Kua fakaaoga he Tau Fakamoli a Iehova e tau fakaliliuaga kehekehe ma e fakaakoaga ha lautolu ke he Tohi Tapu. He loga e vagahau ne moua ai, kua loto fakaaue a mautolu ke he New World Translation of the Holy Scriptures he fakaaoga e higoa he Atua, hakotika mo e felauaki tonu.

•   Fakaaoga e higoa he Atua. Ko e falu tagata ne lolomi e Tohi Tapu ne nakai fakalilifu a Ia ne tohia e Tohi Tapu. Ma e fakatai, molea e 70 he tau tagata ne tohi e tau higoa he lagomatai ke he taha e fakaliliuaga he Tohi Tapu. Ka ko e Tohi Tapu taha ia ne tiaki e higoa ha Iehova ko e Atua ne tohia ai!

   Kehe ai, ko e New World Translation ne fakamau e higoa tapu he tau tohiaga fakamua ne ha ha i ai, ti nakai tohi e tau higoa he komiti ne fakaliliu ai.

•   Hakotika. Kua nakai hakotika oti e tau fakaliliuaga ne fakamau fakamua he Tohi Tapu. Tuga anei, taha e fakaliliuaga he tohi a Mataio 7:13 ne pehē: “Kia huhū atu a mutolu ke he gutuhala pukilu; ha kua laulahi e gutuhala ke he afi tote, ti mukamuka e puhala ke huhū atu ki ai.” Ka e fakaaoga he talahauaga fakamua e “malaia,” ka e nakai ko e “afi tote.” Liga tuku e lautolu ne fakaliliu e kupu “afi tote” he talitonu a lautolu ko e tau tagata mahani kelea to fakakikiveka tukulagi i ai. Ka e nakai lalago he Tohi Tapu e manatu ia. Ko e New World Translation ne hako e totouaga: “Kia huhū atu a mutolu ke he gutuhala pukilu; ha ko e mena pulahi e gutuhala, ti laulahi foki e hala ke pu atu ke he malaia.”

•   Felauaki Tonu. Ko e fakaliliuaga kua lata ke hakotika, felauaki tonu, mo e mukamuka ke maama. Kikite e fakataiaga. Ia Roma 12:11, fakaaoga he aposetolo ko Paulo e talahauaga ne kakano “velagia e agaaga he loto.” Kua nakai maama mitaki e talahauaga ia he vagahau Palagi he vahā foou nei, ka kua mukamuka ke maama e kupu ia he New World Translation. Pehē ko e tau Kerisiano kua lata ke “puke he agaaga.”

 Lafi ke he fakaaoga e higoa he Atua, hakotika mo e felauaki tonu, fai mena kehe foki e New World Translation: Foaki ai ka e nakai fai totogi. Ko e fua, tokologa a lautolu ne kua maeke ke totou e Tohi Tapu he vagahau ha lautolu​​—maeke foki a lautolu ne nakai lahi e tupe ke moua e Tohi Tapu.