TAREHE 26 OMWISI 3 2020
ESYONGULU OMO KIHUGHO KYOSI
Abimiri ba Yehova banemukolesya esyonzira nyihya-nyihya erilola embere eritulira omo mughulu w’ekihunzo ky’obukoni bw’ekorona
Obukoni bwe korona (kutse COVID-19) bwabirihamba kutsibu oko ngebe ey’obulikiro y’Abimiri ba Yehova. Banemuyikasa erighendera oko busondoli bw’abakulu b’eguvernema, aliwe ibanemulola embere n’emipango yabo y’eriramya. Omo bitsweka eyiri Abimiri ba Yehova ebihambirweko kutsibu omo bukoni obu, balikyetu banemukolesya esyonzira sy’embaghane erilola embere eritulira.
Mughala wetu we Pisa, omo Itali, mwabugha ati: “Omubiri w’eritulira abiritsemesya kutsibu! Kundi abandu hatya bali eka, ingye na mukali waghe mutwalebya esyonamba sy’abandu abali omo syo telefone syetu, neryo twamapanga erikania nabo erilabira e videoconference. Lino tuwite abigha bangyi b’eBiblia n’abangyi b’erisubira, abahya, n’abo twakanaya nabo embere; neryo tukabya n’akanya k’erilabya endambi nene omwitulira n’eribana ebighuma ebyuwene.”
Omo Korea y’Endina, obukoni bwe korona bwabirileka abatuliri bangyi ibakolesya kutsibu e site yetu ye Internete, jw.org ne app eye JW Library. Eky’erileberyako, Mughala wetu, kitsumbukirania mwabana omulaghe erilua oko mundu oyo abya ak’igha naye kera eBiblia myaka ng’isatu enyuma, aliwe iniabirileka erigha. Omwigha oyu mwabugha ati obukoni obu bwabirileka inialengekania kutsibu oko kiminyikalo ky’ebiro by’enduli. Mughala wetu mwakolesya e JW Library app eritumira omwigha oyo y’emyatsi y’erisoma eyihambene n’ebiro by’enduli. Mughala wetu akabugha ati “kikatsemesaya erilangira abandu bakabuka omo bulengekania busana n’ebighuma by’oko kiminyikalo ky’ebiro by’enduli, bakatasyanza eriminya bingyi oko Mungu n’eBiblia.”
Esyongulu nyingyi erilua eyiri balikyetu eritimba omo kihugho kyosi sikakanganaya ngoko balikyetu bakalangira omubiri wabo w’eritulira mo w’omughaso munene. Kikatsemesaya erilangira ngoko banemukolesya amenge erilola embere eritulughania engulu yuwene.—Mika 6:9.
Omuleberererya w’omutimbo, e Puerto Rico, anemusondola omuhindano w’eriyatulira
Bali betu abapainia, e Bujeremani, banemuhandika haghuma esyobaruha ibane n’oko ndegheka ye video-conference
Omwigha anemweghesibwa omo Korea y’Endina
Abatahenie e France banemusangira omw’itulira ery’oko telefone
Mwali wetu na mughala wiwe banemuhandika esyobaruha e Hawaii