Mughala wetu Bryn, oyo wikere e Amerika omo kiharo ky’eCarolina y’endata, akakola omo katunga k’emyatsi y’amalupitali ak’ewabo, akakakanaya n’abanganga busana n’eriwatikya abakoni Bimiri ba Yehova eribana ebyo balaghireko.

 Busana n’ekihunzo kye KORONA amalupitali mangyi mwatabya akalighira abandu eriyasunga abakoni. Bryn mwabirikira oko telefone omwimaniri w’emyatsi y’ekisomo y’oko lupitali n’erimubulya ng’angawatikya ati abakoni Bimiri ba Yehova.

 Mobaha mughala wetu Bryn y’oghundi mwimaniri akanaye naye. Kundi ibaghanisirye abandu eriyabana abakoni, Bryn mwabulya ng’abanganaha abakoni Bimiri ba Yehova b’enimero yiwe atoke eribya akakania nabo oko telefone. Mobamulighira.

 Neryo Bryn mwalengekania oko bakakola oko lupitali. Mwabwira omwimaniri oyo ngoko akasima kutsibu busana n’omubiri owanemukolwa oko lupitali kandi ngoko ikirirye ko banakalire. Mwatomekako ati mwakasoma ngoko abandu ehosi-hosi, kutsibu-tsibu abakakola oko malupitali, banemuhangya-hangya kutsibu busana n’ekihunzo ky’ekorona.

 Oghundi mukulu oyo mwabugha ati kwenene e KORONA yabirileka oko lupitali ikwabya erihangya-hangya linene.

 Neryo Bryn mwabugha ati: “Oko site yetu ye enternete kune emyatsi eyangawatikya abandu erilwa n’erihangya-hangya. Wamabiya oko jw.org n’erihandika aho bakaronderaya emyatsi uti ‘erihangya-hangya,’ ighukendibanako emyatsi mingyi eyangasikya mutima abakoli b’oko lupitali.”

 Ibakinakanaya, omwimaniri oyo mwaya oko site, n’erihandika aho bakasonderaya emyatsi ati “erihangya-hangya,” neryo mwasunga emyatsi eyiriko. Mwatsema! Neryo mwabugha ati: “Ng’ikangya emyatsi eno y’omukulu. Emyatsi eno yikendiwatikya abakoli b’oko lupitali n’abandi bandu. Ngayatsapisayayo n’eribaghabirayo.”

 Habere halaba amayenga malebe, Bryn mwakania n’omukulu w’olupitali, naye mwamubwira ati mobakingula esite kandi ngoko mobatsapisirye emyatsi eyikanirye okw’ihangya-hangya. Mwabugha ati babirighabirayo abanganga n’abandi bakoli b’oko lupitali.

 Bryn mwabugha ati: “Omukulu oyo mwanyisima busana n’omubiri wetu kandi busana n’emyatsi eyuwene eyo tukahandika. Moyabawatikya kutsibu.”