Teutaronome 7:1-26
7 KA fakahoko atu e Iehova hau a Atua a koe ke he motu ke fano a koe ki ai ke eke māu, ka vega ai foki e ia e tau motu loga ki mua hau, ko e faoa Heti, mo e faoa Kirekasi, mo e faoa Amori, mo e faoa Kanana, mo e faoa Perisi, mo e faoa Hivi, katoa mo e faoa Iepusu, fitu ni e motu ne mua kia koe he tokologa mo e malolo.
2 Ka tuku mai ai e Iehova hau a Atua a lautolu kia koe, ti kelipopo e koe a lautolu, ti fakaotioti ni e koe a lautolu, ua eke e koe ha maveheaga mo lautolu, ti aua neke fakaalofa atu a koe kia lautolu,
3 Aua neke fakafetauaki a mutolu mo lautolu, aua neke ta age hau a tama fifine ma e hana tama tane, aua foki neke ta mai hana tama fifine mo e hau a tama tane;
4 Ha ko e mena uhu kehe ai e ia hau a tama tane ke ua mui mai a ia kia au, ka e fekafekau ai ke he tau atua kehe; ti tupu ai e ita a Iehova kia mutolu, ti fakaotioti vave ai a koe.
5 Ka kia eke pehe e mutolu kia lautolu, kia moumou e mutolu ha lautolu a tau fatapoa, ti lipilipi ha lautolu a tau tupua, mo e hio ki lalo ha lautolu a tau tupua Asaira, ti huhunu ai foki ke he afi ha lautolu a tau tupua kua ta;
6 Ha ko e motu tapu a koe ma Iehova hau a Atua ne fifili ai e Iehova hau a Atua a koe ke eke mo motu mana, ko e koloa uho ni ke mua ke he tau motu oti ha he fuga kelekele.
7 Nakai manako a Iehova kia mutolu mo e fifili ai a mutolu ha kua mua a mutolu ke he tau motu he tokologa; ha ko e mena mua he tokogaogao a mutolu ke he tau motu oti kana;
8 Ka ko e fakaalofa ni a Iehova kia mutolu, mo e hana taofi foki ke he omonuo ne omonuo ai a ia ke he ha mutolu a tau matua, kua ta mai ai e Iehova a mutolu mo e lima malolo, ne laveaki foki e ia a koe mai he lima a Farao ko e patuiki a Aikupito, ne nofo fakatupa ai a koe.
9 Kia iloa ai e koe ko Iehova hau a Atua ko e Atua ni a ia, ko e Atua kua fakamoli, kua taofi e ia e maveheaga katoa mo e fakaalofa mo lautolu kua fakaalofa atu kia ia mo e omaoma ke he hana tau poaki, ke hoko ni ke he tau hau ne taha e afe;
10 Ka e taui atu e ia kia lautolu ne fakavihia a ia, ki mua ni ha lautolu, kia fakaotioti a lautolu; nakai mule a ia ke taui atu kia ia kua fakavihia a ia ki mua hana.
11 Ko e hanai kia omaoma a koe ke he tau poaki, mo e tau fakatufono, mo e tau fakafiliaga kua poaki atu ai au kia koe ke he aho nai ke eke ai.
12 Kaeke foki ke fanogonogo a mutolu ke he tau fakafiliaga ia mo e taofi ke eke ai, ti taofi ai e Iehova hau a Atua e maveheaga mo e fakaalofa kia koe ne omonuo ai a ia ke he hau a tau matua;
13 Ti fakaalofa mai a ia kia koe, mo e fakamonuina e ia a koe, mo e fakatokologa ai e ia a koe; ti fakamounina foki e ia hau a fanau, mo e tau fua he hau a kelekele, ko e hau a tau fua saito, mo e hau a uaina, mo e hau a puke lolo, ko e tau punua ne fanau ai hau a tau povi, mo e hau a tau fuifui mamoe ke he kelekele ne omonuo ai au ke he hau a tau matua ke poaki kia koe.
14 Ti mua hau a monuina ke he tau motu oti kana; nakai ha ia koe ha tane, po ke fifine kua tufua ti pihia mo e hau a tau manu.
15 To tuku kehe foki e Iehova ia koe e tau gagao oti, ti nakai tuku mai e ia kia koe ha gagao taha he tau gagao kelea a Aikupito ne iloa e koe, ka e tuku atu ia kia lautolu oti ne fakavihia a koe.
16 Kia fakaotioti e koe e tau motu oti ni ke tuku mai e Iehova hau a Atua kia koe; aua neke fakaalofa a koe kia lautolu, aua neke fekafekau foki a koe ke he ha lautolu a tau atua; neke eke ai e mena ia mo matahele kia koe.
17 Kaeke ke pehe a koe ke he hau a loto, Kua mua he tokologa e tau motu ia kia au, ke maeke fefe e au ke vega kehe a lautolu?
18 Aua neke matakutaku a koe kia lautolu; kia manamanatu la a koe ke he tau mena ne eke ai e Iehova hau a Atua kia Farao mo Aikupito oti ni;
19 Ko e tau mena kamatamata lalahi ne kitekite ki ai hau a tau mata, mo e tau fakamailoga, mo e tau mana, mo e lima malolo, mo e lima fakaolo ne ta mai ai e Iehova hau a Atua a koe; to eke pihia ni e Iehova hau a Atua ke he tau motu oti kana ne matakutaku ai a koe.
20 To fakafano age foki e Iehova hau a Atua e lago siraga kia lautolu, ato fakaotioti ai a lautolu ne toe, mo e fakamumuli mai mua hau.
21 Aua neke matakutaku a koe kia lautolu, ha kua ha ia koe a Iehova hau a Atua, ko e Atua lilifu a ia mo e matakutakuina.
22 To vega fakagahoa mo e fakagahoa fakamatafeiga e Iehova hau a Atua e tau motu ia mai mua hau, nakai fakaotioti fakatepetepe e ia a lautolu, neke tupu loga ai e tau manu favale ke kai a koe.
23 Ka e tuku mai ai e Iehova hau a Atua a lautolu ki mua hau, mo e fakaotioti e ia a lautolu ke he malaia lahi, ato fakaotioti ai ni a lautolu.
24 Ti tuku mai foki e ia ha lautolu a tau patuiki ke he hau a lima, ti tamate ai foki ha lautolu a tau higoa ke he lalolagi; nakai ni tu mai ha tagata ke totoko atu kia koe ato fakaotioti ai e koe a lautolu.
25 Ko e tau tupua ne ta he ha lautolu a tau atua kia huhunu ai e mutolu ke he afi; aua neke manako a koe ke he ario mo e auro ha i ai, ti ua uta ai e koe māu, neke tauhele ai a koe; ha ko e mena ia kua vihiatia lahi e Iehova hau a Atua.
26 Aua neke uta e koe ke he hau a fale e mena vihiatia, neke eke a koe mo mena tuga ne mena ia kia fakalialia a koe ki ai, mo e fakavihia fakalahi ki ai a koe, ha ko e mena kua tuku mai kia au haia.