Umbumbi wedu unabuchenjevu kupinda isu. SaTate bana ludo unotibabayilila. Akale aajakatibumba kuti tizwitonge. (Jelemiya 10:23) Tose toda kutungamililwa naMwali somwana ntukutuku unoda kutungamililwa nabazwali babe. (Izaya 48:17, 18) Zwinolebwa neBhayibhili chipo chinova kuna Mwali chinotitungamilila mubupenyu.​—Bala 2 Timoti 3:16.

Milawu yaJehova inotilayija malalamilo mabhodo ngweno akale nokutitondeja kuti tingoobuwana chini bupenyu businopela munelyamangwana. Mwali ndiye wakatibumba, nokudalo tokwelela kuumboka kuti unotitungamilila noludo.​—Bala Lwimbo 19:7, 11; Zwakatondejelwa 4:11.

Zwimwe zwinolebwa neBhayibhili zwinotitondeja yozwo Mwali zwaanoda kuti tite muzwimo zwilosiyana-siyana. (Kuzhajikijwa 22:8) Tokwelela kushingisa maano kuti tiwhisisise kuti zwimwe zwinolebwa neBhayibhili zwinoshinga chini mubupenyu bwedu. (Zwichimbe 2:10-12) Sonkwejaniso, iBhayibhili linotilayija kuti bupenyu chipo chinova kuna Mwali. Yozwo zwinolebwa neBhayibhili zwinotitungamilila kana tili kumishingo, pasha, akale tili palwendo. Yezwi zwinotisa kuti tisizwikubaje kana kukubaja bamwe.​—Bala Mishingo 17:28.

Jesu wakalebeleka nemilawu mibili ilokosha kasa. Wokutanga unotondeja chinangwa chobupenyu, chokuziba Mwali, kuunda, akale kuunamata tikabimbika. Tinokwelela kuyeyesesa nozwomulawu yoyu wokutanga muzwutalo zwedu zwose. (Zwichimbe 3:6) Banoonshingisa mulawu yoyu mubupenyu bwabo  banoba bakwayina baMwali, banowana lushanto lwechokomende, akale bupenyu businopela.​—Bala Mateu 22:36-38.

Mulawu wabili unota kuti tigalisane zwibuya nabamwe. (1 BaKolinte 13:4-7) Tingashingisa mulawu yoyu tobekwejejela Mwali pamabhatilo aanota banhu.​—Bala Mateu 7:12; 22:39, 40.

Milawu yeBhayibhili inolayija jimhuli kuti jingabhataniswa chini noludo. (BaKolose 3:12-14) IWhi lyaMwali linotabilija jimhuli nokujilayija ichokomende ilokosha yokuti undume nonkaji balolobolana abatokwelela kupambukana.​—Bala Matangisilo 2:24.

Kana tikatobeleja zwinolebwa neBhayibhili, zwingatibhancha kuti tilondote ifuma yedu akale tibe nolunyalalo lwendangalilo. Sonkwejaniso, beni bemishingo banoda bashingi banoshingisa zwinolebwa neBhayibhili pakubimbika nokusungwala. (Zwichimbe 10:4, 26; Hebhelu 13:18) Akale iWhi lyaMwali linotilayija kuti tigunchikane nozwinhu zwilokosha kasa akale tikoshese bukwayina bwedu naMwali kupinda kuda ifuma.​—Bala Mateu 6:24, 25, 33; 1 Timoti 6:8-10.

Kushingisa milawu yeBhayibhili kunotabilija bupenyu bwedu. (Zwichimbe 14:30; 22:24, 25) Sonkwejaniso, kuwhilila mulawu waMwali unojibisa kukolwa kunotitabilija pakuwana malwaji akale pakukubajwa. (Zwichimbe 23:20) Jehova unotivumila kunwa busukwa koga tisikolwe. (Lwimbo 104:15; 1 BaKolinte 6:10) Milawu yaMwali inotibhancha nokutilayija kuti tichenjelele zwatinota akale nemiyeyo yedu. (Lwimbo 119:97-100) MaKristo echokomende aatolemekeja milawu yaMwali kuti ebhanchikane chete. Koga banozwita kuti belemekeje Jehova.​—Bala Mateu 5:14-16.