EBiblia muyabugha kera ngoko esyondwala (n’ebihunzo n’awandi makoni) bikendisabya omo biro by’enduli. (Luka 21:11) Ebihunzo ng’ebi sibughambu ni suyira erilua oko Mungu erikasa oko bandu busana n’ebibi byabo. Eky’erileberyako, erilabira Obwami bwiwe, oMungu akendibughaho lino-lino esyondwala n’amakoni.

•  EBiblia muyanakania kera oko bihunzo?

•  OMungu akanasuyira abandu omwibaletera esyondwala kwehi?

•  Ebihunzo bya munabwire ni suyira erilua oko Mungu kwehi?

•  Ebihunzo binemwendisyahwa kwehi?

•  Emilondo y’eBiblia eyikabugha oko syondwala

EBiblia siyirihula burora-rora obukoni bulebe kutse ekihunzo kilebe ng’Ekorona, eSida, kutse ekihunzo ekikahulawamo Grippe Espagnole. Aliwe muyabugha kera oko “syondwalaʼʼ (Eribisulirwa 6:8) Emyatsi eyo ni mighuma y’oko biminyikalo bye “biro byʼenyuma-nyuma,ʼʼ kandi ebikahulawamo “erihwererera lyʼemigulu“.​—2 Timoteo 3:1; Matayo 24:3.

EBiblia inabughire hake oko mighulu milebe eyo Mungu mwanasuyira abandu balebe omo syondwala. Eky’erileberyako, mwanaleta ebihagha oko bandu balebe. (Emiganzo 12:1-16; 2 Abami 5:20-27; 2 Emyatsi y’Emigulu 26:16-21) Aliwe, obukoni obo sibwabya bukasa ini kihunzo oko bandu bosi n’abateko lubanza. Mubwabya bukahika oko bandu ab’oMungu alyatswera busana n’eriyisamambula lyabo

Iyehe. Abandu balebe bakabugha bati oMungu akakolesaya esyondwala n’ebihunzo erisuyira abandu munabwire. Aliwe, eBiblia siyirimira omwatsi oyo. Busanaki?

Busana n’omwatsi mughuma ono, abandu balebe abakaramaya oMungu–abakera n’abalino​—mubalwala. Eky’erileberyako, omutaleghula Timoteo mwahikako “endwala yʼenda.ʼʼ (1 Timoteo 5:23) Aliwe eBiblia siyibughire yiti endwala eyo kyabya kiminyisyo ekikakanganaya ngoko oMungu amamughana. Kutya munabwire, abaghombe balebe bataleghula b’oMungu bakalwala kutse ibahikako obukoni obukalire. Kangyi-kangyi, abandu abo bakabya ibamabanika ahatuwene oko ndambi eyituwene.​—Omugambuli 9:11.

Aliwe eBiblia ikakangiriraya ngoko endambi y’oMungu ey’erisuyira ababi siyiriyahika. Tuli omo “kiro kyʼerilamibwaʼʼ​—ni mughulu owo oMungu akakokaya n’olwanzo lunene abandu bosi erimwasako n’eribana omulamo. (2 Abanya Korinto 6:2) Enzira nguma eyo akakolesaya erikokya abandu ry’erilabira omubiri w’eritulira owakakoleka omo kihugho kyosi owakakanaya oko​—“Engulu Yowene yʼobwami.ʼʼ​—Matayo 24:14.

Inga. EBiblia muyabugha embere yiti hakandisyabya omughulu owo sihandisyabya n’omundu n’omughuma oyukasyalwala. Omughulu oyo ali hakuhi n’erihika. Omo busondoli b’Obwami bwiwe, oMungu akasyalamya amakoni wosi. (Isaya 33:24; 35:5, 6) Akasyabughaho eryaghalwa, obulumi n’oluholo. (Eribisulirwa 21:4) Kandi akendisyalubukya ababirihola n’erihabo omubiri owatelwala oko kihugho kino omo mibere eyihikene.​—Esyonyimbo 37:29; Emibiri 24:15.

Eribisulirwa 6:8: “Talebaya, habya esabayiri yʼekigondo. Nʼoyo wikere kuyo erina liwe iyo Luholo, [ne Yisinda] moyakwamalo hakuhi. Nabo mobahabwa ehamuli. . . eriita. . . omo syondwala.ʼʼ

Ni bughambu: Obuminyereri obulebirye abalume bani abikere oko syosabayiri esikanibweko omo kitabu ky’Eribisulirwa bukakanganaya ngoko ebihunzo byangahikire oko biro bino