Omo muyi we Lubumbashi (République démocratique du Congo), obuhimbe bw’ebindi bisenge eby’ebeteli bunemulola embere yo ndeke. Twanzire tuti kumbe oko Mwisi 5, 2022, abanyabeteli nga 260 ibahumira omo bisenge bihya ebyo, n’abandi banyabeteli 131 ibasighala omo bisenge by’ebeteli ebiri e Kinshasa a. N’obuhimbe bw’ebindi bisenge eby’erikalamo nabo bwabiritsuka hakuhi n’ebeteli ye Kinshasa. Twanzire tuti kumbe eritsuka oko Mwisi 1, 2024, abanyabeteli 48 ibikala omo bisenge ebyo. Amanyumba wosi awakahimbawa ayo akendiwatikya oko mubírí w’ekiteokrasi owanemukanyirira omo République démocratique du Congo n’omo Congo Brazzaville.

Omo mwaka w’omubírí we 2021, abaghala wetu ab’omo République démocratique du Congo mubatsukisya amafunzo w’eBiblia awalengire oko 250 000 n’abandu abalabire oko miliyoni moya mubahika oko muhindano w’Eryibuka Oluholo lwa Yesu. Lino oko beteli ye Kinshasa kuli abanyabeteli 394.

Kundi omwanya abya inyabiribya muke omo kibanza ekirimo ebeteli ye Kinshasa, abaghala betu mubarondya emyanya omo yindi miyi, neryo mubabana omo muyi we Lubumbashi mw’ekibanza ekyuwene ekyangahimbwamo eBeteli kandi ikyanganatasyakolesibwa oko yindi myatsi omo biro bikasa erikwamana ngoko omubírí w’eritulira akendilola embere omo Congo (Kinshasa).

Omuyi we Lubumbashi akabanika oko bilometere 2 300 erilwa e Kinshasa. Ekibanza kihya-kihya ni ky’esyohekitare 12 kandi kikendihimbwamo ebyumba by’erikalamo, esyobiro, edepo nene n’ekyumba kinene eky’eriliramo eky’anganakolesibwa omo yindi myatsi mbiririmbiriri.

Emibírí eyatsuka oko mwisi we 10, 2020, yinemulola embere n’omo hane ebikakiryo bingyi busana n’ekihunzo kye KORONA.

Mughala wetu Robert Elongo, ow’omo katunga aky’eBeteli ye Congo (Kinshasa) akabugha ati: “Erikingwa ry’emitano y’ebihugho mulyaleka ikyakala eribana ebindu by’erihimbamo n’ekyo mukyaleka emibírí y’erimbere y’obuhimbe iyaghenda bolobolo.”

Aliwe kandi mughala wetu Elongo akasyatomekako ati, “Omo mwaka mughuma musa, hakuhi nusu y’emibírí y’erimbere y’obuhimbe yabya iyamabihwa.”

Kilangirikire ndekendeke ngoko Yehova anemutsumula endegheka eyi y’erihimba eBeteli nyihya. Tunemusaba tuti ebisenge bihya ebi ebyamatomekwa oko ‘bindu bya Kristo’ biwatikaye eriminyisya ndeke abandu b’oMungu n’eripipa erina rya Yehova.​—Matayo 24:47.