Teutaronome 4:1-49
4 HANAI, Isaraela na e, kia fanogonogo mai ke he tau fakatufono mo e tau fakafiliaga kua fakaako atu ai e au a mutolu ke eke ai a mutolu, kia momoui ai a mutolu, ti o atu ai a mutolu, mo e eke ma mutolu e motu kua foaki atu ai e Iehova ko e Atua he ha mutolu a tau matua kia mutolu.
2 Aua neke lafilafi atu e mutolu ha kupu ke he tau kupu kua poaki atu ai e au kia mutolu aua foki neke uta kehe ai e mutolu ha kupu; kia omaoma a mutolu ke he tau poakiaga a Iehova ha mutolu a Atua kua poaki atu ai e au kia mutolu.
3 Ne kitia he tau mata ha mutolu e tau mena ne eke ai e Iehova ha ko Paalapeoro, ha ko lautolu oti ne mumui atu kia Paalapeoro ne fakaotioti ai e Iehova hau a Atua a lautolu mai ia koe.
4 Ka ko mutolu ne pipiki atu kia Iehova ha mutulu a Atua, kua momoui ai a mutolu oti ke hoko mai ke he aho nai.
5 Kitiala, kua fakaako atu e au a mutolu ke he tau fakatufono mo e tau fakafiliaga tuga ne poaki mai ai e Iehova haku a Atua kia au, kia eke pihia e mutolu ke he motu ke o atu a mutolu ki ai ke eke ma mutolu.
6 Hanai, kia omaoma a mutolu ki ai, mo e eke ai e mutolu, ha ko e mena ia kua iloilo ai a mutolu, mo e pulotu ai a mutolu ki mua he tau motu ke logona ai e tau fakatufono oti nai; ti pehe age a lautolu, Ko e moli ni ko e motu iloilo, mo e pulotu e motu lahi na.
7 Ha ko fe kia ha motu lahi kua tata ki ai ha lautolu a tau atua, ke tuga a Iehova ha tautolu a Atua kua tata mai ke he tau mena oti ni ke ui atu ai a tautolu kia ia.
8 Ko fe foki ha motu ne ha i ai e tau fakatufono mo e tau fakafiliaga tonu, tuga ne tau fakatufono oti kua tuku atu e au kia mutolu ke he aho nai?
9 Kia fakaeneene hokoia a koe kia koe; mo e fakaeneene fakalahi ni kia koe, neke nimo ia koe e tau mena ne kitia ai ke he hau a tau mata, neke o kehe ai hau a loto ke he tau aho oti he hau a moui, ka kia fakailoa atu e koe ia ke he hau a fanau, mo e fanau he hau a fanau;
10 Kia fakailoa atu e aho ne tu ai a koe ki mua a Iehova hau a Atua i Horepa, ne pehe mai ai a Iehova kia au, Kia fakapotopoto mai e koe e motu kia au, kia fanogonogo mai a lautolu ke he haku a tau kupu, kia ako ai a lautolu, kia matakutaku mai a lautolu kia au ke he tau aho oti ke momoui ai a lautolu ke he fuga kelekele, mo e fakaako atu ai e lautolu ke he ha lautolu a fanau.
11 Ti fakatata atu ai a mutolu mo e tutu ki lalo he mouga, ne vela foki e mouga ke he afi, kua hoko ni ke he lagi; ha i ai foki e pouli, mo e tau aolagi, mo e pouli kikio.
12 Ti vagahau mai a Iehova kia mutolu mai loto he afi, ne logona e mutolu hana leo ka e nakai kitia e mutolu ha mena fakatai, ko e leo ni hokoia.
13 Ti tala mai ai e Iehova kia mutolu hana maveheaga, ne poaki mai e ia kia mutolu ke eke, ko e tau kupu haia ne hogofulu; ti tohi ai e ia a lautolu ke he na lapa make ne ua.
14 Ti poaki mai ai e Iehova kia au ke he vaha ia, ke fakaako atu au a mutolu ke he tau fakatufono, mo e tau fakafiliaga ke eke ai e mutolu ke he motu ke o atu ki ai a mutolu ke eke ma mutolu.
15 Hanai, kia fakaeneene fakalahi a mutolu kia mutolu, he nakai ni kitia e mutolu ha mena fakatai ke he aho ne vagahau ai a Iehova kia mutolu i Horepa mai loto he afi.
