Teutaronome 6:1-25
6 KO e tau poakiaga ia ko e tau fakatufono, mo e tau fakafiliaga ne poaki mai e Iehova ha mutolu a Atua ke fakaako atu kia mutolu, kia eke ai e mutolu ke he motu ke o atu a mutolu ki ai ke eke ma mutolu;
2 Kia matakutaku a koe kia Iehova hau a Atua, ke omaoma ai a koe ke he hana tau fakatufono oti, mo e hana tau poaki ne poaki atu ai au kia koe, ko koe, mo e hau a tama tane, mo e tama tane he hau a tama tane ke he tau aho oti he hau a moui, kia loga ai hau a tau aho.
3 Hanai, ma Isaraela na e, kia fanogonogo mai, mo e omaoma ki ai ke eke ai, kia monuina ai a koe, mo e fakatokologa fakalahi ai a mutolu, tuga ne vagahau mai kia koe e Iehova ko e Atua he hau a tau matua, ke he motu kua tafe ai e puke huhu mo e meli.
4 Isaraela na e, fanogonogo mai a, ko Iehova ko e ha tautolu a Atua, ko Iehova ne tokotaha ni a ia.
5 Kia fakaalofa a koe kia Iehova hau a Atua mo e hau a loto katoa, mo e hau a agaga katoa, mo e hau a malolo katoa.
6 Kia ha i ai foki ke he hau a loto e tau kupu nai kua poaki atu ai e au kia koe ke he aho nai.
7 Kia fakaako atu mau ia ke he hau a fanau, mo e vagahau ki ai, ka nofo a koe ke he hau a fale, ti pihia foki ka fano a koe ke he puhala, ti pihia foki ka takoto a koe, ti pihia foki ka matike ai a koe.
8 Ti pipi e koe ia ke he hau a lima mo fakamailoga, ti eke ai foki mo fou pāpā ke he vaha he hau a tau mata.
9 Ti tohi ai foki e koe ke he tau pou he hau a fale, katoa foki mo e hau a tau gutuhala.
10 Ka fakahoko atu foki e Iehova hau a Atua a koe ke he motu ne omonuo ai a ia ke he hau a tau matua, ko Aperahamo, ko Isaako, mo Iakopo, ke foaki atu ai kia koe, ko e tau maga lalahi mo e mitaki nakai ati ai e koe.
11 Ko e tau fale foki kua puke ke he tau mena mitaki oti nakai fakapuke ai e koe; ko e tau vaikeli foki nakai keli ai e koe, ko e tau ulu vine mo e tau olive nakai to e koe; ka kai ai e koe mo e makona ai;
12 A koe, neke nimo kia koe a Iehova ne ta mai ai a koe he motu ko Aikupito, ko e mena ne nofo fakatupa ai a koe.
13 Kia matakutaku a koe kia Iehova hau a Atua, mo e fekafekau a koe kia ia; ko e hana higoa foki ke omonuo ai a koe.
14 Aua neke mumui atu a mutolu ke he tau atua kehe, ko e tau atua he tau motu ne agaagai mai kia mutolu.
15 (Ha ko Iehova hau a Atua ha ha ia koe, ko e Atua ita tafua a ia,) neke tupu ai e ita a Iehova hau a Atua kia koe, ti fakaotioti ai e ia a koe mai he fuga kelekele.
16 Aua neke kamatamata e mutolu a Iehova ha mutolu a Atua, tuga ne kamatamata e mutolu a ia i Masa.
17 Kia omaoma a mutolu ke he tau poaki a Iehova ha mutolu a Atua, mo e hana tau talahau, mo e hana tau fakatufono, ne poaki mai ai e ia kia koe.
18 Ti eke e koe e mahani kua tonu, mo e mitaki ki mua a Iehova, kia monuina ai a koe mo e hoko atu a koe mo e eke māu e motu mitaki ne omonuo ai a Iehova ke he hau a tau matua,
19 Kia vega kehe e ia hau a tau fi oti ki mua hau, tuga ne vagahau mai ai a Iehova,
20 Ka huhu mai e tama hau kia koe a taha aho, kua pehe mai, Ko e heigoa kia e tau talahau, mo e tau fakatufono, mo e tau fakafiliaga ne poaki mai ai e Iehova ha tautolu a Atua kia mutolu?
21 Ti pehe atu a koe ke he hau a tama, Ne eke ai a mautolu mo tau fekafekau a Farao i Aikupito, ka kua ta mai ai e Iehova a mautolu i Aikupito mo e lima malolo;
22 Ne tuku atu foki e Iehova e tau fakamailoga, mo e tau mana lalahi ne kelea ai a Aikupito, mo Farao, katoa mo e hana tau magafaoa oti, ki mua ha mautolu,
23 Ne ta mai foki e ia a tautolu he mena ia, kia fakahoko mai ai a tautolu, kia foaki mai kia tautolu e motu ne omonuo ai a ia ke he ha tautolu a tau matua.
24 Ti poaki mai e Iehova kia eke ai e tautolu e tau fakatufono oti ia ni, kia matakutaku a tautolu kia Iehova ha tautolu a Atua, kia monuina ai a tautolu ke he tau aho oti kia faka momoui ai e ia kia tautolu oti tuga he aho nai.
25 To eke foki ia mo tututonu kia tautolu, kaeke ke omaoma a tautolu ke eke ai e tau poaki oti ki mua a Iehova ha tautolu a Atua, tuga ne poaki mai e ia kia tautolu.