Teutaronome 34:1-12
34 TI hake a Mose mai he kelekele tatai a Moapi ke he mouga ko Nepo, ke he tapunu he mouga ko Peseka, ne fehagai mo Ieriko. Ti fakakite atu ai e Iehova kia ia e motu oti ko Kiliata ke hoko ni ki Tano.
2 Ko Nafatali oti foki, mo e motu a Efaraimo, mo Manase, mo e motu oti a Iuta, ke hoko atu ni ke he tahi ke he fahi lalo,
3 Mo e fahi toga, mo e kelekele tatai he pahua a Ieriko, ko e maga he tau akau ko e tau pama, ke hoko atu ki Soara.
4 Kua pehe mai foki a Iehova kia ia, Ko e motu hanā ne omonuo, ai e au kia Aperahamo, mo Isaako, mo Iakopo, kua pehe atu, Kua foaki atu ai e au ke he hau a fanau; kua fakakite atu e au kia koe, ke kitekite ai hau a tau mata, ka e nakai fina atu a koe ki ai.
5 Ti mate ai a Mose ko e fekafekau a Iehova ke he mena ia, ke he motu ko Moapi, ke lata ai mo e kupu a Iehova.
6 Ti tanu ai e ia ke he pahua ke he motu ko Moapi, ne fehagai mo Petepeoro, ka e nakai iloa he taha tagata hana tukuaga ke hoko mai ni ke he aho nai.
7 Ne taha e teau ti uafulu e tau tau a Mose to mate ai a ia; nakai pouli hana tau fofoga to nakai mole atu foki hana malolo.
8 Ti tagi ai e fanau a Isaraela kia Mose ke he kelekele tatai a Moapi ke he tau aho ne tolugofulu; ti katoatoa ai e tau aho ne tagi mo e tagi aue ai a lautolu kia Mose.
9 Kua puke foki a Iosua ko e tama a Nuno ke he agaga ke iloilo ai; ha kua fakalago atu e Mose hana tau lima ki luga ia ia; ne fanogonogo foki e fanau Isaraela kia ia, mo e eke ai e lautolu tuga ne poaki mai ai e Iehova kia Mose.
10 Kua nakai tu mai foki ha perofeta i Isaraela ke tuga na Mose, ne fehagaoaki a laua mo Iehova;
11 Ke tuga na ia ke he tau fakamailoga oti mo e tau mana, ne fekau atu ai e Iehova a ia ke eke ke he motu ko Aikupito kia Farao, mo e hana tau fekafekau oti, katoa mo e hana motu oti ni,
12 Mo e lima malolo oti, katoa mo e tau mena oti ke matakutaku lahi ai ne eke ai e Mose ki mua a Isaraela oti ni.