Teutaronome 31:1-30
31 KUA fina atu a Mose, mo e vagahau ai e tau kupu oti nai kia Isaraela oti.
2 Kua pehe atu a ia kia lautolu, Ne taha e teau ti uafulu haku a tau tau ke he aho nai; nakai tuai maeke au ke fina atu mo e liu mai; kua pehe mai foki a Iehova kia au, Nakai fano a koe ke he fahi atu a Ioritana nai.
3 Ko Iehova ko e hau a Atua, kua fina atu ai ki mua hau, to fakaotioti ai e ia e tau motu ki mua hau ka e eke ai māu; kua fina atu ai foki a Iosua ki mua hau, tuga ne vagahau mai e Iehova.
4 To eke foki e Iehova kia lautolu tuga ne eke ai e ia kia Sikono mo Oko, ko e na patuiki he faoa Amori, mo e ha laua a motu, ne fakaotioti e ia a laua.
5 To tuku mai e Iehova a lautolu ki mua ha mutolu, ti eke ai e mutolu kia lautolu, tuga ne tau poakiaga oti kua poaki atu ai e au kia mutolu.
6 Kia fakamalolo a mutolu mo e fakamanavalahi; aua neke fakaatukehe a mutolu, ti ua matakutaku a mutolu ki mua ha lautolu; ha ko Iehova hau a Atua kua o fakalataha mo koe; nakai toka e ia a koe, to nakai tiaki foki e ia a koe.
7 Kua ui atu foki a Mose kia Iosua, kua pehe atu foki kia ia ki mua a Isaraela oti, Kia fakamalolo a koe, mo e fakamanavalahi; ha ko e mena o atu a mutolu mo e motu nai ke he motu ne omonuo ai e Iehova ke he ha lautolu a tau matua ke foaki atu ai kia lautolu, to fakahoko atu foki e koe a lautolu ki ai ke eke ia mo tufaaga ma lautolu.
8 Ko Iehova foki kua mua atu kia koe, to fakalataha ni a mua mo ia; nakai toka e ia a koe, to nakai tiaki foki e ia a koe; aua neke fakaatukehe a koe, ti ua matakutaku.
9 Kua tohi e Mose e fakatufono nai, ti ta age ai ke he tau ekepoa ko e fanau a Levi, ko lautolu ne tauloto ai e puha he maveheaga a Iehova, katoa foki mo e tau patu oti ia Isaraela,
10 Ti poaki e Mose kia lautolu, kua pehe age, Ka mole atu e tau tau ne fitu, ka hoko ke he fakapotopotoaga ke he tau he tokanoaaga, ke he galue he tau fale api,
11 Ka o atu a Isaraela oti kia kitia ai a lautolu oti ki mua a Iehova hau a Atua ke he mena ke fifili ai e ia, ti totou atu ai e fakatufono nai ki mua a Isaraela oti ke logona ai e lautolu.
12 Kia fakapotopoto ai e koe e motu, ko e tau tane, mo e tau fifine, mo e tau tama ikiiki, katoa mo e tau tagata kehe ha ia koe ke he hau a tau maga kia fanogonogo ai a lautolu, mo e ako ai e lautolu, mo e matakutaku ai a lautolu kia Iehova ha mutolu a Atua, mo e taofi e lautolu ke eke ai e tau kupu oti ni he fakatufono nai.
13 Ko e ha lautolu a fanau foki, kua nakaila iloa, kia fanogonogo ai a lautolu, mo e ako ai e lautolu ke matakutaku kia Iehova ha mutolu a Atua, ke he tau aho oti ni, ke momoui ai a mutolu ke he motu kua o atu ai a mutolu ke he fahi atu a Ioritana ke eke ma mutolu.
14 Kua pehe mai a Iehova kia Mose, Kitiala, kua tata mai hau a tau aho ke mate ai a koe; kia ui e koe kia Iosua ti tutu ai a mua tokoua ke he fale uta fano he tutuuaga, kia poaki atu ai au kia ia. Ti o ai a Mose mo Iosua, ti tutu ai a laua ke he fale uta fano he tutuutaga.
15 Ti fakakite mai ai e Iehova ke he fale uta fano ke he aolagi fakatupou, kua tu ai foki e aolagi fakatupou ke he gutuhala he fale uta fano he tutuutaga,
16 Ti pehe mai a Iehova kia Mose, Kitiala, ko e takoto ne fai a koe fakalataha mo e hau a tau matua; ti tutu ai e motu nai mo e faivao ai mo e tau atua he tau tagata kehe he tau motu kehe ke o a lautolu ki ai, ke fakalataha ai a lautolu, to tiaki foki e lautolu au, mo e holi e lautolu haku a maveheaga kua eke ai e au mo lautolu.
