Tito 1:1-16
1 KO au ko Paulo, ko e fekafekau he Atua, mo e aposetolo a Iesu Keriso ha ko e tua ha lautolu ne fifili he Atua, mo e maama mitaki ke he kupu moli kua lata mo e mahani Atua,
2 Ke he amaamanaki he moui tukulagi, kua talahau mai he Atua kua nakai maeke ke pikopiko, ka e nakaila kamata ai e tau hau;
3 Ka kua fakailoa mai e ia hana a kupu ke he vaha kua lata ai ke he fakamatalaaga, ne tuku mai kia au ke lata mo e poakiaga he Atua, ha tautolu a Fakamoui;
4 Ko e haku a tohi nai kia Tito, ko e tama moli haku ke he tua ne fakalapalapa ai; kia ha ha ia koe e fakaalofa noa, mo e fakaalofa, mo e monuina mai he Atua e Matua, katoa mo e Iki ko Iesu Keriso ha tautolu a Fakamoui.
5 Ko e mena hanai ne toka ai e au a koe i Kereta, kia fakahakohako e koe e tau mena ne toe, mo e kotofa e tau patu ke he taha māga mo e taha māga, tuga ne tala atu ai au kia koe;
6 Kaeke ke ha i ai taha kua nakai talahaua kelea, ko e tane he fifine tokotaha, ha ha ia ia e tau fanau kua tua, nakai hokotaki a lautolu kua matahavala po ke holifono.
7 Ha ko e mena lata ni ke he epikopo ke nakai talahaua kelea a ia, ko e fekafekau pule a ia he Atua, nakai fakatokoluga, nakai ita vave, nakai vale he inu lahi e uaina, nakai latau, nakai velevele koloa foki he tau lagatau kelea,
8 Ka kua fakaalofa ke he tau tagata kehe, kua loto ke he mitaki, kua mahani fakalatalata, kua tututonu, kua loto mea, kua nakai matagaoi,
9 Kua taofi mau ke he kupu moli tuga ne fakaako ai a ia, kia maeke ia ia ke fakamafana atu ke he tau kupu ke momoui ai, mo e akonaki atu foki kia lautolu kua liuliu mai.
10 Ha kua tokologa a lautolu kua holifono, kua vagavagahau fakahanoa, mo e fakahehe atu, ka e tokologa ia lautolu ko e peritome haia.
11 Kia fakamamate a lautolu ke lata ai, ha kua fakamafoki kehe e lautolu e falu a faoa katoa, kua fakaako foki e tau mena nakai lata, ha kua velevele koloa kelea.
12 Kua pehe mai taha ia lautolu, ko e perofeta ha lautolu a ia, Ko e tau tagata Kereta, ko e tau tagata fa pikopiko mau a lautolu, ko e tau manu favale kelea, kua loto lahi ke he kai mena, to teva.
13 Ko e talahau moli ia. Ko e mena ia, kia akonaki fakalahi ai e koe a lautolu kia malolo ai a lautolu ke he tua;
14 Aua neke taofi e tau tala tuai he tau tagata Iutaia, mo e tau poaki he tau tagata kua mafoki kehe mai he kupu moli.
15 Kua mea e tau mena oti kana ke he tau tagata loto mea, ka ko e tau tagata loto pilo mo e nakai tua, kua nakai mea ha mena taha kia lautolu, ka kua pilo e tau loto, katoa mo e tau loto manamanatu hifo ha lautolu,
16 Kua talahau e lautolu kua iloa e lautolu e Atua, ka kua fakatikai e lautolu a ia ke he tau gahua ha lautolu, kua eke e tau mena vihiatia, mo e faliuliu, kua nakai aoga a lautolu ke he taha gahua mitaki.