Teutaronome 32:1-52
32 KO e lagi na e, kia fakateliga mai a koe ti vagahau atu ai e au; ko e lalolagi na e, kia fanogonogo mai a koe ke he tau kupu he haku a gutu.
2 To hifo haku a tau kupu fakaako tuga ne uha, to to hifo tuga ne hahau haku a vagahau; ke tuga ne uha ke he vao mui, ke tuga ne tau mana foki ke he motietie;
3 Ha kua ui atu ai au ke he higoa a Iehova; kia tuku atu ā e mutolu e malolo ue atu ke he ha tautolu Atua.
4 Ko e Maka tumau a ia, kua katoatoa ni e mitaki hana gahua; ha kua tonu hana tau puhala oti ni? ko e Atua kua fakamoli, nakai ha ha ia ia ha mahani kelea, ko e mahani tututonu mo e mahani hakohako ni a ia.
5 Kua kelea ni a lautolu, nakai ko e ila he hana fanau ha lautolu a ila; ko e hau ne mahani keukeu mo e fakavai.
6 Kua taui atu pihia kia a mutolu kia Iehova, ko e motu goagoa na e mo e nakai fai iloilo? nakai kia ko e hau a Matua a ia ne fakafua mai ai a koe? nakai kia ko ia ne eke a koe, mo e fakatumau ai a koe?
7 Kia manatu e koe ke he tau aho i tuai; kia manamanatu a koe ke he tau tau he taha hau a mo e taha hau; kia huhu atu a koe ke he hau a tau matua, to tala mai ai e lautolu kia koe; ko e ha mutolu a tau momotua foki, to talahau mai ai e lautolu kia koe.
8 Ka kua tufatufa ai e ia Ne mua ue atu e tau motu kehe, mo e fakamavehevehe ai e ia e fanau a Atamu, ti eke ai e ia e tau katofia he motu, ke lata mo lautolu ne totou ai i Isaraela.
9 Ha ko e tufaaga a Iehova, ko e hana motu haia; ko Iakopo, ko e hana tufaaga kua fafati haia.
10 Ne moua ai e au a ia ke he tutakale, ko e mena toka noa, ne tagi ai e tau manu favale, ko e vao ni, ne agaagai e koe a ia, mo e fakaako atu a ia, ti leveki e ia a ia ke tuga ne alito mata hana.
11 Tuga ne aeto kua fakalelelele hana tau punua, ti kolikoli ai ki luga hana tau punua, kua fofola e ia hana tau tapakau, ti hapohapo e ia a lautolu, ti uta e ia a lautolu ki luga hana tau tapakau;
12 Pihia ni a Iehova ne takitaki e ia tokotaha a ia, ti nakai ha i ai e atua kehe ke tokoua mo ia.
13 Ne fakaheke e ia a ia ke he tau mena tokoluga he lalolagi, kia kai ai e ia e tau fua he fonua; ti fagai e ia a ia ke he meli mai he kaumaka, mo e puke lolo mai he kaumaka uli;
14 Ko e puke huhu tuli he tau povi, mo e puke huhu he tau mamoe, ko e gako foki he tau punua mamoe, mo e tau mamoe tane a Vasana, ko e tau koti tane foki, mo e tau fua saito ne homo he mitaki ti inu foki e ia ke he huhua vine kula nakai fiofio.
15 Ne gako a Iesuruna ti aka ai e ia; kua gako a ia, kua lahi hana tino, kua gako ni; ti tiaki ai e ia e Atua ne eke a ia, mo e fakavihia e ia e Maka tumau he hana fakamouiaga.
16 Ne fakatupu ai e lautolu hana ita tafuā ha ko e tau atua kehe; ti fakahogohogomanava atu a lautolu kia ia ke he ha lautolu a tau mena fakalialia.
17 Ne eke poa ai e lautolu ke he tau temoni, nakai ko e Atua; ko e tau atua nakai iloa e lautolu; ko e tau atua fou, kua kito tutupu, nakai matakutaku ki ai ha mutolu a tau matua.
