1. 2 Abanya Korinto 3:1-3 ikatuwatikaya yiti erisima olusunzo olo tuwite olw’erighisya abigha b’eBiblia erikula bunya-kirimu n’erihika okw’ibatisibwa? (Lebaya epitsa ey’oko kijalada.)

UKAYOWA uti omughulu ukalangira omwigha w’eBiblia ow’omo kiharo ky’endeko yenyu akabatisibwa? Oko kwenene kikakutsemesaya. (Mat. 28:19) Kandi wamabya iniwe wa mwighisaya eBiblia, ukatsema kutsibu ukalangira akabatisibwa! (1 Tes. 2:19, 20) Abigha bahya-bahya ababatisibwe ni “syobaruha esikalua ewenyu,” butsira esy’abighisayabo eBiblia, aliwe kandi ni baruha esy’endeko yosi.​—Soma 2 Abanya Korinto 3:1-3.

2. (a) Tukendikania oko libulyo lyahi ly’omughaso, kandi busanaki? (b) Erigha eBiblia n’omundu niki? (Lebaya amaelezo w’ahikwa.)

² Kikatsemesaya erilangira ngoko omo myaka 4 eyalaba, muhabere abigha b’eBiblia * nga miliyoni 10 obuli mwisi omo kihugho kyosi. Kandi omo myaka mighumerera eyo, obuli mwaka abigha abalabire oko 280 000 mubabatisibwe mo Bimiri ba Yehova kandi bigha bahya-bahya ba Yesu Kristo. Twangawatikya tuti abangyi b’oko syomiliyoni sy’abigha aba eribatisibwa? Kundi Yehova anemukangania omutima w’erilindirira n’eriha abandu b’akatambi n’akanya k’eribya bigha ba Kristo, twanzire erikola ekyosi-kyosi ekyo twangatoka eribawatikya erihika okw’ibatisibwa kundi endambi yiri okwihwayo!​—1 Kor. 7:29a; 1 Pet. 4:7.

3. Tukendighaki omo mwatsi ono owalebirye erisondola abigha b’eBiblia?

 ³ Erikangania ngoko omubírí w’eriyira abigha ni w’erikola luba-bula, Akatunga Akakasondola mukabulya ehitunga hy’esyoBeteli erilebya nga twangatasyalola embere yo tuti eriwatikya abigha betu b’eBiblia erikula bunya-kirimu erihika okw’ibatisibwa. Omo mwatsi ono n’owakwamire, tukendilangira ebyo twangigha oko bapainia, abamisyonere, n’abalebererya b’omutimbo abasi bingyi. * (Emi. 11:14; 15:22) Bakakanganaya ebyo abakangirirya b’eBiblia n’abigha babo bangakola omwigha atoke eribana endundi. Omo mwatsi ono, tukendikania oko bindu bitano ebyo obuli mwigha atolere erikola imwahika okw’ibatisibwa.

4. Ni kyahi ekyo tutolere itwaminya omughulu tukigha n’omundu eBiblia oko katambi kakuhi oko lukyo lwiwe?

⁴ Baghala n’abali betu bangyi banemwigha n’abandu eBiblia nibya ibanimene oko lukyo lwabo. Eyi ni nzira eyuwene eyangawatikyabo eritsemera amakangirirya w’eBiblia, aliwe kangyi-kangyi erikanirania eri likabya omo kikuhi kandi siryangakolwa obuli yenga. Abandi bakanasaba oyulyanzisibawa y’enamba yiwe y’etelefone neryo ibamubirikira kutse erimuhandikira emesaje erimubwira omwatsi mulebe owalebire eBiblia embere bamusubire. Erikanirania ng’eryo lyanganalola embere omo misi milebe, erigha eBiblia n’omundu isiririlyatsuka. Omwigha anganahika okw’iyiherera n’eribatisibwa amabya akakolesya akatambi kakuhi ako n’akaghala kake ako erigha Ekinywa ky’oMungu? Iyehe.

