Teutaronome 33:1-29
33 KO e monuina hanai ne fakamonuina atu ai he tagata he Atua, ko Mose, ke he fanau a Isaraela, ka e nakaila mate a ia.
2 Kua pehe atu a ia, Ne haele mai a Iehova i Sinai, ti haele hake a ia i Seira kia lautolu; ne kikila mai a ia mai he mouga ko Parana, ti haele mai a ia mai he tau tagata tapu ne hogofulu e afe; mai hana lima matau e afi he fakatufono ma lautolu.
3 Ko e moli, kua fakaalofa a ia ke he motu; ha he lima hau hana tau tagata tapu oti ni; kua nonofo a lautolu ke he hau a tau ve; ti talia e lautolu hau a tau kupu.
4 Ne tuku mai e Mose e fakatufono kia tautolu, ko e tufaaga haia ma e fakapotopotoaga a Iakopo.
5 Ne eke foki a ia mo patuiki i Iesuruna, ka kua fakapotopoto ai e tau iki he motu katoa mo e tau magafaoa a Isaraela.
6 Kia moui ai a Reupena, aua neke mate a ia; aua foki neke tokogaogao hana tau tagata.
7 Ko e kupu hanai kia Iuta; ne pehe age a ia, Iehova na e, fanogonogo mai a ke he leo a Iuta, mo e ta mai e koe a ia ke he hana motu; kia lima malolo a ia; ti eke a koe mo lagomatai kia ia ia lautolu kua fai fi kia ia.
8 Ti pehe age a ia kia Levi, Kia ha i ai hau a Tumima mo e hau a Urima ke he hau a tau tagata tapu ne kamatamata ai e koe i Masa, ti fetoko atu a koe kia ia ke he vai ko Meripa;
9 Ko ia ne pehe age ke he hana matua tane mo e hana matua fifine, Nakai kitia e au a ia; nakai iloa foki e ia hana tau matakainaga, ti nakai iloa foki e ia hana fanau; nukua omaoma a lautolu ke he hau a vagahau, kua taofi foki e lautolu hau a maveheaga.
10 To fakakite atu e lautolu hau a tau fakafiliaga kia Iakopo, mo e hau a tau fakatufono kia Isaraela; to tuku atu e lautolu ki mua hau e tau mena manogi, mo e tau poa huhunu oti ke he hau a fatapoa.
11 Iehova na e, kia fakamonuina e koe hana tau koloa, mo e fiafia ke he gahua he hana tau lima; kia ta e koe ke he tau tokupu ha lautolu a lautolu ke tutu mai kia ia, mo lautolu ne fakavihia a ia, neke liu foki tutu mai a lautolu.
12 Ti pehe age a ia kia Peniamina, Ko ia kua fakahelehele e Iehova to nofo ai a ia fakalataha mo ia mo e nakai haofia; to fakamalu e ia a ia ke he aho katoa; to nofo foki a ia ke he hana vahega tua.
13 Ti pehe age a ia kia Iosefa, Kia fakamonuina e Iehova hana kelekele ke he tau mena mitaki ue atu mai he lagi, ko e hahau, mo e tau mena mitaki mai he tau mena hokulo ha i lalo;
14 Mo e tau mena mitaki ue atu ne tutupu mai he la, mo e tau mena mitaki ue atu ne tutupu mai he tau mahina;
15 Mo e tau mena mitaki ue atu he tau mouga i tuai tigahau, mo e tau mena mitaki ue atu he tau matiketike tukulagi,
16 Mo e tau mena mitaki ue atu he kelekele mo e tau mena oti kua puke ai, mo e finagalo fakaalofa hana ne nofo ke he akau talatala, kia hoko ia ki luga he ulu a Iosefa; mo e tumuaki ulu hana ne vevehe kehe mo e hana tau matakainaga.
17 Ko e hana fulufuluola ko e punua uluaki he hana povi ia; ko e hana tau hoe ko e tau hoe he rema haia; ti tulei atu ai e ia ke he tau motu oti ke hoko ke he tau kala he lalolagi; ko e tau tagata afe mo afe ia a Efaraimo, ko e tau afe foki ia a Manase.
18 Ti pehe age a ia kia Sepulona, Sepulona na e, kia fiafia a koe ke he hau a fina atu; mo koe foki ma Isakara na e, kia olioli a koe ki loto hau a tau fale ie.
19 To ui e laua ke he tau motu ke o mai ke he mouga; ti eke ai e lautolu e tau poa kua lata; ha ko e mena moua mai e laua e koloa lahi mai he tahi, mo e koloa kua tanu ke he oneone.
20 Ti pehe age a ia kia Kato, kia monuina a ia kua fakalaulahi ai a Kato, Kua takoto a ia tuga ne leona, kua hēhē foki e ia e lima katoa mo e tumuaki ulu.
21 Ti hagao atu a ia ke he mena ne mua māna, nukua fakamau ai ke he mena ia e tufaaga ke he takitaki; ti o a lautolu; ko ia mo e tau iki he motu; ti eke ai e ia e tau mena tonu mai ia Iehova, mo e hana fakafiliaga fakalataha mo Isaraela.
22 Ti pehe age a ia kia Tano, Ko Tano ko e punua leona a ia, to oho mai a ia i Vasana.
23 Ti pehe age a ia kia Nafatali, Nafatali na e, kua ofania lahi a koe ti puke ai foki a koe ke he monuina mai ia Iehova; kia eke e koe māu e tahi mo e fahi toga.
24 Ti pehe age a ia kia Asera, Kia monuina a Asera ke he hana fanau, kia fiafia hana tau matakainaga kia ia; kia fufui foki e ia hana hui ke he puke lolo.
25 Ko e hau a tau fakamau ko e lapatoa mo e apa kula ia; ke tuga hau a tau aho foki to pihia hau a malolo.
26 Nakai ni ha i ai taha ke tuga ne Atua a Iesuruna kua heke e ia e lagi ke eke mo lagomatai hau, kua heke foki e ia e tau aolagi ke he hana lilifu.
27 Kua eke e Atua mo mena ke nofo ai a koe tali mai i tuai tigahau; ha i lalo hau foki e tau lima tukulagi; to vega foki e ia ki mua hau a lautolu kua fai fi kia koe: ti pehe mai a ia, Kia fakaotioti e koe a lautolu.
28 To nofo tokotaha a Isaraela mo e nakai haofia; ko e vaipuna a Iakopo to ha i ai ia ke he motu he tau saito mo e uaina; ko e hana lagi foki ke to hifo ai e hahau.
29 Isaraela na e, kia monuina a koe! ko hai kia e motu ke tuga na koe? ko e motu kua fakamoui e Iehova? ko ia ko e akau punuti ke lagomatai kia koe, ko ia foki ko e pelu ke lilifu ai a koe! to fakatokolalo fakatupua kia koe a lautolu kua fai fi kia koe, to holi foki e koe ha lautolu a tau mena tokoluga.