18 Nakai manatu a koe, ke he maka tumau ne fanau ai a koe, ti nimo ni kia koe e Atua ne eke ai a koe.
19 Ne fioia e Iehova, ti vihiatia e ia a lautolu, ha ko e tau mena fakahogohogomanava he hana tau tama tane, mo e hana tau tama fifine.
20 Ti pehe mai a ia, To ufiufi e au haku a mata ia lautolu, ke kitia ai e au po ke fefe ha lautolu a fakahikuaga; ha ko e hau fakavai ni a lautolu, ko e fanau nakai ha ha i ai ha faka moli.
21 Ne fakatupu ai e lautolu haku a ita tafua ke he tau mena nakai ko e atua; ti fakahogohogomanava mai a lautolu kia au ke he ha lautolu a tau mena fakateaga; ko au foki, to fakatupu ai e au ha lautolu a ita tafua kia lautolu nakai ko e motu; to fakahogohogomanava he motu goagoa kia lautolu.
22 Ha kua tafu ai e afi ke he haku a ita, to huhunu foki ia ke hoko hifo ni ki seoli ki lalo; to fakaoti ai e lalolagi mo e hana tau fua, to huhunu ai foki e tau fakaveaga he tau mouga.
23 To tanaki ai e au e tau mena kelea ki luga ia lautolu; to fakaoti atu foki e au haku a tau fana kia lautolu.
24 To pipili ai a lautolu ke he hoge, to fakaoti ai foki a lautolu ke he gagao vevela, to fakafano atu foki e au e tau manu favale kia lautolu, mo e tau mena kona he tau gata he kelekele.
25 Ko e pelu ki tua he maga, mo e matakutaku ki loto, ke fakaoti ai e tau taulekaleka mo e tau tamafine tote, ko e tau tama mukemuke, mo e tau tagata uluhina.
26 Ne pehe age au, To fakamavehevehe e au a lautolu, to ute kehe e au ha lautolu a fakamanatuaga mai he tau tagata.
27 Aua he matakutaku au ke he ita ha lautolu kua fai fi mai, neke nakai iloa e lautolu ne favale mai kia lautolu, neke pehe age a lautolu, Ko e ha tautolu a lima malolo ka e nakai ko Iehova kua eke ai e tau mena oti nai.
28 Ha ko e motu ni a lautolu nakai ha i ai ha pulega, to nakai fai pulotu foki a lautolu.
29 Ane mai kua iloilo a lautolu, po kua iloa e lautolu a tau mena nai! kia manamanatu ai e lautolu ke he ha lautolu a fakahikuaga.
30 Po ke maeke fefe ke tutuli he tagata tokotaha taha e afe e tagata, mo e tutuli kehe he tokoua, e tau tagata hogofulu e afe, aua he fakafua atu a lautolu he ha lautolu a maka tumau, mo e tuku atu ai e Iehova a lautolu;
31 (Nukua nakai tuga ha tautolu a Maka tumau, ha lautolu a maka tumau, kua pihia foki he talahau mo e fakafili ki ai a lautolu kua fai fi kia tautolu.)
32 Ha ko e vine ha lautolu mai he vine a Sotoma haia, mai he tau uluvine a Komora foki; ko e ha lautolu a tau fua vine ko e tau fua vine kona ia, ti kona ha lautolu a tau fuhi vine;
33 Ko e ha lautolu a uaina ko e mena kona he tau tanimo haia; mo e mena kona lahi he tau asipi.
34 Nakai kia tokai ia au e tau mena nai, mo e fakamau ai fakalataha mo e haku a tau koloa?
35 Kua ha ia au ke lalago, mo e taui atu ke he vaha ke heke ai ha lautolu a tau hui; ha ko e mena tata mai ni e aho ke malaia ai a lautolu, kua alumaki mai foki e tau mena ke hohoko kia lautolu.
