Ebiblia Yibughire Yitiki Okw’iherukania?
Erisubirya ry’eBiblia
EBiblia yikabugha yiti oMungu asondire abandu ‘ibayihighula oko busingiri.’ (1 Abanya Tesalonika 4:3) Ngoko kikolesibwe omo Biblia ekinywa “obusingiri” kikahiramo: Amaraghane, erikola emyatsi y’engyingo omo katikati k’abandu b’olubuto lughuma, n’erikola emyatsi y’engyingo omo katikati k’omulume n’omukali abatatahenie.
Busanaki ni ky’omughaso oko Mungu erilangira omulume n’omukali abikere haghuma nga banatahenie kutse iyehe?
OMungu yo watsukisaya endegheka y’endwa. Mwahiraho endegheka eyo, omughulu alungisaya omulume n’omukali ab’erimbere. (Enzuko 2:22-24) Mwatanza ati omulume n’omukali bikale haghuma isibatahenie.
OMungu anasi nga ni myatsi yahi yo yangaletera abandu b’endundi. Mwanza ati omulume n’omukali ibasighala haghuma omo ndwa mughulu muli, ekyo kyanganaletera endundi abandu bosi b’omo kihanda n’eribateya. Ebinywa ebiryahandikawa n’oyulyakokotaya ekindu kutse akataloge bikakanganaya ngoko ekindu ekyo kyangakolesibwa ndeke, kutya obusondoli obukalua oko Mungu bukatukanganaya ngoko twangabya n’obwira obuwene omo ndwa. Mughulu wosi esyokanuni sy’oMungu sikaletera abakakwamasyo b’endundi.—Isaya 48:17, 18.
Ebinywa ebikakanganaya ngoko twangakolesya ekindu kilebe, ebyahandikawa n’oyuwakokotaya ekindu ekyo, bikakuwatikaya eriminya ngoko wangakolesya ekindu ekyo kyo ndeke. Kutya n’amahano w’eBiblia n’agho akatuwatikaya eribya n’endwa eyuwene
Erikola emyatsi y’engyingo eyihya w’endwa kyanganasiramo ebitsibu ebikalire. Eky’erileberyako, kyanganasiramo obukule obo omundu atalw’anzire, amakoni awakasira omo busingiri, n’amaghali omo mutima. *
OMungu mwaha omulume n’omukali b’obutoki bw’eributa-butana omwikola emyatsi y’engyingo. OMungu akalangira engebe mo nyibuyirire, n’obutoki bw’eributa-butana ni kihembo ky’obughuli. OMungu anzire itwasikya ekihembo ekyo omw’ikenga endegheka y’endwa.—Abaebrania 13:4.
Twangabugha tutiki oko mulume n’omukali eritsuka bikala haghuma embere balunge balangire nga banatolerene?
Abandu eritsuka bikala haghuma embere sy’erilunga “balangire nga banatolerene” kyo kiteleka endwa iyuwana. Aliwe, obwira bukawata omughulu omulume n’omukali bali omo bughuma n’erihambana buke bwa kuboko eribugha esyombanza syabo. *Eriwatya ekihango ky’endwa.—Matayo 19:6.
Abatahenie bangawatya endwa yabo yo bati?
Sihali endwa eyihikahikene. Aliwe, abatahenie banganawatya endwa yabo omwikolesya amahano w’eBiblia. Tulebaye amahano malebe:
Uhire ebyo owo mwaghu alaghireko by’embere.—1 Abanya Korinto 7:3-5; Abanya Filipi 2:3, 4.
Mwanzane n’erisikania.—Abanya Efeso 5:25, 33.
Ubye ukateya olulimi lwaghu.—Emisyo 12:18.
Ubye n’omutima w’erilindirira kandi ubye ukaghanyira luba.—Abanya Kolosai 3:13, 14.
^ par. 10 Lebaya omwatsi “Vijana Wanauliza . . . Nangakolaki Bamabinihatikana Erikola Obusingiri?”
^ par. 13 Lebaya omwatsi ““Jamaa zenye kufaulu—Ahadi”.”
