Fanau au he taone ko Calgary i Alberta i Canada. Ne tau vevehe e tau matua haaku he tama mukemuke au, ti hiki au mo e matua fifine haaku ke he kaina he tau matua tupuna haaku. Ofania he tau matua tupuna haaku a maua mo e matua fifine haaku ti ko e tama fiafia lahi au. Manatu agaia e au e tau tau fiafia lahi ia he moui haaku.

 He fitu e tau haaku, ne mua atu e uka e moui ha kua liu e matua fifine haaku mau ke he matua taane haaku ti hiki atu a mautolu ki St. Louis, Missouri i United States. Nakai leva ti iloa e au na favale lahi e matua taane haaku. Ma e fakatai, he liu mai au ki kaina he aho fakamua haaku he aoga foou, ne iloa e ia kua hemu e tau tama he aoga ki a au ka e nakai totoko atu e au. Ne ita a ia ti mua atu e keli e ia au ke he keli he tau fanau he aoga! Tokaloto e au e fakatonuaga nakai mitaki ia ti latau fakamua au he fitu laia e tau he moui.

 Ne hogohogo manava e matua fifine haaku he fa ita e matua taane haaku ti taufetoko leo lalahi tumau a laua. Kamata au ke fakaaoga hehē e tau tulaki kona mo e kava he 11 e tau he moui. Ne lahi fakahaga e vale mo e latau tumau au he puhalatū. He oti au mai he aoga tokoluga ne hiki katoa e moui haaku ha ko e tau puhala vale haaku.

 He 18 e tau he moui ne hū au he U.S. Marine Corps. Fakaako au i ai ke au atu e aga vale ke keli tagata. He mole e lima e tau ne toka e au e kautau ke fakaako ke he manamanatuaga he amanaki ke foli gahua mo e Federal Bureau of Investigation. Kamata e tau fakaakoaga univesitī haaku i United States ti matutaki he liu atu ki Canada.

 He univesitī ne fakagogoa katoatoa au ha ko e tau tagata. Ne lahi e lotokai he tagata, tuga kua gatigati e tau mena oti he lalolagi, ti tuga na ai fai tali mitaki ke he tau lekua he tagata. Ti galo e amaamanakiaga haaku to maeke e tau tagata ke taute e lalolagi mo matakavi mitaki.

 He tote e amaamanakiaga he moui, ne lifa e moui haaku ke fakaaoga hehē e kava mo e tau tulaki kona mo e foliaga lotokai ke he tupe mo e mahani fakataane mo e fifine. Moui ni au ke patī tumau mo e fano he taha fifine ke he taha fifine. Ne mauokafua e loto malolō haaku he fakaako kautau ti fa latau au. Ha ha ia au e aga fakafili tonu ne hako ni ki a au ti taufetoko au mo e ha tagata ne manatu au kua taute fakakelea e falu. Ka ko e tuaga mooli, kua fakatupa lahi au ke he aga vale.

 He taha aho ne hufia lahi au mo e kapitiga haaku he tau tulaki kona he poko i lalo he kaina haaku mo e tauteute ke fakafano fufū e tau marijuana ke sela, ne hūhū mai e kapitiga haaku na talitonu nakai au ke he Atua. Tali e au, “Kaeke ko e Atua ne fakatupu e tau matematekelea he lalolagi, nakai fia iloa au ia ia!” He aho hake ko e aho fakamua he gahuaaga foou haaku, taha e tagata gahua ko e Fakamoli a Iehova ne hūhū mai ki a au, “Ko e Atua kia he manatu haau ne fakatupu e matematekelea he lalolagi?” Ko e magaaho tonu he hūhū haana ne ofo au mo e fakalagā e fia iloa haaku. He ono e mahina i mua, ne loga e fakatutalaaga ha maua ti fakakite mai e ia e tau tali he Tohi Tapu ke he laulahi he tau hūhū aoga lahi haaku hagaao ke he moui.

 Ko e kapitiga fifine haaku ne nonofo mo au he mogoia ne nakai fia loto ke tala age e au e tau mena haaku kua iloa. Taha e Aho Tapu ne tala age au kua uiina e au e Tau Fakamoli a Iehova ke he kaina ha maua ke fakaako e Tohi Tapu mo maua. He aho hake, he liu mai au ki kaina he gahua kua uta e ia e tau mena oti he fale ti toka au. Fano au ki fafo ti tagi lahi. Liogi foki au ke he Atua he olelalo ki a Ia ke lagomatai. Ko e magaaho fakamua laia ne fakaaoga e au e higoa he Atua ko Iehova he liogi haaku.​—Salamo 83:18.