17 Ti tupu ai haku a ita kia lautolu ke he aho ia, ti tiaki e au a lautolu, mo e ufiufi e au haku mata ia lautolu, ke fakaotioti ai foki a lautolu, to hoko foki kia lautolu e tau mena uka loga, mo e tau mena ke mamahi ai; to pehe age foki a lautolu ke he aho ia, Nakai kia hoko mai e tau mena kelea nai kia tautolu, ha kua tiaki e tautolu ha tautolu a Atua?
18 To ufiufi e au haku a mata ke he aho ia ha ko e tau mena kelea oti kua eke e lautolu he hagao atu a lautolu ke he tau atua kehe.
19 Hanai kia tohi e mutolu e lologo nai ma mutolu, mo e fakaako atu ai ke he fanau a Isaraela; kia tuku ke he ha lautolu a tau gutu, ke eke ai e lologo nai mo talahau kia au ke he fanau a Isaraela.
20 Ha ko e mena ka fakahoko atu ai e au a lautolu ke he motu ne omonuo ai e au ke he ha lautolu a tau matua, ko e motu ne tafe ai e puke huhu mo e meli; ti kai ai a lautolu, mo e makona ai, mo e lalahi ai a lautolu; ti hagao atu a lautolu ke he tau atua kehe, mo e fekafekau ai, mo e fakavihia mai a lautolu kia au, mo e holi e lautolu haku maveheaga.
21 Ka hohoko atu foki kia lautolu e tau mena kelea loga mo e tau mena ke mamahi ai; ti eke ai e lologo nai mo talahau kia lautolu aua neke nimo ai ke he tau gutu he ha lautolu a fanau; ka ko e mena iloa ha lautolu a tau manatu kua eke ai e lautolu ke he aho nai, ka kua nakaila fakahoko atu e au a lautolu ke he motu ne omonuo ai e au.
22 Ti tohi e Mose e lologo nai ke he aho ia, mo e fakaako atu ai ke he fanau a Isaraela.
23 Kua poaki atu foki a ia kia Iosua ko e tama a Nuno, kua pehe atu, Kia fakamalolo a koe mo e fakamanavalahi; ha ko e mena fakahoko atu e koe e fanau a Isaraela ke he motu ne omonuo ai e au kia lautolu; to fakalataha ai foki a taua mo koe.
24 Kua oti foki he tohi e Mose, e tau kupu he fakatufono nai ke he tohi, ato katoatoa ai,
25 Ti poaki atu ai e Mose ke he tau tagata Levi, ko lautolu ne tauloto ai e puha he maveheaga a Iehova, kua pehe atu,
26 Kia uta e mutolu e tohi nai he fakatufono, mo e tuku ai ke he fahi he puha he maveheaga a Iehova ha mutolu a Atua, ke ha i ai a ia ke he mena ia ke eke mo talahau kia koe.
27 Ha ko e mena iloa e au hau a fakafualoto, mo e mao he hau a ua; kitiala, kua fakafualoto a mutolu kia Iehova, ka kua moui agaia na au kua fakalataha ai a tautolu ke he aho nai; nakai kia au atu ai he eke pihia ka mate au?
28 Kia fakapotopoto mai e mutolu kia au e tau patu he ha mutolu a tau magafaoa, mo e ha mutolu a tau takitaki, kia vagahau atu e au e tau kupu nai ke fanogonogo ai a lautolu, ke ui age foki e au ke he lagi mo e lalolagi ke eke mo tau talahau kia lautolu.
29 Nukua iloa ni e au ka mole atu haku a mate, to kelea ue atu ha mutolu a mahani, to o kehe foki a mutolu mo e puhala kua poaki atu e au kia mutolu; to hohoko foki kia mutolu e tau mena kelea ke he tau aho a mui; ha kua eke ai e mutolu e tau mena kelea ki mua a Iehova, ke he ha mutolu a fakahogohogomanava kia ia, ke he tau gahua he ha mutolu a tau lima.
30 Ti vagahau atu ai e Mose, ke fanogonogo ai e fakapotopotoaga oti a Isaraela, ke he tau kupu he lologo nai, ato oti ni.