Teutaronome 9:1-29
9 ISARAELA na e, fanogonogo mai a, ko e fina atu ha ne fai a koe ke he aho nai ke he fahi atu a Ioritana, ke hoko atu ke eke ai māu e tau motu ne mua kia koe he tokologa mo e malolo, ko e tau maga lalahi kua puipui ai he tau pa ke hoko hake ke he lagi,
2 Ko e motu he tau tagata lalahi to tokoluga, ko e fanau a Anaki kua iloa e koe mo e logona ai e koe, pehe, Ko hai kua maeke ke tutu atu ki mua he fanau a Anaki?
3 Kia iloa ai e koe ke he aho nai, ko Iehova hau a Atua, ko ia kua mua atu kia koe, ko e afi puhopuho a ia kua fakaotioti ai e ia a lautolu kua fakatokolalo foki e ia a lautolu ki mua hau; to vega kehe e ia a lautolu, mo e fakaotioti vave e ia a lautolu, tuga ne vagahau mai ai a Iehova kia koe.
4 Ka vega kehe e Iehova hau a Atua a lautolu ki mua hau, aua neke pehe a koe ke he hau a loto, Ko e haku a tututonu kua fakahoko mai ai e Iehova au ke eke maku e motu nai; ka ko e mahani kelea he tau motu ia kua vega kehe ai e Iehova a lautolu ki mua hau.
5 Nakai ko e hau a tututonu mo e mahani tonu he hau a loto kua fina atu ai a koe he eke mau ha lautolu a motu; ka ko e mahani kelea he tau motu ia kua vega kehe ai e Iehova hau a Atua a lautolu, kia fakamau ai foki e kupu ne omonuo ai a Iehova ke he hau a tau matua ko Aperahamo, ko Isaako, mo Iakopo.
6 Kia iloa foki e koe, nakai ko e mahani mitaki hau kua foaki atu ai e Iehova hau a Atua e motu mitaki na ke eke mau; ha ko koe ko e motu kua mao e tau ua.
7 Kia manamanatu ai, aua neke nimo ia koe e tau mena ne fakatupu ai e koe e ita a Iehova hau a Atua ke he tutakale tali he aho ne o mai ai a mutolu he motu ko Aikupito ato hohoko mai ni a mutolu ke he mena nai, kua fakafualoto ni a mutolu kia Iehova.
8 Ha i Horepa foki ne fakatupu ai e mutolu e ita a Iehova, ti ita ai a Iehova kia mutolu, ti eke e ia ke fakaotioti ai a mutolu.
9 Kua hake ai au ke he mouga ke talia e tau lapa maka, ko e tau lapa maka ne ha i ai e maveheaga ne eke e Iehova mo mutolu; ti nofo ai au ke he mouga fagofulu e aho mo e fagofulu e po, nakai kai ai e au ha mena kai, ti nakai inu foki e au ha maga vai.
10 Ti ta mai ai e Iehova kia au e na lapa maka ne ua ne tohi ai ke he matalima he Atua, ne ha i ai e tau kupu oti ni ne vagahau mai ai e Iehova kia mutolu ke he mouga mai loto he afi ke he aho ne eke ai e fakapotopotoaga.
11 Kua katoa tuai e tau aho ne fagofulu mo e tau po ne fagofulu ti ta mai ai e Iehova kia au e tau lapa maka ne ua, ko e tau lapa ne ha i ai e maveheaga.
12 Ti pehe mai ai a Iehova kia au, Tu a ki luga, ti hifo fakaave a koe ki lalo he mena nai, ha ko e hau a motu ne ta mai e koe i Aikupito kua kelea tuai a lautolu; kua o kehe vave a lautolu mai he hala ne poaki atu ai e au kia lautolu; kua eke ai e lautolu e tupua apa kula.
13 Ti tala mai e Iehova kia au, kua pehe mai, Kua kitia tuai e au e motu nai, kitiala foki, ko e motu kua mao e tau ua.
14 Toka e koe au ato fakaotioti ai e au a lautolu, mo e holoholo kehe ai ha lautolu a higoa mai he lalolagi, to eke foki e au a koe mo tupuna he motu ke mua kia lautolu he malolo mo e tokologa.
