Ha ko e Tau Fakamoli a Iehova, eketaha a mautolu ke pipiki ke he puhala faka-Kerisiano ne fakaako e Iesu ti fakagahua he tau aposetolo haana. Fakamaama he vala tala nei e tau taofiaga ha mautolu.

1.   Atua. Tapuaki a mautolu ke he Atua Malolō Ue Atu kua tokotaha ni mo e mooli, ko e Tufuga ne higoa ko Iehova. (Salamo 83:18; Fakakiteaga 4:11) Ko Ia ko e Atua a Aperahamo, Mose, mo Iesu.​—Esoto 3:6; 32:11; Ioane 20:17.

2.   Tohi Tapu. Mailoga e mautolu ko e Tohi Tapu ko e fekau omoomoi he Atua ke he tau tagata. (Ioane 17:17; 2 Timoteo 3:16) Fakavē e tau taofiaga ha mautolu ke he tau tohi oti ne 66, putoia ai e “Maveheaga Tuai” mo e “Maveheaga Foou.” Ko e Porofesa ko Jason BeDuhn ne fakamaama fakamitaki kua fakavē e “tau taofiaga mo e fakagahuaaga he Tau Fakamoli a Iehova ke he mena ne talahau mooli he Tohi Tapu, ka e nakai fifili tuai e lautolu e manatu kua talahau he Tohi Tapu.” a

    He talia e mautolu e Tohi Tapu, nakai ko e tau tagata kua tapiki mau ke he fakavēaga. Mailoga e mautolu ko e tau vala he Tohi Tapu kua tohia ke he vagahau fakatai ti nakai maama noa ni.​—Fakakiteaga 1:1.

3.   Iesu. Muitua e mautolu e tau fakaakoaga mo e fakafifitakiaga ha Iesu Keriso mo e fakalilifu a ia ko e Laveaki ti ko e Tama he Atua. (Mataio 20:28; Gahua 5:31) Ko mautolu ko e tau Kerisiano. (Gahua 11:26) Ka e fakaako e mautolu mai he Tohi Tapu ko Iesu ne nakai ko e Atua Malolō Ue Atu ti nakai fai fakavēaga he Tohi Tapu ma e fakaakoaga Tolu Taha Tapu.​—Ioane 14:28.

4.   Kautu he Atua. Ko e fakatufono mooli anei he lagi, nakai ko e tuaga he tau loto he tau Kerisiano. To hukui ai e tau fakatufono he tagata mo e fakakatoatoa e finagalo he Atua ma e lalolagi. (Tanielu 2:44; Mataio 6:9, 10) To tupu mafiti e mena nei, ha kua fakakite he perofetaaga he Tohi Tapu kua nonofo a tautolu he “tau aho fakamui.”​—2 Timoteo 3:1-5; Mataio 24:3-14.

    Ko Iesu ko e Patuiki he Kautu he Atua he lagi. Kamata a ia ke pule he 1914.​—Fakakiteaga 11:15.

5.   Fakamouiaga. He fakahao mai he agahala mo e mate kua maeke he puhala he poa lukutoto ha Iesu. (Mataio 20:28; Gahua 4:12) Ke aoga mai he poa, lata he tau tagata ke fakagahuahua e tua ki a Iesu mo e hiki foki e puhala ha lautolu he moui ti papatiso. (Mataio 28:19, 20; Ioane 3:16; Gahua 3:19, 20) Ko e tau gahua he tagata kua fakakite kua gahuahua e tua haana. (Iakopo 2:24, 26) Ka e nakai moua noa e fakamouiaga, ka kua puhala mai he “fakaalofa noa he Atua.”​—Kalatia 2:16, 21.

6.   Lagi. Ko Iehova ko e Atua, Iesu Keriso, mo e tau agelu fakamooli ne nonofo he lagi. b (Salamo 103:19-21; Gahua 7:55) Ko e numera tote he tau tagata ne 144,000 to fakaliu tu mai ke he moui he lagi ke pule fakalataha mo Iesu he Kautu.​—Tanielu 7:27; 2 Timoteo 2:12; Fakakiteaga 5:9, 10; 14:1, 3.

7.   Lalolagi. Tufuga he Atua e lalolagi ke nonofo tukulagi e tau tagata. (Salamo 104:5; 115:16; Fakamatalaaga 1:4) To fakamonuina he Atua e tau tagata omaoma aki e malolō tino mitaki katoatoa mo e moui tukulagi he lalolagi parataiso.​—Salamo 37:11, 34.

8.   Kelea muikau mo e matematekelea. Kamata e tau mena nei ke tutupu he taha he tau agelu he Atua ne totoko. (Ioane 8:44) Ko e agelu nei, he mole e totoko haana ti fakahigoa ko “Satani” mo e “Tiapolo” ne fakaohooho e hoa fakamua ke fakalataha mo ia, ti ko e fua kua hagahaga kelea ma e tau magafaoa ha laua. (Kenese 3:1-6; Roma 5:12) Ke maeke ke fakamafola e tau matakupu he mahani ne fakatū e Satani, kua fakaatā he Atua e kelea muikau mo e matematekelea, ka e to nakai fakaatā e Ia e tau mena nei ke tumau tukulagi.

9.   Mate. Ko e tau tagata kua mamate ne nakai fai fafagu. (Salamo 146:4; Fakamatalaaga 9:5, 10) Nakai matematekelea a lautolu he fakakikiveka ke he afi tote.

