Tito 3:1-15
3 KIA fakamanatu e koe a lautolu kia omaoma a lautolu ke he tau iki lalahi, mo e tau pule kia navanava atu ke he tau iki, kia nonofo tauteute foki a lautolu ke he tau gahua mitaki oti kana,
2 Aua neke eke fakakelea ke he taha, aua neke fa taufetoko, kia totonu, mo e fakakite e mahani molu ni ke he tau tagata oti kana.
3 Ha ko tautolu foki, ne goagoa a tautolu i tuai, mo e faliuliu, mo e fakaheheina, ne fekafekau ke he tau manako lahi, mo e tau mena kehekehe ne fiafia ai, ne nonofo ke he loto kelea mo e mahekeheke, kua vihiatia, mo e feitaaki.
4 Ka kua fakakite mai e totonu mo e fakaalofa tagata he Fakamoui ha tautolu, ko e Atua.
5 Ti fakamomoui ai e ia a tautolu, nakai ko e tau gahua tututonu ne eke ai e tautolu, ka ko e hana fakaalofa mai ne fakamoui ai e ia a tautolu ke lata mo e koukouaga he fakafouaga, mo e liu fakafou ai he Agaga Tapu,
6 Ne liligi hifo fakalahi e ia ki luga ia tautolu ha ko Iesu Keriso ha tautolu a Fakamoui.
7 Kia talahaua tututonu a tautolu ke he hana fakaalofa noa, kia eke a tautolu mo tau hakeaga ke lata mo e amaamanaki ke he moui tukulagi.
8 Ko e kupu moli haia, kua loto foki au kia talahau fakalahi e koe e tau mena ia, kia foli a lautolu kua tua ke he Atua ke fakamahani ke he tau gahua mitaki; kua mitaki e tau mena ia, to aoga ke he tau tagata.
9 Ka kia kalo kehe mo e tau kumiaga goagoa, mo e tau matohiaga, mo e tau miha, mo e taufetoko ke he fakatufono, ha ko e tau mena nakai aoga ia, to fakateaga.
10 Ka ko e tagata kua fakatupu e feveheaki, kia kalo kehe a koe mo ia, ka oti e akonaki atu lagataha po ke lagaua;
11 Ha kua iloa e koe ko e tagata pihia kua mafoki kehe tuai a ia, kua hala tuai, kua fakahala foki e ia a ia ni,
12 Ka fekau atu e au kia koe a Aretima, po ko Tuiko, ti eke taha a koe ke hau kia au ki Nikopoli; ha kua mau haku manatu ke nofo ai ke he tau makalili.
13 Kia fakamalolo ke fakafano mai e ako fakatufono ko Sena, mo Apolo ke he fenoga ha laua kia nakai nofogati a laua ke he taha mena taha.
14 Kia ako e tau matakainaga ha tautolu ke fakamahani ke he tau gahua mitaki kua aoga mo e tau mena kua nonofogati ai, neke nakai fua mai a lautolu.
15 Ko lautolu oti kana kua fakalataha mo au kua fakaalofa atu a lautolu kia koe. Fakaalofa atu au kia lautolu kua fakaalofa mai kia mautolu ke he tua. Kia ha ha ia mutolu oti kana e fakaalofa noa. Amene.