5. Ngoko kiri omo Luka 14:27-33, ni kyahi ekyo Yesu ahirak’omuwato ekyangatuwatikya omo mubírí wetu w’eriyira abigha?

⁵ Kiro kighuma Yesu mwakolesya eky’erileberyako ekikakanganaya eky’omundu atolere erikola atoke eribya mwigha wiwe. Mwakania oko mundu oyukasonda erihimba enyumba, n’oko mwami oyukasonda erighenda oko malwa. Yesu mwabugha ati, omuhimbi atolere inyatsuka ‘er’ikala ahisi n’erighanza’ ebikendibugha enyumba yiwe, kandi ati n’omwami atolere inyatsuka ‘er’ikala ahisi n’eriyibulya’ erilebya abasuda biwe nga banemwendiberererya ekyo bakasonda erikola. (Soma Luka 14:27-33.) Kutya, Yesu abya inyanasi ngoko omundu oyo wanzire eribya mwigha wiwe atolere inyatsuka erilengekania ndeke nga kikaminyisayaki erimukwama. Busana n’ekyo, tutolere itwahira omo bigha b’eBiblia m’omuhwa w’erigha eBiblia obuli yenga. Ekyo twanga kikola tuti?

6. Eribya n’abigha abakakula bunya-kirimu, ni kyahi ekyo twangakola?

 ⁶ Tsuka omukania oko lukyo lo mwinye-nyumba. Ukatasyamubungira, wanganamukanirya oko Masako ng’abiri. Amabikulighira erikania naye omo katambi kali, mubulaye nga mwanganabana ah’erikala mulole embere n’omukania. Eky’omwinye-nyumba akendisubirya kikendikangania ng’abirilangira omughaso w’erigha eBiblia. Erimuwatikya erikula bunya-kirimu, iwanganamubulya ng’anganaligha erigha ngendo kabiri oko yenga. Aliwe, erigha ngendo kaghuma kutse kabiri oko yenga siritosire, hane n’ebindi.

7. Omukangirirya angayiteghekania ati ndeke oko buli mwigha w’eBiblia?

⁷ Iwe mukangirirya, utolere iwayiteghekania ndeke oko buli funzo. Wangana tsuka erisoma omwatsi owo mukendigha kutse amasako. Minya ndeke esyonzumwa ngulu-ngulu. Lengekanaya oko mutwe w’esomo, emitwe mike-mike, amabulyo, amasako awaliko ekinywa “soma,” esyopitsa, n’esyovideo esyangawatikya eryowa ndeke omwatsi oyo. Neryo iwun’ibukire omwigha wawu, lengekanaya ngoko wangamuwatikya omo nzira eyolobire n’eyiri wazi atoke eryowa omwatsi n’erikolesyagho.​—Neh. 8:8; Emi. 15:28a.

8. Ebinywa by’omukwenda Paulo ebiri omo Abanya Kolosai 1:9, 10 bikatwighisayaki okw’ihira abigha betu b’eBiblia omo misabe?

⁸ Ukayiteghekania, bwira Yehova oko mwigha waghu n’ebiyitawa biwe. Saba Yehova akuwatikaye erikangirirya emyatsi eyiri omo Biblia omo nzira eyikatula oko mutima w’omwigha. (Soma Abanya Kolosai 1:9, 10.) Minya ekyosi-kyosi ekyangakala oko mwigha eryowa kutse eriligha. Wibuke ngoko ekyo ukakwamirira ly’eriwatikya omwigha erikula bunya-kirimu n’erihika okw’ibatisibwa.

