Tito 2:1-15
2 KA ko koe, kia vagahau atu a koe ke he tau mena kua lata mo e kupu fakaako kua tonu;
2 Kia tala age ke he tau tagata motua kia nofo fakalatalata a a lautolu, kia fulumokoi, kia mahani fakalatalata, kia malolo ke he tua, mo e fakaalofa, katoa mo e fakauka;
3 Kia pihia foki e tau fifine motua, kia gali ha lautolu a tau mahani, aua neke tauamuamu, aua neke fakatupa ke he uaina, kia eke mo tau akoako ke he tau mena mitaki;
4 Kia fakaako a lautolu ke he tau tamāfine ke fakaalofa ke he tau tane ha lautolu, kia fakaalofa foki ke he tau fanau ha lautolu.
5 Kia mahani fakalatalata a lautolu mo e nakai matagaoi, kia nonofo kaina, kia mahani mitaki, kia omaoma ke he tau tane ha lautolu, neke eke fakakelea e kupu he Atua.
6 Kia tomatoma atu pihia foki a koe ke he tau fuata kia mahani fakalatalata a lautolu.
7 Kia eke a koe mo fakafifitakiaga ke he tau gahua mitaki ke he tau mena oti, kia fakaako atu a koe mo e fakamoli ni, mo e fulumokoi,
8 Mo e tau kupu tonu kua nakai maeke ke talahaua kelea, kia fakama ai a ia kua totoko mai, ha kua nakai moua ha mena kelea ke talahau ai kia mutolu.
9 Kia tomatoma atu ke he tau fekafekau kia omaoma a lautolu ke he tau iki ha lautolu ni, kia maeke ia lautolu ke fakafiafia ki ai ke he tau mena oti kana, aua neke liuliu atu ki ai.
10 Aua neke kaiha a lautolu, ka kia fakakite e lautolu kua fakamoli a lautolu ke he tau mena oti kana kia fakalilifu ai e lautolu e tau kupu he Atua, ha tautolu a Fakamoui ke he tau mena oti.
11 Ha ko e fakaalofa noa he Atua kua ta mai ai e fakamouiaga kua fakakite mai ke he tau tagata oti kana,
12 Kua akonaki mai ai kia tautolu, kia tiaki e tautolu e tau mahani hepehepe, katoa mo e tau manako lahi he lalolagi, ka kia nonofo fakalatalata a tautolu mo e tututonu katoa mo e mahani Atua ke he mouiaga nai;
13 Kua fakatalitali ke he amaamanaki ke monuina ai, mo e fakakiteaga he lilifu he Atua kua mua, mo e Fakamoui ha tautolu ko Iesu Keriso haia.
14 Ko ia ne foaki mai e ia a ia ma tautolu ke lukutoto aki a tautolu mai he tau holifono oti kana, mo e fakamea ai e ia māna ke eke mo motu fifili kua fakamakutu ke he tau gahua mitaki.
15 Kia tala atu e koe e tau mena na mo e tomatoma atu ai, mo e akonaki atu mo e pule ni. Aua neke fakalialia taha kia koe.