Kuzwalwa komwana kungashantisa akale kube untolo kundume nonkaji. Sabazwali bapya, zwingamuchenamisa kuti munoopeja unshaji unji nesimba mubabayilila mwana wenu. Kusolala busiku pamwempela nobukali, nokushulubala zwinotiswa nomwana zwingabuza bukukutu mulobolano. Iwi noumwe uwo mokwelela kuchincha zwumwe zwinhu kuti mubabayilile mwana wenu akale mulondote ilobolano lyenu. Kulaya kweBhayibhili kungamubhancha chini kupombosola bukukutu yobu?

ZWINOLEBWA NEBHAYIBHILI: “Ludo lunotobeleja akale luneshe.” Akale, ludo “alutozwishakila zwalwo, alutonyetela.” (1 BaKolinte 13:4, 5) Samai bachinotanga, zwiimo mulopa kuti ubige indangalilo jijo jose pamwana wenu. Undume uwo angatanga kubona sokuti wondamwa, nokudalo usikanganilwe kuti naiye unoda bo kutondejelwa ludo. Ungotobelejela akale ube neshe, ungombhancha umwe uwo kuti ewhe ediwa akale ebhataniswa pakubabayilila mwana wenu.

“Imwi balume . . . galani panhu pamwe nabakaji benu noluzibo.” (1 Pita 3:7) Whisisisa kuti unkaji uwo unoopejela unshaji unji nesimba pamwana. Waba nemishingo mipya minji akale ingoonshusha, kuunyaja, kana kuumboja mwoyo. Panoumwe unshaji angakunyemela, koga kweja kujikama, nokuti “unojilwa kunyema umbhodo pana unhu una nenungo.” (Zwichimbe 16:32) Tondeja kuti unowhisisisa, akale umbhanche.—Zwichimbe 14:29.

ZWAWUNGATE:

• Satate: Bhancha unkaji uwo kubabayilila mwana busiku. Shomopaja unshaji wawunopejela pana zwumwe zwinhu kutila kuti uwane unshaji unji nonkaji uwo akale nomwana wenu

• Samai: Kana undume uwo eda kukubhancha kubabayilila mwana, vuma kubhanchwa. Kana akonelwa kuta zwibhodo unshingo yoyu, usuunkalalile, koga untondeje zwokuta nobunyolo

ZWINOLEBWA NEBHAYIBHILI: “Banooba inyama imwempela.” (Matangisilo 2:24) Kojoba mwaba nomwana, kumbulukwani kuti ‘muchinyama imwempela.’ Shingani nesimba kuti musimise ludo lwenu.

Bakaji, bokani lubhancho lwamunopiwa nabalume benu. Mawhi enu okuboka anotubula “kuchija.” (Zwichimbe 12:18) Balume, bujani bakaji benu kuti mobada kasa akale mobakoshesa. Babokeni nenzila yabanobabayilila nayo imhuli.​—Zwichimbe 31:10, 28.

“Kusibe nounoshaka kuzwinakisila, koga kunakisila umwe uwe.” (1 BaKolinte 10:24) Gala uta zwilonakila umwe uwo. Zwipeni unshaji wokulebeleka, kubokana, akale kuwhililana. Penyaya jopabulo usizwishakile zwinoshantisa iwi woga. Yeya bo nozwinodiwa noumwe uwo. IBhayibhili linoti: “Musiminyane kuzhe kwokuti mwavumilana chete.” (1 BaKolinte 7:3-5) Nokudalo lebelekelanani mubhudilane pachena nozwenyaya yeyi. Kutobelejela akale nokuwhisisisa kwenu kunoosimisa ludo lwenu.

ZWAWUNGATE:

• Usikanganilwe kuba nonshaji wokuba pamwempela noumwe uwo

• Ita zwinhu zwitukutuku zwinota kuti umwe uwo ewhe ediwa, zwinanga sokuntumila imeseji pefoni kana kuti kuumpa chipo

ZWINOLEBWA NEBHAYIBHILI: “Kuvila kubucheche bubwo wakaziba makwalo machena, anotubula kukuchenjeja kuti uchijwe.” (2 Timoti 3:15) Longani zwamuchata kuti mulayije mwana wenu. Unotubula kulayijwa kasa, kojoba esanu azwalwa. Paanobeli muntumbu, mwana wenu unotubula kuwha mawhi enu akale namawhilo enu. Uumbalileni echincheche. Kojoba esinowhisisisa zwamumubala, zwinoombhancha kuti ede kubala paanobakubuka.

Mwana wenu aangabe untukutuku zwokuti angakonelwa kumuwha mulebeleka nozwaMwali. Namatani kuna Jehova mwana eliwhile. (Kuzhajikijwa 11:19) Pamunozana mose, lebelekani nozwinhu zwakabumbwa naMwali. (Lwimbo 78:3, 4) Mwana wenu paanobekubuka, unozwubona kuti moonda Jehova, akale naiye unoonda bo.

ZWAWUNGATE:

• Namata ukumbila buchenjevu bwokulayija mwana wenu

• Pamulula mawhi alokosha namaano kumwana wenu kutila kuti etange kulayijwa echintukutuku