15 Ti tafilu ai au, mo e hifo he mouga, kua vela e mouga ke he afi ha he na lima ua haku e tau lapa maka ne ua he maveheaga.
16 Ne kitekite au, kitiala foki, kua hala a mutolu kia Iehova ha mutolu a Atua, kua eke ai e mutolu ma mutolu e punua povi apa kula; kua o kehe vave a mutolu he puhala ne poaki mai ai e Iehova kia mutolu.
17 Ti toto e au e tau lapa maka ne ua, ti liti hifo ai e au mai haku tau lima ne ua, ti lipilipi ai e au ia ki mua ha mutolu.
18 Ti fakaveli fakafohifo ai au ki mua a Iehova, tuga ne eke ai fakamua, fagofulu e aho ti fagofulu e po nakai kai ai e au ha mena ti nakai inu ai e au ha maga vai, ha ko e tau hala oti ha mutolu ne hala ai a mutolu, he eke ai e mutolu e tau mena kelea ki mua a Iehova ke fakahogohogomanava kia ia.
19 Ha ko e mena matakutaku ai au ke he ita mo e ita lahi ne ita ai a Iehova kia mutolu kia fakaotioti ai a mutolu; ka e fanogonogo mai foki a Iehova kia au ke he aho ia,
20 Ne ita lahi foki a Iehova kia Arona, ke tamate a ia, ti liogi ai au foki ma Arona ke he aho ia.
21 Ti uta ai e au e mena ne hala ai a mutolu, ko e punua povi ne eke e mutolu, ti huhunu ai e au ke he afi, mo e tukituki ai e au, mo e tukituki fakaikiiki ato ikiiki po ke efuefu, ti liligi ai e au hana efuefu ke he vai lele ne lele hifo ai he mouga
22 Ne fakatupu ai foki e mutolu e ita a Iehova i Tapara, mo Masa, katoa mo Kiperotahatava.
23 Ne fakafano atu foki e Iehova a mutolu i Katesapanea; kua pehe mai, Kia o hake a mutolu ke eke ma mutolu e motu kua ta atu e au ma mutolu. Ti fakafualoto ai a mutolu ke he kupu a Iehova ha mutolu a Atua, ti nakai tua a mutolu kia ia, ti nakai fanogonogo a mutolu ke he hana leo.
24 Kua fakafualoto a mutolu kia Iehova tali mai he aho ne iloa ai e au a mutolu.
25 Ti fakaveli fakafohifo au ki mua a Iehova ke he tau aho ne fagofulu mo e fagofulu e po, tuga ne fakaveli fakafohifo fakamua ai au; ha kua pehe mai a Iehova ke fakaotioti a mutolu.
26 Ti liogi ai au kia Iehova, kua pehe atu, Ko e Iki na e, ma Iehova, aua neke fakaotioti e koe hau a motu mo e hau a tufaaga ne laveaki mai ai e koe ke he hau a mana, ne ta mai ai e koe i Aikupito ke he hau a lima malolo.
27 Kia manatu a koe ke he hau a tau fekafekau ko Aperahamo, ko Isaako mo Iakopo; aua neke hagao atu a koe ke he loto mao he motu nai, mo e ha lautolu a tau mahani kelea, mo e ha lautolu a tau hala;
28 Neke pehe mai e motu ne ta mai ai e koe a mautolu Nakai maeke e Iehova ke fakahoko atu a lautolu ke he motu ne vagahau ai a ia kia lautolu, kua fakavihia foki e ia a lautolu, ko e mena ia ne uta ai e ia a lautolu ke he tutakale ke kelipopo ai e ia a lautolu.
29 Ka ko e hau a motu ni a lautolu mo e tufaaga hau, ne ta mai ai e koe ke he hau a mana lahi mo e hau a lima fakaolo.