Ko e poa ha Iesu ko e puhala kua fakahao po ke laveaki he Atua e tau tagata mai he agahala mo e mate. Hagaao e Tohi Tapu ke he fakamaligi he toto ha Iesu ko e totogi he lukutoto. (Efeso 1:7; 1 Peteru 1:18, 19) Ti pehē a Iesu kua hau a ia ke “foaki atu foki hana moui mo lukutoto ke hukui aki e tau tagata tokologa.”​​—Mataio 20:28.

Ko e ha kua lata e “lukutoto ke hukui aki e tau tagata tokologa”?

 Ko e tagata taane fakamua ko Atamu ne mitaki katoatoa he tufuga ne nakai fai agahala. Ha ha ia ia e amaamanakiaga ke moui tukulagi ka e galo ai e ia ha kua fifili ke nakai omaoma ke he Atua. (Kenese 3:17-19) He fanafanau, ne fakaholo age e ia e agahala ki a lautolu. (Roma 5:12) Ma e kakano nei, fakakite he Tohi Tapu kua “fakafua” e Atamu a ia mo e tau fanau haana he fakatupa ke he agahala mo e mate. (Roma 7:14) He nakai mitaki katoatoa, nakai fai ia lautolu ka liu fakatau mai e mena ne fakagalo e Atamu.​​—Salamo 49:7, 8.

 Logona hifo he Atua e fakaalofa hofihofi ke he tau hologa ha Atamu he tuaga nakai fai amaamanakiaga ha lautolu. (Ioane 3:16) Ka ko e tuaga he Atua he fakafili tonu kua nakai tiaki noa po ke fakaatā e tau agahala ha lautolu ka e nakai fai fakavēaga hako. (Salamo 89:14; Roma 3:23-26) Fakaalofa e Atua ke he tau tagata ti foaki e ia e puhala tonuhia kua lata ma e tau agahala ha lautolu ke nakai ni fakamagalo ka e tiaki katoatoa foki. (Roma 5:6-8) Ko e lukutoto ko e fakavēaga tonuhia.

Gahua fēfē e lukutoto?

 Ko e kupu “lukutoto” kua putoia e tolu e vala:

1.   Ko e totogi.​​—Numera 3:46, 47.

2.   Moua ai e fakatokanoa mai po ke palepale.​​—Esoto 21:30.

3.   Kua tatai ke he aoga he mena ne fakatau aki, po ke fakakatoatoa ai. a

 Manamanatu ke he puhala ne gahuahua e tau mena nei ke he poa lukutoto ha Iesu Keriso.

1.   Totogi. Talahau he Tohi Tapu ko e tau Kerisiano kua “fakafua a mutolu ke he totogi.” (1 Korinito 6:20; 7:23) Ko e totogi ia ko e toto ha Iesu ne “fakafua foki e koe a [lautolu] ma e Atua . . . , mai he tau magafaoa oti, mo e tau vagahau kehekehe, mo e tau motu, katoa mo e atu motu.”​​—Fakakiteaga 5:8, 9.

2.   Fakatokanoa mai. Foaki he poa ha Iesu e “matulei ke lukutoto” aki e tau hala.​​—1 Korinito 1:30; Kolose 1:14; Heperu 9:15.

3.   Tatai. Ko e poa ha Iesu kua tatai tonu ke he mena ne fakagalo e Atamu​​—ko e moui mitaki katoatoa he tagata. (1 Korinito 15:21, 22, 45, 46) Talahau he Tohi Tapu: “Ha ko e mena, tuga he uta mo tau tagata hala e tokologa ha ko e liuliu he tokotaha [Atamu], to uta pihia foki mo tau tagata tututonu e tokologa ha ko e omaoma he tokotaha [Iesu Keriso].” (Roma 5:19) Fakamaama he mena nei ko e mate he tagata tokotaha ka foaki e totogi ke lukutoto ma e tau tagata tokologa ne agahala. Ko e poa ha Iesu kua “eke mo lukutoto ma e tau tagata oti kana” ne taute e tau lakaaga kua latatonu ke aoga mai ai.​​—1 Timoteo 2:5, 6.