 Ua e aho he mole ne taute e fakaako Tohi Tapu fakamua haaku mo e hoa mau Fakamoli. He oti ti o a laua, ne matutaki au ke totou e tohi fakaako You Can Live Forever in Paradise on Earth, ti oti ni he pō ia. a Ko e mena ne fakaako e au hagaao ki a Iehova ko e Atua mo e haana Tama ko Iesu Keriso, ne hokotia ke he loto haaku. Kitia e au kua fakaalofa hofihofi a Iehova, ti lauia foki a ia ka mamahi a tautolu he matematekelea. (Isaia 63:9) Ofoofogia lahi au he fakaalofa he Atua ki a au mo e poa ne foaki he Tama Haana ma haaku foki. (1 Ioane 4:10) Ti manatu au ko Iehova kua fakauka mai “he nakai finagalo a ia ke malaia taha, ka kia hohoko oti kana ke he tokihala.” (2 Peteru 3:9) Logona hifo e au kua futiaki mai e Iehova au.​—Ioane 6:44.

 Kamata au ke fano he tau feleveiaaga he fakapotopotoaga he faahi tapu ia ni. Loloa e ulu haaku, tau sifa, ti matakutaku e foliga ka e taute he Tau Fakamoli au tuga ko e magafaoa ne kua leva e galo. Mahani a lautolu tuga e tau Kerisiano mooli. Logona hifo e au tuga ko au i kaina mo e tau matua tupuna haaku ka e he takatakaiaga mitaki lahi.

 Nakai leva ne kamata e tau mena ne fakaako e au mai he Tohi Tapu ke hiki fakafoou e moui haaku. Hifi e ulu haaku, oti e mahani feuaki, mo e tiaki e fakaaoga fakahehē he tau tulaki kona mo e kava. (1 Korinito 6:9, 10; 11:14) Manako au ke fakafiafia a Iehova. He iloa e au kua nakai talia e ia e tau mena ne taute e au, ai kalo hola au he mahani kelea haaku. Ka e fa tuina tumau e loto haaku. ‘Nakai lata au ke liu mahani pehēnei,’ he talahau e au ki a au. Ti eketaha au he lali ke hiki e tau manatu mo e tau gahua haaku. Ko e fua, ne kamata au ke logona hifo e aoga he taute e tau mena he puhala ha Iehova. Ia Iulai 29, 1989, ono e mahina he mole e fakaako Tohi Tapu fakamua haaku ne papatiso au ko e taha he Tau Fakamoli a Iehova.

 Lagomatai he Tohi Tapu au ke fakafoou e aga haaku. He magaaho fakamua ne fa mahani vale au ka fehagai mo e tagata vale. Ka e eketaha au mogonei ke “nonofo fakamitaki mo e tau tagata oti kana.” (Roma 12:18) Nakai nava au ki a au he hikiaga nei ka e fakaaue au ki a Iehova ma e malolō gahuahua he haana Kupu mo e agaaga tapu.​—Kalatia 5:22, 23; Heperu 4:12.

 He nakai fakatupa ke he tau tulaki kona, vale, mo e tau manako feuaki, lali fakalahi au mogonei ke fakafiafia a Iehova ko e Atua mo e foaki katoatoa ki a Ia. Putoia e lagomatai e falu ke iloa e Atua. Fai tau he mole e papatiso haaku, ne hiki au ke he taha matakavi he lalolagi ke lagomatai e gahua lahi ke fakamatala. He tau tau kua mole, fiafia au he fakaako e tau tagata tokologa mo e kitia e puhala mitaki ne fakaholo ki mua foki he Tohi Tapu e tau momoui ha lautolu. Fiafia lahi au ha kua eke e matua fifine haaku mo taha he Tau Fakamoli a Iehova, ha ko e tau hikiaga mitaki foki ne kitia e ia he aga mo e mahani haaku.

 He 1999, i El Salvador ne paase au mai he Aoga ma e Tau Tagata Fakamatala. Ne fakamahani mo e tauteute he aoga ia au ke takitaki e gahua fakamatala mo e ke fakaako mo e leveki e fakapotopotoaga. Matahiku he tau ia, ne mau e au e hoana fulufuluola haaku ko Eugenia. Gahua tokoua a maua ko e tau fekafekau fakamatala tumau i Guatemala.

 Ne nakai fakagogoa e moui mogonei, ka kua fiafia lahi au. He fakagahua e tau fakaakoaga he Tohi Tapu ne fakatokanoa au mai he mahani feuaki mo e favale ti kua puke e moui haaku he fakaalofa mooli mo e mafola.