Wakabafilwa nonhu wawunodisisisa na? Pamwe wakazubhuza pawakabelwajilwa kuti: ‘Ini zunotikana patinofa? Panachibimbo na chokuti tichoobona makamu edu akafa?’ Muchilayijo yechi nechinotobela tichabona inshandulo jinonyalaja jimomuBhayibhili.

1. Ini zunotikana patinofa?

Jesu wakakwejanisa lufu nokulala. Unhu ulofa nehope atobeziba zunobetikana. Kufa kunofanana chini nokulala? Kana unhu afa aatolwajilwa. Unhu angofa aachinowha bukata zusineni nokuti wakabebada chini makamu awe nabakwayina. “Bakafa abatoziba chinu,” linodalo iBhayibhili.​—Balani Mbhaunuli 9:5.

2. Kuziba ichokomende nolufu kunotibhancha chini?

Banhu banji banotya lufu akale nabanhu balofa! Koga kuziba zunolebwa neBhayibhili kunokwanisa kukunyalaja. Jesu wakati: “Ichokomende linoomusupula.” (Johani 8:32) IBhayibhili alitolayija kuti unhu angofa umpepo uwe unosala ulimpenyu sozunolayijwa kunaamwe machechi. Zuva kuti akuna unhu unosheta kana afa. Nokudalo kana balofa besina chabanoziba abatokwanisa kutikubaja. Akuna chizatu chokubashantisa, kubanamata kana kuti kubanamatila.

Bamwe banhu banoti banokwanisa kulebeleka nabakafa. Koga yozu azutotubukana. Sozwatafunda “bakafa abatoziba chinu.” Yabo banoyeya kuti bamukulebeleka namakamu abo akafa banosobelebeleka namadimoni yayo anozuta banhu balofa. Kuziba ichokomende kunotitabilija kumadimoni. Jehova unotilimukisa kuti tisikweje kulebeleka nabanhu balofa nendaba jokuti unoziba kuti madimoni anotikubaja.​—Balani Kuzhajikijwa 18:10-​12.

3. Funda ichokomende pezhulu pechimo chabakafa

Munyika yose, banhu banodimbwa zulosiyana-siyana nozunotikana kana unhu afa. Koga azutova kuti zose zwabanoleba ngizwechokomende.

• Kwawunogala banhu banoti ini zunotikana kana unhu afa?

 4. Kuziba ichokomende pezhulu polufu kunotibhancha

Kuziba ichokomende nozolufu kunotisupula mukutya bakafa. Balani Mbhaunuli 9:10, akale kwejisani nombuzo yoyu:

• Bakafa bangatikubaja na?

Ichokomende imomuBhayibhili inotitabilija kumanyepwa okuti tokwelela kushantisa bakafa nokubanamata. Balani Izaya 8:19 naZwakatondejelwa 4:11, akale kwejisani nombuzo unotobela:

• Ubweni sokuti Jehova unowha chini paanobona unhu enamata kana kuti epota lubhancho kubakafa?

5. Kuziba ichokomende pezhulu polufu kunotinyalaja

Banhu banji banolayijwa kuti bangofa banolangwa pezhulu pozubi zwabo zwabakabeta. Koga zunotinyalaja kuziba kuti apana unhu unolangwa kana afa kojoba naabo bakata zubi zukulwana. Balani BaRoma 6:7, akale kwejisani nombuzo yoyu:

• Sozwatafunda muBhayibhili kuti lufu lunotisupula muchibi ubweni sokuti kana unhu afa unolangwa nokuda kozubi zwaakata na?

Ungondilila mbeli ufunda nozwaJehova uchabona kuti aatolanga bakafa. Balani Kuzhajikijwa 32:4 na1 Johani 4:8, akale kwejisani nemibhuzo yeyi:

• Mwali unabunhu bubhodo bwalebwa mumavesi yaya angalanga banhu balofa na?

• Kuziba kwawakata ichokomende pezhulu polufu kunokunyalaja na? Neni udalo?

 INI ZWAWAFUNDA

Unhu angofa zwapela. Bakafa abatolangwa akale abatotikubaja.

Kubwilulula

• Ini zunotikana patinofa?

• Kuziba ichokomende pezhulu polufu kunotibhancha chini?

• Kuziba ichokomende pezhulu polufu kunotinyalaja chini?