    To liuaki mai he Atua e tau piliona tagata he mate, puhala he liu tu mai. (Gahua 24:15) Ka ko lautolu kua nakai talia ke fakaako e tau puhala he Atua ka fakaliu tu mai ke he moui to tamate tukulagi mo e nakai fai amaamanakiaga he liu tu mai.​—Fakakiteaga 20:14, 15.

10.   Magafaoa. Pipiki a mautolu ke he tau tuaga fakamua he Atua ke he fakamauaga ko e fakalataha he taha e tagata taane mo e taha e fifine, ti ko e mahani feuaki ni e fakavēaga kua latatonu ma e tau vevehe. (Mataio 19:4-9) Talitonu a mautolu ko e pulotu ne moua he Tohi Tapu kua lagomatai e tau magafaoa ke kautū.​—Efeso 5:22–6:1.

11.   Tapuakiaga ha mautolu. Nakai fakaaoga e mautolu e akau fakalava (cross) po ke ha tupua tā. (Teutaronome 4:15-19; 1 Ioane 5:21) Ko e tau vala he tapuakiaga ha mautolu kua putoia e tau mena nā:

    •   Liogi ke he Atua.​—Filipi 4:6.

    •   Totou mo e fakaako e Tohi Tapu.​—Salamo 1:1-3.

    •   Manamanatu fakahokulo ke he mena ne fakaako e mautolu he Tohi Tapu.​—Salamo 77:12.

    •   Feleveia auloa ke liogi, fakaako e Tohi Tapu, lologo, fakatutala ke he tau mena fakaagaaga, mo e fakamafana e tau matakainaga Fakamoli mo e falu.​—Kolose 3:16; Heperu 10:23-25.

    •   Fakamatala e “tala mitaki nai he kautu.”​—Mataio 24:14.

    •   Lagomatai a lautolu ne kua lata.​—Iakopo 2:14-17.

    •   Talaga mo e fakafoou e tau Fale he Kautu mo e falu fale ne fakaaoga ke fakalaulahi e fakaakoaga Tohi Tapu ha mautolu he lalolagi katoa.​—Salamo 127:1.

    •   Lagomatai ke he gahua matematekelea pauaki.​—Gahua 11:27-30.

12.   Fakatokatokaaga ha mautolu. Kua fakatokatoka a mautolu ke he tau fakapotopotoaga, igatia ai mo e leveki he kau he tau motua. Ka e nakai ko e vahega he tau akoako e tau motua, ti nakai totogi a lautolu. (Mataio 10:8; 23:8) Nakai taute e mautolu e mena ne hogofuluaki, ti nakai oko tupe e tau feleveiaaga ha mautolu. (2 Korinito 9:7) Ko e tau matagahua oti ha mautolu kua lalago he tau mena fakaalofa ne nakai fai higoa.

     Ko e Kau Fakatufono, ko e matakau tote he tau Kerisiano fakaagaaga ne fekafekau he matapatu ofisa ha mautolu he lalolagi, kua foaki e takitakiaga ma e Tau Fakamoli a Iehova he lalolagi katoa.​—Mataio 24:45.

13.   Kaufakalataha ha mautolu. Kaufakalataha a mautolu he lalolagi katoa ke he tau taofiaga ha mautolu. (1 Korinito 1:10) Gahua malolō foki a mautolu ke nakai vevehe fakamatakau, fakamotu, po ke tau vahega. (Gahua 10:34, 35; Iakopo 2:4) Ka ko e kaufakalataha ha mautolu kua fakaatā ma e fifiliaga ni he tagata. Igatia e Fakamoli mo e taute e tau fifiliaga fakatatau ke he loto manamanatu haana ne fakamahani he Tohi Tapu.​—Roma 14:1-4; Heperu 5:14.

14.   Tau mahani ha mautolu. Eketaha a mautolu ke fakakite e fakaalofa nakai lotokai he tau gahua oti ha mautolu. (Ioane 13:34, 35) Kalo kehe a mautolu he taute e tau mena ne nakai fiafia e Atua, putoia e nakai fakaaoga hehē he fagai toto. (Gahua 15:28, 29; Kalatia 5:19-21) Kua mafola a mautolu ti nakai fakalataha he tau. (Mataio 5:9; Isaia 2:4) Fakalilifu e mautolu e fakatufono he matakavi ne nonofo a mautolu ti omaoma ke he tau matafakatufono i ai ka e tumau a mautolu ke omaoma ke he tau matafakatufono he Atua.​—Mataio 22:21; Gahua 5:29.

15.   Tau fakafetuiaga ha mautolu mo e falu. Poaki e Iesu: “Kia fakaalofa atu a koe kia ia ne katofia a mua, kia tuga foki na koe kia koe.” Pehe foki a ia ko e tau Kerisiano ne “nakai ko e [tau] tagata he lalolagi.” (Mataio 22:39; Ioane 17:16) Ti lali a mautolu ke “mahani mitaki,” ka e fakatumau ke tuuho katoatoa ke he tau mena fakapolitika mo e kalo kehe he muitua ke he falu lotu. (Kalatia 6:10; 2 Korinito 6:14) Ka e fakalilifu e mautolu e tau fifiliaga ne taute he falu he tau tuaga ia.​—Roma 14:12.

 Ka fai hūhū foki a koe hagaao ke he tau taofiaga he Tau Fakamoli a Iehova, maeke a koe ke totou hagaao ki a mautolu he kupega hila ha mautolu, matutaki ke he taha he tau la ofisa ha mautolu, fina atu ke he feleveiaaga he Fale he Kautu ne tata ki a koe, po ke tutala ke he taha he Tau Fakamoli he matakavi haau.