CHILAYIJO 20

Kulongwa Kulota Igubungano

LIJA

Jehova ndiMwali ulolongeka. (1 BaKolinte 14:33) Tilolingilila kuti banhu babe bebebalongeka. Igubungano lyobuKristo lilolongeka chini? Tokwelela kutani kuti zunu zukwende zubhodo mugubungano?

1. Ndiyani unsholo wegubungano?

“Kristo ndiye unsholo wegubungano.” (BaEfesu 5:23) Unotungamilila unshingo unotiwa nabanhu baJehova elikudenga. Jesu wakabiga “undanda ulochenjela nowulobimbika” igapo lyabakulwana banaluzibo nebo banoshobwa bewi iGota Lyabatungamilili. (Balani Mateu 24:45-47.) IGota Lyabatungamilili ndilo limulayilila makubungano ose apo penyika sozwakabeta bapositoli nabakulwana bomuJerusalema. (Mishingo 15:2) Koga banhulume yaba abatoba batungamilili begubungano lyedu. Banotungamililwa naJehova neWhi lilye akale banozubiga pasi pobutungamilili bwaJesu.

2. Bakulwana banota nshingoni?

Bakulwana banhulume bechiKristo balosima pokunamata. Banolayija zumomuBhayibhili akale banoyembela igubungano belibhancha nokulikutayija. Abatolipwa ponshingo wabanota. Koga banoshinga “nokuzudila besinomanikijwa bezuta nomoyo wose, besinolingilila kuwana imali.” (1 Pita 5:1, 2) Bakulwana banobhanchwa nabashingilili begubungano, yabo banooba bakulwana begubungano mukunda konshaji.

IGota Lyabatungamilili linoponcha bamwe babakulwana kuti bebe bakwendeli bamakubungano. Banokwendela makubungano alosiyana-siyana bebalayilija inzila yokuta nayo nshingo akale nokubakutayija. Ndibo banoponcha bakulwana nabashingilili begubungano koga banotanga nokulinga kuti banowililana nozumomuMakwalo na.—1 Timoti 3:1-10, 12; Titosi 1:5-9.

3. UnSumikiji umwe nomwe unokwelela kutani?

Unhu wose umomugubungano “unokuja izina lyaJehova” nokushanganyila pamishangano yegubungano akale unota unshingo wokupupula zukwendelana nozumo zuzwe.—Balani Lwimbo 148:12, 13.

FUNDA ZUNJI

Funda kuti Jesu untungamilili ulichini akale kuti bakulwana banokweja chini kuntobeleja nokuti tingawhilila chini akale kuti tingabhatisana chini naJesu nabakulwana.

4. Jesu untungamili umbodo

Jesu umukoka banhu kuti bezhe kuna iye. Balani Mateu 11:28-30, akale kwejisani nombuzo yoyu:

Jesu unoda kuti tiwhe chini nobutungamilili bubwe?

Bakulwana banonkwejejela chini Jesu? Yebani iVIDIYO.

IVIDIYO: Abadala Bancedisa Ngemva Kokuzamazama Komhlaba Enepal (4:56)

IBhayibhili linolayija bakulwana begubungano kuti bangata chini unshingo wabo.

Balani Izaya 32:2 na 1 Pita 5:1-3, akale kwejisani nemibhuzo yeyi:

Unowha chini nechido chabakulwana begubungano chokuba neshe saJesu?
Ndijipi jimwe nzila bakulwana begubungano jabangakwejejela najo Jesu?

5. Bakulwana begubungano banota zwabanolayija

Jesu unoda kuti bakulwana begubungano bebone chini unshingo wabo? Yebani iVIDIYO.

IVIDIYO: Abadala Benza Umsebenzi Wokukhokhela! (7:39)

Jesu unkwejaniso umbodo kunabo banotungamilila makubungano. Balani Mateu 23:8-12, akale kwejisani nombuzo yoyu:

Unsiyano upi wakunakilija upo pakati pabakulwana begubungano nabatungamilili baamwe machechi penyaya yokutobeleja zunolebwa neBhayibhili?

Bakulwana begubungano nemhuli jabo banokweja kugala bekasima pazunu zokunamata
Bakulwana begubungano banobabayilila unhu wose umomugubungano
Bakulwana begubungano banogala bepupula indebo imbuya
Bakulwana begubungano balayiji. Banobhanchija panemwe mishingo inanga sokuchenesa indawo yokunamata

6. Tokwanisa kushinga pamwempela nabakulwana begubungano

IBhayibhili linotibuja kuti neni zukakosha kushinga pamwempela nabakulwana begubungano. Balani BaHebhelu 13:17, akale kwejisani nemibhuzo yeyi:

Ubweni sokuti zubhodo na kuwhilila bakulwana begubungano? Neni udalo?

Balani Luka 16:10, akale kwejisani nombuzo yoyu:

Neni tikwelela kuwhilila bakulwana begubungano nomuzunu zutukutuku?

BAMWE BANOTI: “Azuna nshingo kuti wangwina ipi chechi nasi mangwana usiko ngwina imwe.”

Neni zukakosha kuti unhu ebe nechechi yaanongwina?

INI ZWAWAFUNDA

Jesu unsholo wegubungano. Toshanta kushinga pamwempela nabakulwana begubungano yabo banoshinga beli pasi pape akale nokutikutayija beta zwabanolayija.