16 Neke kelea ai a mutolu kia mutolu, mo e eke ai e mutolu ma mutolu ha tupua kua ta, ko e fakatai ke he taha tupua, ko e fakatino he tane, po ke fifine;
17 Ko e fakatino he taha manu ha ha he fonua; ko e fakatino he taha manu lele kua lele ke he pulagi likoliko,
18 Ko e fakatino he taha mena kua totolo ke he kelekele, po ke fakatino he taha ika ha he tahi ki lalo he kelekele;
19 Neke haga hake a koe hau a tau mata ke he lagi, mo e kitia ai e koe e la, mo e mahina, mo e tau fetu, ko e kau oti he lagi neke tauakina a koe, ke fekaveli fakafohifo ki ai, mo e fekafekau ki ai, ko e tau mena ia ne kotofa mai e Iehova hau a Atua ke he tau motu oti he lalolagi,
20 Ha ko e mena uta e Iehova a mutolu, mo e ta mai a mutolu he gutuumu ne tunu ai e lapatoa, mo motu ke eke mo tufaaga mana, tuga ne eke ai ke he aho nai.
21 Ti ita mai foki a Iehova kia au ha ko e ha mutolu a tau kupu, ti omonuo ai a ia nakai fano ai au ke he fahi atu a Ioritana, to nakai fina atu foki au ke he motu mitaki, kua foaki atu kia koe e Iehova hau a Atua ke eke mo tufaaga mau,
22 Ha ko e mena mate ai au ke he motu nai, nakai fano au ke he fahi atu a Ioritana, ka ko mutolu, to o atu a mutolu, mo e eke ma mutolu e motu mitaki na.
23 A mutolu ni, neke nimo kia mutolu e maveheaga a Iehova ha mutolu a Atua ne eke e ia mo mutolu, ti eke ai e mutolu ma mutolu e tupua kua ta, ko e fakatai ni he taha mena ne fono mai ai e Iehova hau a Atua.
24 Ha ko Iehova hau a Atua ko e afi puhopuho a ia, ko e Atua ita tafua a ia.
25 Ka moua ai e koe e fanau, mo e fanau he hau a fanau ka leva foki ha mutolu a nonofo ke he motu, ka kelea ai a mutolu kia mutolu, ka eke ai foki e mutolu e tupua kua ta, ko e fakatai he taha mena, ti eke ai e tau mena kelea ki mua a Iehova hau a Atua, ke fakahukia e mutolu a ia,
26 Kua ui atu e au ke he aho nai ke he lagi, mo e lalolagi, ke eke mo tau fakamoli kia mutolu, to mahaikava vave ni a mutolu mai he motu kua o atu ai a mutolu ke he fahi atu a Ioritana ke eke ma mutolu, nakai loga ha mutolu a tau aho ke nonofo ai, ka to fakaotioti ai a mutolu.
27 Ti fakamavehevehe e Iehova a mutolu ke he tau motu kehe, ti toe tokogaogao ai a mutolu ke he tau motu ke takitaki age e Iehova a mutolu ki ai.
28 Ti fekafekau ai a mutolu ke he tau atua ne eke ai he tau lima he tau tagata, ko e tau akau mo e tau maka, nakai kitia e lautolu, to nakai fanogonogo a lautolu, to nakai kai a lautolu, to nakai hohogi foki a lautolu,
29 Kaeke foki ke kumi e koe ke he mena ia kia Iehova hau a Atua, ti moua ai e koe a ia, kaeke ke kumi e koe a ia mo e hau a loto katoa mo e hau a agaga katoa.
30 Ka hoko kia koe e matematekelea, ka moua foki e koe e tau mena oti na ke he tau aho a mui, kaeke foki ke liu atu a koe kia Iehova hau a Atua, mo e fanogonogo a koe ke he hana leo,
31 (Ha ko Iehova hau a Atua, ko e Atua fakaalofa a ia), nakai tiaki e ia a koe, ti nakai fakaotioti ai e ia a koe, ti nakai nimo foki kia ia e maveheaga mo e hau a tau matua, ne omonuo ai a ia kia lautolu,
32 Ha ko e mena kumi la e koe ke he tau aho ne aho mua ne mumua kia koe, tali he eke ai he Atua ke he lalolagi; kia kumi foki e koe, ke kamata mai he taha fahi he lagi, ti hoko atu ke he taha fahi he lagi, po ke ha i ai nakai ha mena, tuga ne mena lahi nai, po ke logona ai nakai e taha ha mena ke tatai mo e mena nai?
