Madián na Marcela babya n’engebe eyitekene omo muyi munene w’eMedellín, eColombie. Madián iniawite omubiri owuwene, owabatokesaya eribya omo nyumba eyuwene. Aliwe muhabya ekindu kilebe ekyaleka ibatasyalengekania buhya oko ebyo ibo ng’abaghombe ba Yehova Mungu batolere ibahira embere omo ngebe yabo. Bakabugha bati: “Oko mwaka 2006 mutwaghenda oko muhindano w’embaghane owabya n’omutwe ‘Mubye n’eriso ryolo.’ Emikania mingyi yabya yikakania kutsibu oko mughaso w’eryanguhya engebe busana n’erikolera oMungu yo kutsibu. Omughulu twalwa oko muhindano, mutwalangira ngoko itwe situlyanguhaya engebe yetu. Mutwafumbula ngoko tukaghula ebindu omwikarwa kandi ngoko tuli n’omwinda munene w’eriliha.”

 Emikania eyo, muyaleka Madián na Marcela ibalangira ngoko batolere ibakola esyombinduka omo ngebe yabo, neryo mubatsuka eryanguhya engebe yabo. Bakabugha bati: “Mutwaleka eribya tukaghula-ghula ebindu bingyi. Mutwahumira omo nyumba nge, twamaghulya omutoka wetu neryo twamaghula epiki-piki.” Kandi, mubaleka eribya bakayaghulira ebindu by’omo maduka manene-manene bakasyalengwako erighula ebingyi. Mubatsuka erilabya endambi nene bakakania n’abahimbani babo oko Biblia. Kandi mubabya bakalabya endambi nene haghuma n’abira ababya bakakolera Yehova n’omuhwa. Abira abo babya ini bapainia b’embaghane. *

 Enyuma syaho, Madián na Marcela mubayisogha erikola ebingyi omo mubiri wa Yehova, bamahumira omo ndeko y’omo mulongo mulebe, eyabya obwagha. Eritoka ekyo, Madián mwaleka omubiri. Omukulu w’omubiri mwamubwira ati omutwe wiwe abiritsanda. Neryo Madián mwalengekania naye, amamubulya ati: “Ukabana esyofranga nyingyi, aliwe unatsemire?” Omukali oyo mwabugha ati syatsemire kundi awite amaligho mangyi awate angatoka eribugha. Neryo Madián mwabugha naye ati: “Kwesi eky’omughaso si sy’esyofranga esyo ukabana, aliwe ry’eriminya ekyangakuletera obutseme omo ngebe.”

 Madián na Marcela babiribana obutseme bw’ekwenene n’eriyowa ibatekene ndeke omwilandamirira emyatsi y’obunya-kirimu. Hamabilaba emyaka 13, ibanemukolera omo syondeko esiri n’obwagha omo kiharo ky’amalengera w’endata omo Colombie. Kandi lino, bali n’olusunzo lw’erikola ng’abapainia b’embaghane.