‘Neryo oMungu mwabuga ati, Tuhangike omundu omo musindo, nʼomo kisosekanio kyetu, atabale oko mahere wʼomo ngetsi nʼoko syonyonyu syʼomo kyanya, nʼoko syonyama, nʼoko kihugo kyosi, nʼoko buli kindu ekikaku­luluka oko kitaka.’—Enzuko 1:26, KB80.

 Abandu mubahangyikwa omo kisosekanio ky’oMungu, ibane n’obutoki bw’erikulya n’erikangania emibere eyo oMungu awite ng’olwanzo, erikwira abandu b’obulighe, n’eritunganene. Ekyo kyo kikaleka abandu ibaberererya munabwire emibere y’oMungu.

 ‘OMungu mwabuga ati, Tuhangike omundu omo kisosekanio kyetu.’ Embere Yehova * Mungu ahangyike omundu wosi-wosi kutse ekindu kyosi-kyosi, mwahangyika omundu w’ekirimu ow’amaka oyo enyuma aminyikala mo Yesu. OMungu, “mwahangika ebindu byosi omo byala bya Kristo, ebiri omo lubula, nʼebiri oko kihugo.” (Abanya Kolosai 1:16) Yesu awite emibere ya Yehova, ‘ni kisosekano ky’oMungu oyutelolawako.’ (Abanya Kolosai 1:15) Neryo kyo kyaleka oMungu inyabwira Yesu ati: “Tuhangike omundu omo kisosekanio kyetu.”

 “Atabale. . . oko syonyama, nʼoko kihugo kyosi.” Esyonyama mositahangyikwa omo kisosekanio ky’oMungu. Musitabumbwa eribya n’emibere eyo abandu bali nayo ng’olwanzo kutse eribya n’obunyamutima. Nomo bine bibya, oMungu anatsomene esyonyama. Ekyo kyo kyaleka inyabugha ati abandu “batabale” esyonyama, kandi ebinywa ebyo byanganabindulwa mo “eritabala oko” (Nouvelle Version Internationale) kutse “erisulubirira” (Bible Anglaise Commune). Neryo Yehova mwaha abandu b’omubírí w’eriteya esyonyama. (Esyonyimbo 8:6-8; Emisyo 12:10) Yehova anzire abandu ibabya bateya babuya b’ekihugho n’ebyosi ebiri mukyo.

 Esyosura ibiri sy’eritangirirya Enzuko sikatukaniraya okw’ihangyikwa ry’ekihugho n’ekyanya kyosi, ekihugho ekyo twikereko, n’engebe oko kihugho. Obuli kindu ekyo Yehova ahangyika kikaswekaya, aliwe abandu bo bihangyikwa biwe ebikaswekaya kutsibu oko kihugho. Omughulu oMungu abugha emibírí yiwe y’erihangyika, “mwalangira obuli kindu ahangika, talebaya ko kyowene kutsibu.”—Enzuko 1:31.

 Lebaya evideo nguhi eno utoke erigha bingyi oko myatsi eyilebirye erihangyika eyikabanika omo kitabu ky’Enzuko.

 Eryowa muhanda: Abalume basa, bo bawite obutoki bw’erigha kutse erikangania emibere y’oMungu.

 Ekwenene: OMungu na Yesu bawite obwira obuwene obukabya omo kati-kati ka tata n’omughala, aliwe si mundu mughuma. Yesu mwakangirirya ngoko oMungu amulengire. (Yoane 14:28) Eriminya bingyi, lebaya evideo Yesu Kristo yo Mungu? kutse soma omwatsi “Busanaki Yesu akahulawa mo oMughala w’oMungu?”

 Lebaya evideo nguhi eno eyikakanaya omo kikuhi oko kitabu ky’Enzuko.