Osman haghuma n’omukali wiwe na mwali wabo babya bakatulira oko prezantware hakuhi n’ekimbaseke omo Chili. Kitsumbukirania, abandu bangyi mubasa bakawata esyonyimbo omo mulenge muli. Abaghuma ba mubo mubasosekania Osman n’omupasitere w’omo kisomo kyabo, neryo mubaya hakuhi naye, bamamukumbatira, n’eribugha bati, “Wasingya erihika oko ndambi, Pasitere, tulwe tukakulindirira!”

 Nomo Osman anabya akasonda eribabwira ngoko babirimusosekania, abandu bangyi ababya bakaleta olukanda abo mubatowa. Esyodakika nge enyuma, ekikumula ekyo kyabiya omo kimbaseke, ekikuto kike mukyasuba enyuma n’erimubwira kiti, “Pasitere, tunakulindirire omo kimbaseke.”

 Olukanda lwabere lwakeha, Osman mwababwira nga nindi kandi ng’ali aho busanaki. Enyuma sy’erihitana busanaki omupasitere wabo syetahika, mubabwira Osman bati, “Wanganasa n’eribwira ekikumula ebinywa bike ebikalua omo Biblia?” Osman mwaligha.

 Bakaya ekimbaseke, Osman mwababulya amabulyo oko oyulyahola neryo mwalengekania oko masako malebe agho angakaniako. Babere bahika ekimbaseke, mwatsuka eriyiminyikalya oko kikumula ky’abandu n’eribugha ati iye nga Mwimiri wa Yehova, akasangira oko mubírí w’eritulaghania engulu mbuya oko bandu.

 Nikwa, mwakolesya erisako ry’Eribisulirwa 21:3, 4 ne Yoane 5:28, 29, n’eribugha ngoko abandu erihola si sonda ry’oMungu. Oko kwenene, mwabugha ati, hakisiya hake oMungu inyalubukya abaholi, kandi basyabya n’amaha w’erisyabyaho oko kihugho ko kera na kera. Osman abere abugha, abangyi mubamukumbatira n’obutseme n’erimusima busana “n’engulu mbuya ya Yehova.” Neryo mwasuba oko prezantware.

 Babere babugha erita omuholi wabo, abandu balebe bakubo mubasa oko prezantware n’eribulya Osman n’ekihanda kiwe amabulyo oko Biblia. Mubakania oko ndambi nyiri, neryo mubaheka hakuhi ebitabu byosi ebyabya oko prezantware.