E Sitani Yisosire Yiti oko Kwenene?

CHINGULA

Erisubirya ry’eBiblia

E Sitani ni mulimu oyutelangirika, ekyo ni bughambu syawite omubiri owo twangalangira.—Abanya Efeso 6:11, 12.

Oko syopitsa nyingi esikumayire, e Sitani yisosire embene eyiriko amahembe, omukira, kandi yiwite oko kindu ekiri ng’ekikanya kinene. Abandu bangyi bakabugha bati esyopitsa sye Sitani ng’esyo syakolawa n’abandu ababyaho hamabilaba emyaka eyilengire oko 1 000, kandi babya bakakwama emibere y’abandu b’oko mughulu oyo n’esyohadisi sya kera esyamabehi.

EBiblia yikasosekanaya e Sitani naki?

EBiblia yikakanaya oko Sitani omo nzira mbiriri-mbiriri. Emyatsi eyo eBiblia yikakanaya oko Sitani yikatuwatikaya eriminya emibere ye Sitani butsira ngoko yisosire. Emighuma y’oko myatsi eyo y’eno:

Omumalaika w’ekyakakala. E Sitani yikateba abandu yiti yikabaha obwiranda kwesi iyikasonda erikunabo bakwame amakangirirya wayo butsira aw’oMungu.—2 Abanya Korinto 11:14.
Endale eyikaruruma. E Sitani yikalwa kutsibu n’abandu b’oMungu.—1 Petero 5:8.
Ekiyoka kinene. E Sitani yikubahisaya, yiwite akaghala, kandi yikaghalaya kutsibu.—Eribisulirwa 12:9.

Amasako w’eBiblia awalebirye e Sitani

2 Abanya Korinto 11:14: “Sitani nayo yikayisosekanaya ng’omumalaika w’ekyakakala.”

Ni bughambu: E Sitani yikateba abandu yiti yikabaha obwiranda kwesi iyikasonda erikunabo bakwame amakangirirya wayo butsira aw’oMungu.
Abanya Efeso 6:11: ‘Mwambale ebindu byosi by’amalwa by’oMungu imwatoka erihangana n’erilwa n’amenge wa Sitani.’

Ni bughambu: E Sitani yikakolesaya ebitegho mbiriri-mbiriri yikasonda erikuna abandu eritendyowa oMungu.
Yakobo 4:7: ‘Neryo mwolobe embere sy’oMungu; mulwe n’eSitani nayo yikendisyabasagha.’

Ni bughambu: Omundu anganakinda e Sitani amabyowa oMungu omo mwanya w’eryowa e Sitani.
1 Petero 5:8: “Enzighu yenyu Sitani yikaghenda-ghenda ng’endale eyikaruruma n’erisonda-sonda oyo yangalya.”

Ni bughambu: E Sitani yiponire abandu abakowa oMungu kandi yanzire eritsandya obwira bwabo haghuma n’oMungu.