He mole e papatiso ha Zarina ko e taha he Tau Fakamoli a Iehova, ne liu mai a ia i Rusia ke he motu haana he Lotouho i Asia, mo e eketaha a ia ke feaki e fanau fifine tokoua haana ke he kupu mooli. Nakai lahi e tupe haana, ti nofo auloa a ia he kaina ne taha ni e poko mo e tau matua, tugaane haana mo e hoana. Poaki e tau matua haana ke ua fakaako e fanau fifine haana ke he kupu mooli he Tohi Tapu. Tala age foki e laua ke he fanau fifine haana ke ua tutala mo e matua fifine hagaao ke he Tohi Tapu.

Manamanatu fakahokulo a Zarina ke he puhala ka lagomatai e fanau fifine haana ke iloa a Iehova. (Tau Fakatai 1:8) Ti liogi fakamakamaka a ia ki a Iehova ma e takitakiaga mo e pulotu. Fakagahua e Zarina e tau mena ne liogi a ia ki ai he o hui mo e fanau fifine haana ti tutala ki a laua ke he tau tufugatia fulufuluola. Ko e tau o hui nei ne lagomatai e fanau fifine ke atihake e manako ke iloa e Tufuga.

Ne matutaki foki a Zarina ke he taha puhala ke atihake he fakaaoga e tohi Ko e Heigoa ne Fakaako Mooli he Tohi Tapu? * Tohi e ia e tau kupu oti he tau paratafa mo e tau hūhū mai he tohi ke he tau laupepa. Lafi foki e ia e falu vala tala ke lagomatai e fanau fifine haana ke maama mitaki. Ti fufū e ia e tau laupepa mo e penesolo he lalo kelekele he matini unu he poko koukou. Ka o atu e fanau fifine ke he poko ia mo e totou e laua e tau paratafa, ti tohi hifo e tau tali ha laua.

He fakaaoga e puhala ia, kua maeke a Zarina ke fakaako ua e veveheaga he tohi Fakaako he Tohi Tapu mo e fanau fifine haana, ato moua e ia mo e fanau e taha kaina ma lautolu. Magaaho nei kua atāina a ia ke fakaako e fanau fifine haana mo e nakai fai tagata ke totoko a ia. Ne papatiso a laua ia Oketopa 2016 mo e fiafia he fakaaoga he matua fifine e pulotu mo e iloilo ke fakaako a laua hagaao ke he Atua.