9. Omukangirirya angawatikya ati omwigha eriyiteghekania oko funzo? Kanaya.

⁹ Tuwite amaha ngoko erilabira erigha eBiblia mughulu wosi, omwigha w’eBiblia akendisima ebyo Yehova na Yesu babirikola kandi akendyanza eriminya bingyi. (Mat. 5:3, 6) Omwigha w’eBiblia atolere inyahira amalengekania w’oko ebyo akigha imwatoka eribana endundi. Erimuwatikya erikola ekyo, mubwire ngoko ni ky’omughaso eriyiteghekania oko buli funzo omwisoma omwatsi owo bakendigha, n’erilengekania ngoko angakolesyagho. Omukangirirya angamuwatikya ati? Teghekanaya omwatsi haghuma n’omwigha erimukangania  ngoko ekyo kyangakolwa. * Mukanganaye ngoko angabana eby’erisubirya oko mabulyo, kandi ngoko erikorosya oko nzumwa ngulu-ngulu kyanganamuwatikya eryibuka eky’erisubirya. Neryo mubwire uti asubiraye omo binywa biwe. Amakola ekyo, iwukendiminya ng’anamowa omwatsi. Aliwe, hane n’ekindi ekyo wangabwira omwigha wawu w’eBiblia erikola.

10. Busanaki ni ky’omughaso erisoma eBiblia obuli kiro, kandi ni kyahi ekyo omwigha atolere erikola atoke eribana endundi omw’isomayo?

¹⁰ Eritomeka okw’igha obuli yenga n’omukangirirya wiwe, omwigha anganabana endundi eriyikolera ebindu bilebe obuli kiro. Ayitaghire erikania na Yehova. Ati? Omw’imuhulikirira n’erikania na Yehova. Anganahulikirira oMungu omw’isoma eBiblia obuli kiro. (Yos. 1:8; Esy. 1:1-3) Mukanganaye ngoko angakolesya “Endegheka y’Erisoma eBiblia” eyanganatsapisibwa eyiri oko jw.org. * Kandi, erimuwatikya eribana endundi omo ndegheka yiwe y’erisoma eBiblia, muhire m’omuhwa w’erilengekania buli oko ebyo Biblia yinemumukangirirya oko Yehova kandi ngoko angakolesya ebyo akigha.​—Emib. 17:11; Yak. 1:25.

11. Omwigha angigha ati erisaba ndeke, kandi busanaki ni ky’omughaso munene okw’iye erisaba Yehova mughulu wosi?

¹¹ Hira omo mwigha wawu m’omuhwa w’erikania na Yehova biro byosi erilabira omusabe. Saba erilua oko mutima oko mwanzo n’oko mwiso w’obuli funzo haghuma n’omwigha n’erimuhira omo misabe. Omughulu akahulikirira emisabe yawu, ak’igha ngoko angasaba erilua oko mutima kandi ngoko angasaba Yehova Mungu erilabira omo rina lya Yesu Kristo. (Mat. 6:9; Yoa. 15:16) Talengekania ngoko erisoma eBiblia obuli kiro (nibughambu, erihulikirira Yehova) n’erisaba (nibughambu erikania na Yehova) bikendiwatikya omwigha wawu eriyitunda hakuhi n’oMungu! (Yak. 4:8) Eribya n’emibere eyo kikendileka omwigha wawu inyakula bunya-kirimu n’erihika okwiyiherera n’eribatisibwa.

12. Omukangirirya angawatikya ati omwigha eriwatya obwira bwiwe na Yehova?

¹² Eky’omwigha ak’igha kitolere ikyatula oko bulengekania n’oko mutima wiwe. Busanaki? Kundi omo mutima wetu​—mo muli ebyo  twanzire, ebyo tukayitsutsa, ngongo tukayowa​—ebikatukuna erikola. Yesu mwakangirirya emyatsi mingyi n’abandu ibakanza erimuhulikirira. Aliwe, abandu ibakamukwama kundi inyakatula oko mitima yabo. (Luka 24:15, 27, 32) Omwigha wawu atolere inyalangira Yehova m’omundu oyo angabya n’obwira obuwene naye, kandi oyo angalangira nga Tata wiwe, Mungu wiwe, kandi Munywani wiwe. (Esy. 25:4, 5) Mukigha, hira omuwato oko mibere mibuya y’oMungu wetu. (Eri. 34:5, 6; 1 Pet. 5:6, 7) Mwangabya imukakanaya oko mwatsi wahi, umukanganaye Yehova nga ni Mundu oyuli ati. Uwatikaye omwigha wawu erilangira emibere mibuya ya Yehova​—olwanzo, olukogho, n’erikwira abandi b’obulighe. Yesu mwabugha ati, “ekihano kikulu n’eky’erimbere” ‘ly’erianza Yehova Mungu wawu.’ (Mat. 22:37, 38) Watikaya omwigha wawu eryanza oMungu erilua oko mutima.

