Abakristo bikirirye ngoko Yesu mwahola busana n’amalolo w’abandu bosi. (1 Petero 3:18) Aliwe, erisyalamibwa lisabire bingyi kulenga erikirirya lisa ngoko Yesu ni mulamya. Esyombinga sikirirye ngoko Yesu ni “mughala w’oMungu,” aliwe sikalindirira erisyaheribwa butsira erisyalamibwa.​—Luka 4:41; Yuda 6.

•  Litolere inakolaki nitoke erisyalamibwa?

•  Twangabya n’amalengekania wahi oko “musabe w’omukoli w’amalolo”?

•  “Omusabe w’omukoli w’amalolo” atsuka ati?

• ●Litolere iwikirirya ngoko Yesu mwaherera engebe yiwe busana n’amalolo wetu. (Emibírí y’Abakwenda 16:30, 31; 1 Yoane 2:2) Ekyo kikahiramo erikirirya ngoko Yesu abya mundu kwenene-kwenene kandi ngoko ebyosi ebyo eBiblia yikabugha okw’iye ni by’ekwenene.

• Wighe ebyo eBiblia yikakangiriraya kwenene-kwenene. (2 Timoteo 3:15) EBiblia yikabugha yiti omukwenda Paulo na Sila mubabwira omuteya w’engomo bati: “Wikiriraye omukama Yesu, wasyalamibwa.” Neryo, enyuma syaho mubatsuka erikangirirya “ekinywa kya Yehova” * oko muteya w’engomo. (Emibírí y’Abakwenda 16:31, 32) Ekyo kikakanganaya ngoko omuteya w’engomo syangatokire erikirirya Yesu yo ndeke-ndeke amatendibya n’amakangirirya w’enzuko omo kinywa ky’oMungu. Abya inyalaghire eriminya amakangirirya w’ekwenene awaseghemere oko Masako.​—1 Timoteo 2:3, 4.

• Ubindule omutima. (Emibírí y’Abakwenda 3:19) Kandi litolere iwabindula omutima, kutse eriyikubya b’omo kutsibu busana n’emyatsi mibi eyo wabya ukalengekaniako n’eyo wakola kera. Abandi bakendilangira ngoko wabiribindula omutima omughulu ukendileka erikola emyatsi eyitetsemesaya oMungu n’erikola “emibírí eyikakanganaya eribinduka lyagu.”​—Emibírí y’Abakwenda 26:20.

• Ubatisibawe. (Matayo 28:19) Yesu mwabugha ati abandu abakabya bigha biwe batolere eribatisibwa. Omuteya w’engomo oyo tulyakanayako mwabatisibwa. (Emibírí y’Abakwenda 16:33) Kutya, omukwenda Petero abere akangirirya ekwenene oko Yesu oko kikumula ky’abandu, “abikiriraya ekinywa kiwe mubabatisibwa.”​—Emibírí y’Abakwenda 2:40, 41.

• Usikaye ebyalayiro bya Yesu. (Abaebrania 5:9) ‘Abakakwama ebyosi’ ebyo Yesu akangiriraya bakakanganaya omo mikolere yabo ngoko ni bigha biwe. (Matayo 28:20) Bakabya bandu “abakakola n’eriowa ekinywa ky’oMungu, butsira abakahulikirira lisa.”—Yakobo 1:22.

• Uyiyinaye erihika oko nduli. (Mariko 13:13) Litolere abigha ba Yesu “ibayiyinia” imo basyalamibwa. (Abaebrania 10:36) Eky’erileberyako, omukwenda Paulo mwayitsinga erikwama amakangirirya wosi wa Yesu n’erisighala mutaleghula oko Mungu, kandi mwayiyinia busana n’omwatsi oyo eritsuka ekiro abya Mukristo erihika omughulu ahola.​—1 Abanya Korinto 9:27.

Omo bisomo bilebe, abandu bakasaba emisabe milebe “ng’omusabe w’amukoli w’amalolo,” “n’omusabe w’omulamo.” Kwenene, abakakola emisabe eyo bakabya ibanasi ngoko ni bakoli b’amalolo kandi bakakanganaya ko bikirirye ngoko Yesu mwahola busana n’amalolo wabo. Kandi bakaligha Yesu abasondole omo ngebe yabo. Aliwe eBiblia siyikanirye oko “musabe w’abakoli b’amalolo” kutse siyibuyire yiti omusabe oyo atolere inyabya akasabwa.

Abandu balebe bakalengekanaya bati omundu abisaba “omusabe w’omukoli w’amalolo,” akayiketera kundu ngoko akendisyabana omulamo wa kera na kera. Aliwe omusabe iwo musa syangaleka omundu inyalamibwa. Kundi tuli bandu abatahika-hikene, tukinakola amalolo. (1 Yoane 1:8) Ekyo kyo kyaleka Yesu inyabwira abigha biwe ati babye bakasaba mughulu wosi busana n’erighanyirwa amalolo wabo. (Luka 11:2, 4) Eritomeka okw’ekyo, Abakristo balebe ababya bakakwamirira omulamo wa kera na kera mubaherya olusunzo olo kundi mubatogha kutse mubaleka erikolera oMungu.​—Abaebrania 6:4-6; 2 Petero 2:20, 21.

Abandu b’ehistoria bawite amalengekania awasighene oko nzuko “y’omusabe w’omukoli w’amalolo.” Abaghuma bakabugha bati omutsye oyo mwatsuka erikanyirira omughulu ekisomo ky’eKiprotestanti kyabya kikabindula-bindula emyatsi. Abandi bikirirye bati abandu mubatsuka erisaba “Omusabe w’omukukoli w’amalolo” omughulu ebisomo bihya-bihya byabya bikatsukisibwa omo karne eye 18 n’eye 19. Amasako syalighirene n’omutsye oyo n’ahake, oko kwenene erikola omusabe w’omukoli w’amalolo sikihambene n’amakangirirya w’eBiblia.