Bakakunwa n’olwanzo oko Mungu n’oko bandu, Abamiri ba Yehova bakanza erikaniria abandu oko mwatsi w’omo Biblia, nibya n’abandu abababwira embere ngoko “sibatsemesibwe.” (Matayo 22:37-39) Olwanzo lwetu oko Mungu lukatukuna erikwama ekyalayiro ky’Omughala wiwe ekikabugha kiti “tuhubiraye abandu.” (Emibiiri 10:42; 1 Yohana 5:3) Ekyo kyo kikaleka itwatwalira abandu omulaghe w’oMungu ngendo-ngendo, ngoko abaminyereri banakola. (Yeremia 25:4) Kundi twanzire abandu, tukayikasa erikaniria abosi oko “engulu mbuya y’Obwami” eyikasabula engebe sy’abandu. Tukatwala engulu eyo nibya n’oko bandu ababugha aho mbere bati “sibatsemesibwe.”​—Matayo 24:14.

 Omughulu tukasuba eyo batubwira bati “sibatsemesibwe,” kangyi-kangyi tukanatasyabanayo ebighuma ebyuwene. Ekyo kikabya busana m’emyatsi isatu eno:

•   Abandu bakahuma.

•   Abandi b’omo nyumba eyo bakanatsemesibawa n’omulaghe wetu.

•   Abandu bakabinduka. Emyatsi y’ekihugho kutse emibere eyo omundu alimo yikanabinduka, n’ekyo ikyaleka abandi ibatasyalangira ngoko “balaghire oko Mungu” neryo ibatsuka eritsemera omulaghe w’eBiblia. (Matayo 5:3) Nibya n’abatutibitako bakanabindula emitima yabo, ngoko mukwenda Paulo akola.​—1 Timoteo 1:13.

 Nomo bine bitya, situlikasa omundu erituhulikirira. (1 Petro 3:15) Tunasi ngoko obuli mundu ali n’obwiranda bw’eriyisombolera ekisomo kiwe.​—Eryibuka Ebihano 30:19, 20.