Maria Magdalena Abya Ndi?

CHINGULA

Erisubirya ry’eBiblia

Maria Magdalena abya mwigha mutaleghula wa Kristo Yesu. Alinga erina liwe Magdalena, likasira oko muyi we Magdala (kitokekene e Magadan), omuyi owabya hakuhi n’engetse ye Galilaya. Alinga Maria mwanikalayo oko mughulu mulebe.

Maria Magdalena abya mukali mughuma oko bangyi ababya bakaghenda haghuma na Yesu n’abigha biwe kandi mwabawatikya n’ebyo babya balaghireko kinya-mubiri. (Luka 8:1-3) Mwayilangirira oluholo lwa Yesu, kandi abya oko bandu b’erimbere abalangira Yesu enyuma sy’erilubuka liwe.—Mariko 15:40; Yoane 20:11-18.

Maria Magdalena abya mumbalaka kwehi?

Èbiblia siyibughire yiti Maria Magdalena abya mumbalaka. Yesu erimulusyako esyombinga irinda wo na mwatsi owo eBiblia yikakanaya oko maisa wiwe.—Luka 8:2.

Omwatsi w’eribugha ambu abya mumbalaka asirira hayi? Emyaka mingyi enyuma sy’oluholo lwiwe, abandu balebe ibakelengekanaya bati Maria Magdalena y’on’omukali oyutasibwe rina (alinga omumbalaka) oyo ‘watsapaya ebisando bya Yesu omo misonia yiwe n’erisangulabyo omo nzwiri sy’omutwe wiwe.’ (Luka 7:36-38) Aliwe, sihali mwatsi wosi-wosi omo Biblia owakakanganaya ekyo.

Maria Magdalena abya “mukwenda w’abakwenda” kwehi?

Iyehe. Ekisomo ky’eKikatoliki kikahula Maria mo “Mubuyirire Maria Magdalena” kandi “mukwenda w’abakwenda” kundi abya w’erimbere erikolya engulu y’erilubuka lya Yesu oko bakwenda. (Yoane 20:18) Aliwe ekyo mukitaleka inyabya mukwenda. Kandi sihali aho eBiblia yibughire yiti abya mukwenda.—Luka 6:12-16.

Ebiblia yosi muyahwa erihandikwa ekarne y’erimbere M.W. yikasonda erihwa. Aliwe, abakulu b’ekisomo mubayisogha eryahula Maria Magdalena mo “mubuyirire” omo karne ye 6. Emyatsi mingyi eyahandikawa eritsuka oko mwaka 100-300 yikakanaya oko bakwenda balebe ba Yesu omo mibere y’eribya nga babya bakatsura Maria Magdalena. Aliwe emyatsi eyo si bitsweka by’eBiblia. Esyohadisi sy’eriyitungira esyo si bitsweka by’Amasako awasondolawa n’ekirimu ky’oMungu.