“Mwase ukwʼingye, inywe bosi ko mukanuba nʼeriheka ebiritohire, ngandibaluhukya. Mwimaye engomo yage, muhekeyo, mwigire ukwʼingye, kusangwa indi molo-molo nʼowʼomutima ahehere; nenyũ mwasyabana eriluhuka omo mitima yenyu. Kusangwa engomo yage ni nyibuya, nʼomuheke wage anguhire.”—Matayo 11:28-30, KB80.

 Yesu mwasaba abahulikiriri biwe eryasa okw’iye. Mwababwira ndeke-ndeke ngoko bamabighira okw’iye ibakendisyabana eriluhuka.

 “Mwase ukw’ingye, inywe bosi ko mukanuba n’eriheka ebiritohire.” Abandu abo Yesu abwira ebinywa ebi babya ibahekire “ebilitohire” kundi abakulu babo b’ebisomo babya ibabiribahiriraho emighambo mingyi kandi ibakabasaba erikwama emitsye y’abandu. (Matayo 23:4; Marko 7:7) Kandi abandu b’ahisi babya ibalitoherwe n’erihangya-hangya n’erinuba, kundi ikikasababo erikola mughulu muli kandi kutsibu busana n’eribana ebyo balaghireko.

 “Ngandibaluhukya.” Yesu mwalagha eriluhukya abakaligha erikokya riwe eryo ry’olukogho. Mwakola ekyo busana n’eribawatikya baminye ebyo oMungu abasabire oko kwenene. (Matayo 7:24, 25) Eriminya ekyo mukyaleka ibabya bwiranda oko malengekania w’amabehi n’okwikunwa erikwama emitsye mibi y’ebisomo. (Yoane 8:31, 32) Nomo er’igha n’erikolesya amakangirirya wa Yesu kyabya kikasaba eriyikasa, erikola ekyo ikikahumulikanaya.

 “Mwimaye engomo yage, muhekeyo, mwigire ukwʼingye.” Oko mughulu w’eBiblia, abakoli ibabeghere erikolesya engomo—ni bughambu omuti owo babya bakahira oko bitigho busana n’eriheka ebindu ebilitohire. Neryo ekinywa “engomo” mukimya amaana w’erikwama ehamuli n’obusondoli b’oghundi mundu. (Abalawi 26:13; Isaya 14:25; Yeremia 28:4) Kandi ekinywa “mwigire ukwingye” kyanganabindulwa mo “mubye bigha baghe (abakigha).” Kwesi Yesu abya akahira omo bahulikiriri biwe m’omuhwa w’eribya bigha biwe omwimukwama n’erighira oko ky’erileberyako kiwe.—Yoane 13:13-15; 1 Petero 2:21.

 “Mwasyabana eriluhuka omo mitima yenyu.” Yesu mwatalu inyaluhukya aho n’aho abosi ababya bakaghalwa. Aliwe, mwawatikya abahulikiriri biwe eribana erihumulikanibwa n’eribya n’amaha. (Matayo 6:25-32; 10:29-31) Ababya bigha biwe n’abaligha amakangirirya wiwe mubalangira ngoko erikolera Yehova syabya muheke, aliwe erikola ekyo mukyabaletera obutseme bw’ekwenene.—1 Yoane 5:3.

 “Kusangwa engomo yage ni nyibuya, nʼomuheke wage anguhire.” Abasondoli b’ebisomo b’oko mughulu wiwe si babya bolo-bolo n’ab’emitima ihehere ngoko Yesu abya. (Yoane 7:47-49) Syabya mutsibu n’ahake. Omo mwanya w’ekyo, abya ahehere kandi abandu ibakasa okw’iye. Syabya akasaba abigha biwe ebyo bate bangatoka. (Matayo 7:12; Mariko 6:34; Luka 9:11) Kandi mwakanganiabo ngoko bangabana endundi omo bughanyiri b’oMungu n’erihumulikanibwa erikasira omwibya n’obunyamutima obuwene. (Matayo 5:23, 24; 6:14) Emibere mibuya ya Yesu moyitaleka abandu ibasa okwiye lisa, aliwe kandi mobaligha engomo yiwe eyuwene n’eribya bigha biwe.

 Yesu mwabugha ebinywa ebiri omo Matayo 11:28-30 omughulu abya akakola akambanye k’eritulira omo Galilaya omo mwaka we 31 M.W. Oko bahandiki bosi b’esyo Enjili, omukwenda Matayo iye musa yo wakanaya okw’ikokya ry’olukogho rya Yesu. Kundi abya musolesya kandi Muyahudi, Matayo abya asi ndeke ngoko abandu b’ahisi babya bakaghalibwa, butsira busana n’emisolo y’Abaroma misa aliwe kandi busana n’ekisomo ky’Abayahudi ky’amabehi. Neryo ahate eritika-tika mwasubibwa mutima omo nda omughulu alangira Yesu akakolesya ehamuli eyo Tata wiwe, Yehova * amuha, erikokya abolo n’ababirighalibwa eryasa okw’iye.—Matayo 11:25-27.

 E Enjili ya Matayo yikakanaya oko mibere mibuya ya Yesu iye nga Masiya oyo walaghawa kandi omwami w’omo biro ebikasa w’oBwami bw’oMungu.—Matayo 1:20-23; Isaya 11:1-5.

 Lebaya evideo nguhi eno eyikakanaya omo kikuhi oko kitabu kya Matayo.