Danielle, omughuma w’oko bimiri ba Yehova oyo wikere omo Afrika y’Endina; mwabughula akagode ako omukiliya abya iniabiribirirwa omo kafetaria aho ayanywira etsayi. Omo kagode ako mwabya akandi kafuko kake akabyamo esyofranga n’amakarte w’ebange. Kundi Danielle abya anzire kutsibu erisubya akagode ako k’oko mwenyeko, mwasondya muko mwe adresse n’enimero y’etelefone y’omwenyeko, aliwe, erina lisa ly’omulume mulebe ly’abanamo. Mwayikasa erikania n’omulume oyo erilabira ebange eyaliko, aliwe mwatamubana. Mwatabunika mutima, mwabirikira omudoktere mughuma oko nimero eyabana oko kapapura k’erilihirako akabya omo kagode ako. Oyo wasubiraya oko telephone mwaligha ati ekendiha omulume omwenye kagode y’enimero ya Danielle.

 Omulume oyo mwasweka omundu w’omo biro y’omudoktere wiwe akamubirikira, n’erimubwira ati Danielle abiribughula akagode kiwe kandi ngoko anzire erimusubuliryako. Abere akay’endako, mwabandana na Danielle na baba wiwe. Mobakolesya akanya ako erimubwira ekiryaleka ibayikasa erimuronda. Mobamubwira ngoko ni Bimiri ba Yehova, kandi ngoko bakayikasa eribyaho erikwamana n’esyokanuni sy’eBiblia. Kyo kikaleka ibayikasa eribya b’ekwenene ebiro byosi.—Abaebrania 13:18.

 Habere halaba esyosaha nga sy’esyo, omulume oyo mwatumira Danielle na baba wiwe b’emesaje akatasyabasima busana n’erisubulya akagode kiwe n’akafuko akabyamo. Mwahandika ati: “Ngabasima kutsibu busana n’akaghala ako mulyahiraho mukanyironda. Mongatsema kutsibu erikulolako n’ekihanda kyenyu, kandi siniendisyibirirwa olwanzo n’eritsomana ebyo mwanyikanganaya. Eribakangania erisima ryaghe, nyanzire inabaha ekihembo. Nyinasi ngoko mukaligha eriherera emyatsi mingyi busana n’eriberererya omubiri ogho oMungu abiribaha. Emikolere yenyu yikakanganaya nga muli bandu abali bati, ngoko Danielle analyakanganayakyo omw’ibya w’ekwenene kandi mutaleghula. Ngatasyabugha nyiti wasingya, n’oMungu atsumule omubiri wenyu.”

 Emisi milebe enyuma syaho, baba wa Danielle mwasyabandana n’omulume oyo, naye mwamukanirya ekyabya biro bilebe embere syaho omughulu abughula akamalete k’erihekamo esyofranga. Inyanemughula ebindu mwalangira akamalete ikabiritoghera ahisi. Abere asungana n’omukali oyo watoghayako n’erimusubuliryako, mwamubwira nga niki kyo kiryamukuna erimusubuliryako. Habya isihehalaba mughulu muli naye inyamabikolerwa eritegheko ry’erikola omo kwenene. Mwabugha ati: “Eritegheko rike ry’erikola omo kwenene, rikakolaya oko rindi ritegheko, n’ekyo ikyawatikya obuli mundu.”