Iyehe. Abimiri ba Yehova sibalighana eripata ekikato. Okw’ibo eripata ekikato ni yisogha ly’obuli Mukristo iyuwene. Abangyi b’oko Bimiri ba Yehova bakasombola eripata ekikato.

 Tukanza eribana obubalwa obuwene kandi tukatsemera ebyo abanganga bakakola bakasondyasondya esyodawa esyangatukakirya oko bukoni obukalire. Tukasima abanganga oko mubírí munene ogho bakakola n’eriyiherera lyabo, kutsibutsibu omo mughulu w’ebihunzo.

 Tukakwama ebyo abakulu b’ekihugho bakabwira abandu erikola omughulu w’ekihunzo. Ng’eky’erileberyako, eritsuka oko nzuko y’ekihunzo kye KORONA, twabirihira emyatsi n’esyovideo oko site yetu eye jw.org omo mibughe eyilabire oko 100, ebikibukaya abandu omughaso w’erisikya emighambo ey’erituteya oko bukoni eyo abakulu b’ewetu bakahiraho. Emyatsi n’esyovideo esyo mubyawatikya abandu erisikya emighambo ey’eritendisegheranako, eritendihindana kibiribiri oko mihindano y’abandu bangyi, eriheghuma omundu oko bandi amabihambwa n’obukoni, erinaba oko byala, erimbala amaske n’eyindi myatsi eyo abanganga n’abakulu b’Eleta bakasaba abandu.​—Abanya Roma 13:1, 2.

 Eritsuka kera, ebitabu byetu bikyibukaya abandu b’esyokanuni sino:

•   Omwatsi w’obubalya ni yisogha ly’omundu iye musa.​—Abanya Galatia 6:5.

   “[Egazeti eno] siyirisaba abandu erikwama obubalya bulebe n’erighana obundi, kandi siyirihana abandu oko myatsi y’ekinganga. Yikakanganaya emyatsi ngoko yiri neryo omusomi inaminya emyatsi n’eriyisogha iyuwene.”​—Amkeni!, ey’ekiro 8 omwisi 2, 1987 (Kifranza).

   “Ni yisogha ly’obuli mundu ekihanda kiwe nga kikendipata ekikato kutse iyehe.”​—Amkeni!, ey’ekiro 8 Omwisi 8, 1993 (Kifranza).

•   Tukarondaya obubalya kundi tukalangira engebe mo y’obughuli.​—Emibiri 17:28.

   “Omughulu bakalwala, Abimiri ba Yehova bakakolesaya obubalya bw’ekinganga batoke erilamibwa. Bakatsemera engebe. Busana nekyo, bakakola ekyosikyosi ekyangatokekana ekihambene n’Amasako, batoke eriteya engebe yabo oko birimo bingyi.”​—Akaleberyo k’Omuteya, aky’ekiro 1 Omwisi 10, 1975 (Kifranza).

   “Abimiri ba Yehova bakaligha. . . . obubalya bw’ekinganga. Banzire erisighala ibanakalire n’eribyaho oko birimo bingyi. Nga Luka, omughuma w’oko Bakristo ba kera oyuwabya munganga, Abimiri ba Yehova balebe nabo ni banganga. . . . Abimiri ba Yehova bakasima omubírí munene n’eriyiherera ery’abandu abakaha abandi b’obubalya. Kandi bakasima kutsibu abandu abakawatikaya erilamya amakoni wabo.”​—Akaleberyo k’Omuteya, aky’ekiro 1 Omwisi 2, 2011 (Kiswahili).