Busana n’eribya ini kyolo oko abakekeluhire erihambwa n’obukoni obu, balikyetu abali omo mibere eyi babiriyikasa kutsibu erighendera oko busondoli obunemuhebwa erilua oko banganga n’eriligha eribya eka. Aliwe eka sibaliyo omo mbwera kutse er’ikalayo buyira. Banemukolesya eteknolojia erisangira omo mihindano n’omw’itulira.

E Roma, omo Italy, mwali wetu oyukekeluhire owe myaka 94, oywabatisibawa oko mwaka 1952, atula isyalilua eka busana n’eritendibya n’akaghala, nibya obukoni obu isibuli bwasa. N’omo anabya iniakanakwama emihindano oko JW Stream, abya iniabirilabya mughulu muli isyaliatasangira omo mihindano y’endeko yiwe. Aliwe lino, kundi abasyakulu banemusondola emihindano omw’ikolesya endegheka eye videoconference, lero naye anemulangira balikyetu ab’omo ndeko yiwe.

Omo Spanish Fork, Utah, e Amerika, mwali wetu Stephanie Aitken ni mutsiha. Abiritwalwa eyo bakateghaya abakekeluhire. Sibakilighira abandu eriyabalebya erilua ehihya. Omusyakulu w’endeko na mukali wiwe mubayayo eriyamuwatikya erihira oko tablete yiwe kwe app eyangawatikya oko ndegheka eye videoconference. Mubabya bakamubwira eky’erikola omw’ikolesya omubughe w’abatsiha ibane oko lukyo lw’ekiyo isibat’ingira. Abere abitoka erihira e app eyi omo tablete yiwe, mwali wetu Aitken, mwakangania eritsema liwe omw’ihambira etablete yiwe oko kikuba. Atsemire kutsibu kundi akendibya akakanirania n’ab’omo ndeko kiwe.

Omughulu balikyetu omo kihugho kyosi, n’abakekeluhuhire ibaneko, banemuyikasa erikolesya eteknolojia erilaba omo kihunzo ky’obukoni bw’ekorona, kikaleka itw’ibuka omulaghe wa Yehova, owo abugha ati abandu bakendisyalya “amasabu w’ebihanda.” (Isaya 60:16) Tuyiketere ngoko mughulu wosi Yehova iyo akayisogha eribya ekyo abaghombe biwe b’oko kihugho bakayitagha omo mighulu y’obulighe.