolu, ke ta mai ai a ia ma tautolu, kia fanogonogo a tautolu ki ai, mo e eke ai e tautolu?
13 Ti nakai ha he fahi atu he tahi a ia, ke pehe age, Ko hai ke fano ke he fahi atu he tahi ma tautolu, ke ta mai ai a ia ma tautolu, kia fanogonogo a tautolu ki ai, mo e eke ai e tautolu?
14 Ka e tata mai ni e kupu ia kia koe ha he gutu hau, to ha he loto hau, kia eke ai e koe.
15 Kitiala, kua tuku atu e au ki mua hau ke he aho nai ko e moui mo e monuina, ko e mate foki mo e malaia;
16 Ke he haku a poaki atu kia koe ke he aho nai, kia fakaalofa atu a koe kia Iehova hau a Atua, ke fano ai a koe ke he hana tau puhala, mo e omaoma ai a koe ke he hana tau poakiaga, mo e hana tau fakatufono, mo e hana tau fakafiliaga, kia moui a koe, mo e fakatokologa ai, kia fakamonuina ai e Iehova hau a Atua a koe ke he motu ke fano a koe ki ai ke eke mau.
17 Ka ko e mena ka haga kehe hau a loto, mo e nakai fanogonogo, ka e uhu kehe a koe, mo e fakaveli fakafohifo ai a koe ke he tau atua kehe, mo e fekafekau ki ai,
18 Kua tala atu e au kia mutolu ke he aho nai, to mahaikava ni a mutolu, nakai nonofo leva ai a mutolu ke he motu kua fano ai a koe ke he fahi atu a Ioritana, ke fina atu ki ai ke eke māu.
19 Kua ui age au ke he aho nai ke he lagi mo e lalolagi ke talahau atu kia mutolu, kua tuku atu e au ki mua ha mutolu e moui mo e mate, ko e monuina mo e malaia; ko e hanai, kia fifili la e moui, kia moui ai a koe katoa mo e hau a fanau;
20 Kia fakaalofa atu a koe kia Iehova hau a Atua, mo e fanogonogo ke he hana leo, mo e pipiki atu a koe kia ia; ha ko e hau a moui haia, ko ia foki ke fakaloga ai hau a tau aho; ke nofo ai a koe ke he motu ne omonuo ai e Iehova ke he hau a tau matua, ko Aperahamo, mo Isaako, mo Iakopo, ke foaki atu ai kia lautolu.