33 Po ke motu fe kua logona e leo he Atua kua vagahau mai mai loto he afi, tuga ne logona ai e koe ka e moui agaia ni.
34 Po ke taute kia he Atua ke fina atu, mo e uta māna taha motu mai he taha motu, ke he tau mena kamatamata, mo e tau fakamailoga, mo e tau mana, mo e tau, mo e lima malolo, mo e lima fakaolo, katoa mo e tau mena ke matakutaku lahi ai, tuga ne tau mena oti ne eke ai e Iehova ha mutolu a Atua ma mutolu i Aikupito ki mua ha mutolu?
35 Kua fakakite atu kia koe kia iloa ai e koe, ko Iehova ko e Atua ni a ia, to nakai ha i ai taha ka ko ia ni.
36 Kua hoko mai hana leo mai he lagi ke logona ai e koe, ke fakaako mai ai e ia a koe, ti fakakite mai e ia kia koe hana afi lahi ke he lalolagi, ti logona ai e koe hana tau kupu mai loto he afi.
37 Ne fakaalofa a ia ke he hau a tau matua, ko e mena ia ne fifili ai e ia ha lautolu a fanau, ke mumui atu ai kia lautolu, ti ta mai ai e ia a koe ki mua hana ke he hana mana lahi i Aikupito;
38 Kia vega ai ki mua hau e tau motu ne mua kia koe he malolo mo e tokologa kia fakahoko atu a koe ki ai, ke tuku atu foki ha lautolu a kelekele ke eke mo tufaaga mau, tuga ne eke ai ke he aho nai.
39 Kia iloa foki e koe ke he aho nai, mo e fakamau ai ke he hau a loto, ko Iehova ko e Atua ni a ia ke he lagi i luga, katoa mo e lalolagi nai, ti nakai ha i ai taha.
40 Ko e hanai, kia omaoma a koe ke he hana tau fakatufono mo e hana tau poakiaga kua poaki atu ai au kia koe ke he aho nai, kia monuina a koe mo e hau a fanau ke mumui atu kia koe, kia loga ai ha mutolu a tau aho ke he motu kua foaki mai e Iehova hau a Atua kia koe ke he tau aho oti.
41 Ti vevehe kehe ai e Mose e tau maga ne tolu ke he fahi mai nai a Ioritana ke he mena ne hake ai e la;
42 Kia hola ki ai a ia kua kelipopo e tagata, ko ia kua kelipopo e tagata ne katofia mo ia mo a nakai iloa, to nakai fai fi tuai kia ia, ka hola a ia ke he taha maga he tau maga ia, to moui ai a ia.
43 Ko e tau maga ia, ko Peteri ke he tutakale ke he kelekele tatai, he tau tagata Reupena; mo Ramota i Kiliata, he tau tagata Kato; mo Kolani i Vasana, he tau tagata Manase.
44 Ko e fakatufono hanai ne tuku atu ai e Mose ke he fanau a Isaraela;
45 Ko e tau talahau, mo e tau fakatufono, mo e tau fakafiliaga hanai ne vagahau atu ai e Mose ke he fanau a Isaraela he o mai ai a lautolu i Aikupito,
46 Ke he fahi mai nai a Ioritana ke he pahua ne fehagai mo Petepeoro, ke he motu a Sikono ko e patuiki he tau tagata Amori, ne nofo i Hesepona, ko ia ne keli e Mose mo e fanau a Isaraela he o mai ai a lautolu i Aikupito.
47 Ti eke e lautolu ma lautolu hana motu, mo e motu a Oko ko e patuiki i Vasana ko e tau patuiki ne tokoua he tau tagata Amori ke he fahi mai nai a Ioritana ke he mena ne hake ai e la;
48 Ke liu mai i Aroeru ke he kauvai he vailele ko Aranona, ke hoko atu ke he mouga ko Siona, ko Heremoni haia;
49 Mo e kelekele tatai oti ke he fahi mai nai a Ioritana ke he fahi uta, ko hoko ni ke he tahi ha he kelekele tatai ki lalo a Asetotapeseka.