36 Ha ko e mena fakafili e Iehova hana motu, to tokihala foki a ia ha ko e hana tau fekafekau, ka kua fioia e ia kua mole atu ha lautolu a malolo, mo e nakai toe ai ha tupa po ke tagata tokanoa.
37 Ti pehe mai a ia, Ko fe kia ha lautolu a tau atua, ko e maka tumau ne tua a lautolu ki ai,
38 Ko lautolu ne kai e gako he ha lautolu a tau poa, ti inu ai e uaina he ha lautolu a tau poa inu? kia tutu mai a lautolu mo e lagomatai kia mutolu, kia eke a lautolu mo fakamumuliaga ma mutolu;
39 Hanai, kia iloa ai e mutolu ko au, ko au ni a ia, nakai ha i ai foki e atua ke tokoua aki au; kua kelipopo e au, mo e fakamoui ai ni, kua ta e au mo e fakamalolo ai e au; nakai ha i ai foki taha ke laveaki mai ai he haku a lima.
40 Ha kua nikiti e au haku a lima ke he lagi, mo e pehe age au, Kua moui tukulagi ni au.
41 Kaeke ke fakamata e au haku a pelu kikila, mo e toto ai e fakafiliaga ke he haku lima, to lalago atu ai e au kia lautolu kua fai fi mai kia au, mo e taui atu kia lautolu kua fakavihia mai kia au.
42 To fakainu e au haku a tau fana ke konahia ke he toto, to kai foki haku pelu e tau tino he tau tagata; ko e toto ha lautolu kua kelipopo ai, mo lautolu ne fofo he tau, ko e tau iki ne mua ia lautolu ne fai fi mai.
43 Ko e tau motu kehe na e, kia fiafia a mutolu fakalataha mo e hana motu; ha kua lalago e ia e toto he hana tau fekafekau, ti age foki e ia e taui kia lautolu kua fai fi kia ia; to lukutoto foki e ia hana kelekele, mo e hana motu.
44 Kua fina atu a Mose, mo e vagahau atu ai ke he tau kupu oti he lologo na ke logona ai he motu ko laua mo Iosua ko e tama a Nuno.
45 Kua oti foki he vagahau atu e Mose e tau kupu oti na kia Isaraela oti ni;
46 Ti pehe atu a ia kia lautolu, Kia tokaloto ai e mutolu e tau kupu oti kua fakamatala atu ai e au kia mutolu ke he aho nai; ti poaki atu ai ke he ha mutolu a fanau, kia taofi ai e lautolu ke eke ai e tau kupu oti he fakatufono na.
47 Ha ko e mena nakai ko e kupu fakateaga ia kia mutolu, nukua ha i ai ha mutolu a moui; ko e tau mena ia foki ke fakaloga ai ha mutolu a tau aho ke he motu, kua o atu a mutolu ke he fahi atu a Ioritana ke eke ai ma mutolu.
48 Kua vagahau mai foki a Iehova kia Mose ke he aho ia ni kua pehe mai,
49 Kia hake a koe ke he mouga na ko Aperima ko e mouga ko Nepo, ha ha he motu ko Moapi, kua fehagai mo Ieriko; mo e kitekite a koe ke he motu ko Kanana kua foaki atu ai e au ke he fanau a Isaraela ke eke ma lautolu.
50 To mate ai foki a koe ke he mouga ke hake a koe ki ai, to fakalataha atu foki a koe mo e hau a faoa, tuga ne mate a Arona hau a matakainaga ke he mouga ko Horo ti fakalataha atu a ia mo e hana faoa;
51 Ha ko e mena hala a mua kia au ki mua he fanau a Isaraela ke he vai ko Meripa-katesa, ke he tukakale ko Tisina; nukua nakai fakatapu ai e mua au ki mua he fanau a Isaraela.
52 To kitekite a koe ke he motu ha i mua hau, ka e nakai hoko atu a koe ke he motu kua foaki atu ai e au ke he fanau a Isaraela.