“Kua lata a koe ke felauaki neke ai fai kapitiga, mateafu mo e nakai fai amaamanakiaga. To nakai fai kapitiga mo e nofo tokotaha.”​—Carl.

Mooli nakai? Liga mooli. Ka ko e falu tagata ne lali lahi ke nakai pihia tuga ne talahau e Carl. Pihia nakai a koe? Ko e vala tala nei ka lagomatai a koe ke he puhala hako.

•  Ko e ha ne lali e tau tagata ke felauaki?

•  Ko e heigoa ne kua lata ke iloa e koe

•  Ko e heigoa ne talahau he tau kapitiga haau

• Ha kua manako a lautolu ke fai kapitiga. “Kitia e au he social media e tau ata he tau kapitiga haaku ne taute mena ka e nakai fai au. Ti lahi e manamanatu haaku kua fai mena kelea ne taute e au.”​—Natalie.

  MANAMANATU KI AI: Fai logonaaga nakai a koe he nakai putoia he matakau? Fai hikiaga kia a koe ne taute ke talia he matakau a koe?

• Ha kua nakai manako a lautolu ke kehe mai. “Nakai fakaatā he tau matua a au ke fai selafoni. Ka hūhū ke he numera haaku ti talaage au ai fai selafoni au, pehē a lautolu: ‘Fēfē? Fiha e tau haau?’ Talaage au 13, ti onoono fakaalofa mai a lautolu kia au.”​—Mary.

  MANAMANATU KI AI: Ko e heigoa ne nakai fakaatā he tau matua a koe ke taute? Ko e heigoa haau ka taute ke he mena ia?

• Ha kua nakai manako a lautolu ke fakavihia. “Ko e tau fanau aoga ne nakai loto ki a lautolu ne kehe tau mahani, vagahau po ke tapuakiaga. Ha kua nakai tatai a koe mo lautolu, to mailoga e lautolu a koe ke fakavihia.”​—Olivia.

  MANAMANATU KI AI: Kua fakavihia nakai a koe he nakai felauaki? Ko e heigoa haau ne taute he tuaga ia?

• Ha kua nakai manako a lautolu ke galo e tau kapitiga. “Lali au ke tatai mo lautolu ne lafi auloa. Fifitaki e tau vagahau ha lautolu. Kata ke he tau mena ne nakai lata ke kata ki ai. Putoia foki au ka vaiga kelea e taha tagata pete he iloa e au kua fakamamahi a ia.”​—Rachel.

  MANAMANATU KI AI: Manako lahi ki a koe ke loto e tau kapitiga haau ki a koe? Kua fai magaaho nakai a koe ne hiki e aga haau ke tatai mo lautolu?

• Ko e falu magaaho ka fifitaki to fai mena ka tupu. Ko e ha? Ha kua kitia he tau tagata ko e fakatupua a koe. “Ne lali fakalahi au ke fakatatai mo lautolu he poko aoga ka e nakai gahua,” he talahau e Brian ne 20 e tau. “Iloa e au kua lata ke nakai fakatupua ka e taute e tau mena haau ni.”

  PUHALA HAKO: Liu ke manamanatu ke he tau mena ne mua e aoga. Pehē e Tohi Tapu: “Kia mailoga e mutolu e tau mena ne mua atu e aoga.” (Filipi 1:10, NW) Hūhū hifo ki a koe, ‘Ko e heigoa e mena ne mua​—ke fakatatai mo lautolu ne nakai tatai e tau taofiaga mo au, po ke fakamooli tumau?’

  “Ai fai kakano ke tuga e falu. He nakai maeke a koe ke taute e falu ke loto ki a koe mo e nakai eke a koe ke he tagata mitaki.”​—James.

• He lali ke felauaki ka nakai maeke a koe ke fakakite e manatu haau. Taute noa ni e koe ke “fakafiafia e tau tagata” ke he tau mena ne loto a lautolu ki ai. “Taute noa ni e au ha mena ke felauaki mo e matakau pete kua nakai hako,” ne talahau he tama fuata ko Jeremy. “Fakaata e au a lautolu ke pule lahi ke he tau vagahau mo e tau mena ne taute e au.”

  PUHALA HAKO: Iloa e tau mena ne aoga ke he moui haau ka e nakai hiki ke fakatatai mo lautolu ne fakalataha mo koe. Ko e fai kakano mitaki mooli ne talahau he Tohi Tapu: “Ua taute ha mena ne taute he falu.”—Esoto 23:2, Holy Bible—Easy-to-Read Version.

  “Lali au ke loto ke he tau mena ne loto a lautolu ki ai—leo kofe, kemi, tau tapulu, tau fakatātā, tau vali mata . . . lali au ke tuga a lautolu. Liga kitia e lautolu ko e fakavai noa ni au. Liga iloa oti e lautolu mo e iloa foki e au. Fakahiku ne momoko mo e matimati au. Ti nakai iloa e manako haaku po ke fai manamanatu foki. Fakaako e au kua nakai tatai e tau tagata oti po ke loto ki a koe. Fakauka mo e manatu na fai magaaho to moua e tau kapitiga; mo e tupu hake ko e tagata motua.”​—Melinda.

• Ko e lali ke felauaki ka lauia e mahani haau. Ko e tama fuata ko Chris ne iloa e ia e mena ne tupu ke he kasini haana. “Kamata a ia ke taute e tau mena ne nakai fa taute e ia tuga e fakaaoga he tau tulaki ke felauaki,” talahau e Chris. “Kua hufia lahi a ia mo e teitei mate.”

  PUHALA HAKO: Fakamamao mo e tau tagata ne vagahau mo e mahani kelea. Pehē e Tohi Tapu: “Ko ia kua feoaki mo e tau tagata iloilo, kua iloilo ni a ia; ka ko ia kua kapitiga mo e tau tagata goagoa, to matematekelea ai a ia.”​—Tau Fakatai 13:20.

  “Mitaki he falu magaaho ke foli atu mo e felauaki auloa. Ka e nakai lata ke taute e koe e tau mena ne nakai hako. Ko e tau tagata mitaki to kapitiga a lautolu mo koe.”—Melanie.

  Ke Lagomatai: He lali ke feleveia mo e taute kapitiga, ua kumi ni kia lautolu ne tatai e tau manako mo koe. Kumi kia lautolu ne tuku fakamua e tau mena fakaagaaga, mahani meā mo e talitonu mooli.