O mai e magafaoa haaku i Tonga, ha ha i ai 170 e tau aelani mo e tu he faahi toga ki lalo he Pasifika. Mukamuka e moui i Tonga, ai fai hila po ke motoka. Ka e fai vai e kaina, mo e fai moa foki. He vahā ka tuku e aoga ne lagomatai e au mo e tokoua e lafu haaku e matua taane ha mautolu ke leveki e maala, to e mautolu e tau futi, ufi, talo mo e maniota. Lagomatai he tau mena nei mo e tupe tote ne moua e ia he taute e tau gahua kehekehe. Tuga e tau tagata he motu, fakalilifu lahi e magafaoa haaku ke he Tohi Tapu mo e o tumau he tapu. Ka e manatu a mautolu ke hiki ke moua e moui mitaki he taha motu monuina.

He mogo ne 16 e tau haaku, taute he taha agikolo haaku ke hiki e magafaoa ki California i Amerika. Ko e tau hikihikiaga fakamotu kua uka lahi ki a mautolu! Pete he loga e tau tupe ha mautolu he magaaho ia, ka e nonofo a mautolu he matakavi ne mativa, lahi e mahani favale mo e loga e tau tulaki. Logona tumau e mautolu e tau pa fana he po, mo e tokologa e tau tuutakaina ne matakutaku ke he tau kege mahani vale. Tokologa e tagata ne uta e tau fana ke puipui a lautolu po ke tali aki e taufetoko. Toka agaia he fatafata haaku e matapulu he taha taufetoko.

He aoga tokoluga, manako au ke tuga e falu fuata mui. Fano fakahaga au mo e putoia ke he tau patī fakahohā, inu kava lahi, mahani vale mo e fakaaoga hēhē e tau tulaki. Fano fakahaga ti hufia au ke he cocaine. Kaihā au ke fakatau e tau tulaki. Pete he o tumau e magafaoa he tapu, ka e nakai moua e au ha takitakiaga ke lagomatai au ke he peehiaga he atu taha ke ua taute e tau mena hepe. Loga e magaaho ne tapaki he tau leoleo au he tau gahua kelea. Nakai fai kaupāaga e moui haaku! Fakahiku kua tuku au he fale pouli.

He taha aho he 1997, he nofo au he fale pouli, taha e pagotā ne kitia au he totō e Tohi Tapu. Ko e Kirisimasi, ko e magaaho tapu lahi a ia ke he tau tagata Tonga. Hūhū mai a ia kia au ko e iloa nakai e au e talahauaga he Tohi Tapu hagaao ke he fanauaga a Keriso, ka e ai iloa e au ha mena pihia. Fakakite mai e ia e talahauaga mukamuka he Tohi Tapu ke he fanauaga ha Iesu, mo e kitia e au ne nakai fai talahauaga ke he kamataaga he Kirisimasi. (Mataio 2:1-12; Luka 2:5-14) Ofo lahi au mo e manamanatu au ko e heigoa foki ne talahau he Tohi Tapu. Ko e tagata nei ne fakalataha tumau a ia ke he tau feleveiaaga he Tau Fakamoli a Iehova he tau faahi tapu oti he fale pouli, ti manatu au ke fakalataha atu foki. Fakatutala a lautolu ke he tohi ha Fakakiteaga i loto he Tohi Tapu. Ai maama lahi e au e tau mena ne talahau e lautolu, ka e iloa e au ko e tau mena ne fakaako e lautolu na moua mai he Tohi Tapu.

He magaaho ne foaki he Tau Fakamoli ke fakaako fakatagata mai he Tohi Tapu, ne talia fiafia e au. Ko e magaaho fakamua anei ne fakaako au ke he maveheaga he Tohi Tapu ke he parataiso anoiha he lalolagi. (Isaia 35:5-8) Maama e au mogonei ka manako ke fakafiafia e Atua, kua lata au ke taute e tau hikihikiaga lalahi ke he haaku a moui. Iloa e au to nakai fakaatā e Iehova ko e Atua e tau mahani kelea haaku he Parataiso ne mavehe mai. (1 Korinito 6:9, 10) Eketaha au ke tau taofi e ita vave, oti e ula tapaka, ua liu ke konahia mo e fakaaoga hēhē e tulaki.

He 1999, ato oti e fakahala haaku he fale pouli, ne uta he tau pule fakatufono au ke taha fale pouli foki. Molea e tau he nakai matutaki au mo e Tau Fakamoli. Ka e eketaha au ke taute e tau hikihikiaga. Mai he tau 2000, ne taofi he fakatufono e atāina haaku ke nofo i Amerika ti liuaki au ki Tonga.

He liu au ki Tonga, kua makai au ke kumi e Tau Fakamoli a Iehova mo e liu ke fakaako Tohi Tapu. Fiafia lahi au ke he tau mena ne fakaako ki ai, mo e nava lahi au ha kua fakaaoga he Tau Fakamoli he motu nei e Tohi Tapu ke fakavē aki e tau fakaakoaga ha lautolu tuga e Tau Fakamoli i Amerika.

Talahaua lahi e matua taane haaku he matakavi ia ha ko e haana tuaga he tapu. He magaaho fakamua ne nakai manako a lautolu he fakalataha au mo e Tau Fakamoli a Iehova. Magaaho fakamui kua fiafia e tau matua haaku ha kua lagomatai he tau matapatu fakaakoaga Tohi Tapu ke hiki e moui haaku.

Ko e taha paleko uka haaku, ko e inu ne fakaaoga fakahanoa he motu. Tokologa e tagata taane Tonga ne inu tumau he tau faahi tapu e kava, ko e inu fakamohe ne moua mai he tau vaka akau. He liu au ki Tonga, fa fano au he po ke he kalapu kava mo e inu kava ti ai fahia. Ko e lekua haaku he lafi mo e tau kapitiga ne nakai muitua ke he tau tuaga he Tohi Tapu. Fakahiku ai, kua lagomatai au ke maama ko e tau aga haaku ne vihiatia he Atua. Taute e au e tau hikihikiaga ke moua e tau monuina mo e talia he Atua.

Kamata au ke fakalataha ke he tau feleveiaaga oti he Tau Fakamoli a Iehova. Ko e lafi mo lautolu ne lali ke fakafiafia e Atua ne lagomatai au ke totoko ke he tau kamatamata. He tau 2002, ne papatiso au ko e taha he Tau Fakamoli a Iehova.

Fai aoga ki a au e fakauka he Atua tuga ne talahau mai he Tohi Tapu: “Ka e fakauka mai a ia [Iehova] kia tautolu, he nakai finagalo a ia ke malaia taha, ka kia hohoko oti kana ke he tokihala.” (2 Peteru 3:9) Na maeke ia Ia ke fakaoti e lalolagi kelea he vahā i tuai, ka kua leva he toka e ia ke maeke e tau tagata tuga au ke kapitiga mo ia. Ko e manatu haaku to fakaaoga e ia au ke lagomatai e falu.

Ko e lagomatai ha Iehova ne tau taofi e moui haaku ne holo ki mua e kelea. Nakai liu au ke kaihā foki ke fakatau tulaki. Mogonei kua lali au ke lagomatai e tau tuutakaina ke kapitiga foki mo Iehova. He fakalataha au mo e Tau Fakamoli a Iehova, ti feleveia au mo e hoana fulufuluola haaku ko Tea. Fakalataha mo e tama taane tote ha maua, ne moui fiafia e magafaoa. Gahua auloa a mautolu ke fakaako e falu ke he talahauaga he Tohi Tapu hagaao ke he amanakiaga anoiha ke momoui mafola tukulagi he parataiso.