Teutaronome 8:1-20
8 KO e tau poakiaga oti kua poaki atu ai au kia mutolu ke he aho nai kia omaoma a mutolu ki ai mo e eke ai e mutolu, kia momoui ai a mutolu, mo e tolotologa ai, mo e o atu a mutolu mo e eke ma mutolu e motu ne omonuo ai e Iehova ke he ha mutolu a tau matua.
2 Kia manamanatu a ke he tau puhala oti ne takitaki mai ai e Iehova hau a Atua a koe, ke he tau tau ne fagofulu ke he tutakale, kia fakamamahi ai a koe, mo e kamatamata ai a koe, ke iloa ai e tau mena ha ha he loto hau, po ke omaoma a koe ke he hana tau poaki po ke nakai.
3 Ne fakamamahi ai e ia a koe, mo e toka e ia a koe ke hoge, ti fagai e ia a koe ke he manai, ko e mena nakai kitia e koe nakai kitia foki hau a tau matua kia fakailoa atu kia koe nakai ko e tau mena kai hokoia ke moui ai e tagata, ka ko e tau mena oti ne fakato mai he fofoga he Atua ke moui ai e tagata.
4 Nakai popo hau a tau tapulu ne fakatapulu ai a koe, ti nakai fua foki hau a tau hui ke he tau tau ia ne fagofulu.
5 Kua iloa foki e koe ke he hau a loto ke tuga ne akonaki he tagata hana tama tane, ne akonaki ni pihia e Iehova hau a Atua kia koe.
6 Ko e hanai kia omaoma a koe ke he tau poakiaga a Iehova hau a Atua, ke fano ai a koe ke he hana tau puhala, mo e matakutaku a koe kia ia.
7 Ha ko e mena fakahoko ai e Iehova hau a Atua a koe ke he motu mitaki, ko e motu ne ha i ai e tau vailele, ko e tau vaipuna, katoa mo e tau loloto vai lalahi ne puna mai he tau pahua mo e tau mouga.
8 Ko e motu ne ha i ai e tau saito, mo e tau karite, mo e tau vine, mo e tau mati, mo e tau rimoni, ko e motu ne ha i ai e puke lolo olive mo e meli.
9 Ko e motu ke kai ai e koe e tau mena kai mo e nakai hogeia, ti nakai fai mena ke nofogati ai e taha; ko e motu kua eke ai e tau lapatoa mo tau maka hana, ko e hana tau mouga foki ke keli mai ai e apa kula.
10 Ka e kai a koe mo e makona ai, ti fakamonu atu kia Iehova hau a Atua ka ko e motu mitaki kua ta atu ai e ia kia koe.
11 A koe ni, neke nimo ia koe a Iehova hau a Atua, he nakai omaoma a koe ke he hana tau poaki, mo e hana tau fakafiliaga, mo e hana tau fakatufono, kua poaki atu ai au kia koe ke he aho nai;
12 Neke kai ai a koe mo e makona, mo e ta ai e tau fale mitaki mo e nofo ai;
13 Ti tupu loga ai foki hau a tau fuifui povi, mo e hau a tau fuifui mamoe; ti fakaloga ai hau a tau ario mo e hau a tau auro, ti fakaloga ai foki hau a tau mena oti.
14 Ti fakatokoluga ai hau a loto, mo e fakanimonimo e koe a Iehova hau a Atua ne ta mai ai a koe he motu ko Aikupito, ko e mena ne nofo fakatupa ai a koe;
15 Ko ia ne takitaki ai a koe ke he tutakale lahi mo e matakutakuina, ne ha i ai e tau gata gagau vevela mo e tau akarava, ko e motu pakula foki, nakai fai vai, ka e fakatafe mai e ia e vai mau he kaumaka uli;
16 Ko ia ne fagai a koe ke he manai ke he tutakale, ko e mena nakai kitia he tau matua hau, kia fakamamahi ai e ia a koe, kia kamatamata ai e ia a koe, ke fakamonuina e ia a koe ke he tau tau a mui.
17 Neke pehe a koe ke he hau a loto, Ko e haku a malolo, mo e malolo he haku a tau lima ne moua ai e au e koloa nai.
18 Ka e manamanatu a koe kia Iehova hau a Atua, ha ko ia ni ne ta atu e malolo kia koe ke moua ai e koloa kia fakamau ai e ia hana maveheaga ne omonuo ai a ia ke he hau a tau matua, tuga ne eke ke he aho nai.
19 Kaeke foki ke nimo ia koe a Iehova hau a Atua, mo e mui atu a koe ke he tau atua kehe, mo e fekafekau ai a koe kia lautolu mo e fakaveli fakafohifo ai a koe kia lautolu, kua tala atu ni e au kia mutolu ke he aho nai, to fakaotioti ai ni a mutolu.
20 Tuga ne tau motu ne fakaotioti ai e Iehova ki mua ha mutolu, to fakaotioti pihia e ia a mutolu; he nakai fanogonogo a mutolu ke he leo a Iehova ha mutolu a Atua.