13. Teka eky’erileberyako ekikakanganaya ngoko twangawatikya omwigha erigha oko mibere ya Yehova.

¹³ Ukakania n’omwigha wawu, kanganaya ngoko wanzire Yehova yo kutsibu. Eki kyanganawatikya omwigha eriminya ngoko naye atolere inyabya mwira wa Yehova kandi inyigha erimwanza. (Esy. 73:28) Eky’erileberyako, omo kitabu ekyo mukigha kutse omo risako eryo mukasoma, mune omwatsi mulebe awalebirye Yehova​—olwanzo, amenge, obutunganane, kutse obutoki bwiwe​—owakatula oko mutima wawu? Bwiragho omwigha wawu, kandi umubwire ngoko eyo ni nzumwa nguma y’oko syonzumwa nyingyi esikaleka iwanza Tata wetu w’elubula. Hane n’ekindi ekyo obuli mwigha atolere inyakola atoke erikula bunya-kirimu n’erihika okw’ibatisibwa.

14. Erisako ery’ Abaebrania 10:24, 25 likatubwira mwatsi wahi oko mihindano y’endeko, eyangawatikya omwigha erikula bunya-kirimu?

¹⁴ Itwe bosi twanzire abigha betu ibakula n’erihika okw’ibatisibwa. Enzira ngulu eyo twangabawatikiryamo ly’eribahira m’omuhwa w’erihika oko mihindano y’endeko. Abakangirirya abasi bingyi bakabugha bati abigha b’eBiblia abakalu basa oko mihindano bakakula luba bunya-kirimu. (Esy. 111:1) Abandi bakangirirya bakabwira abigha babo ngoko bakendigha bingyi ebilebirye eBiblia omw’iya oko mihindano. Soma Abaebrania 10:24, 25 kandi umukanganaye omughaso ow’angabana amasa oko mihindano. Mukanganaye evideo Oko Kisenge ky’oBwami Kukakolawaki? * Uwatikaye  omwigha wawu erilangira erihindana mo kindu ky’omughaso omo ngebe yiwe.

15. Ni byahi ebyo twangakola erihira omo mwigha m’omuhwa w’erihindana mughulu wosi?

¹⁵ Wangakolaki omwigha wawu amabya isyali atahindana kutse isyabeghere erihindana mughulu wosi? Mubwire m’omuhwa oko ebyo wigha oko mihindano eyabya lino-lino. Ekyo kyanganamuhira m’omuhwa w’erihindana omo mwanya w’erimukokya oko mihindano buyira. Muhe Akaleberyo kʼOmuteya kutse Engebe n’Omubiri Akatabu k’Omuhindano ako munemukolesya oko mihindano. Mukanganaye ebyo mukendisigha oko muhindano owakwamire, mubulaye nga ni kitsweka kyahi ekyamamutsemesya. Eby’omwigha wawu akendilangira n’eryowa oko muhindano wiwe w’erimbere bikendimutsemesya kutsibu kwilaba ebyo akowa oko mihindamo y’ebindi bisomo. (1 Kor. 14:24, 25) Akendibana abandu abo angigha eky’erileberyako kyabo kibuya abakendimuwatikya erikula bunya-kirimu erihika okw’ibatisibwa.

16. Ni byahi ebyangaleka itwawatikya abigha b’eBiblia erihika okw’ibatisibwa, kandi ni byahi ebyo tukendigha omo mwatsi owakwamire?

¹⁶ Twangawatikya tuti abigha erikula bunya-kirimu erihika okw’ibatisibwa? Twanganawatikya obuli mwigha erilangira endundi y’erigha n’erimuhira m’omuhwa w’erigha obuli yenga n’eriyiteghekania oko buli funzo. Kandi twanzire erimuhira m’omuhwa w’erikania na Yehova obuli kiro n’eribya munywani wiwe. Twanzire itwahira omo mwigha m’omuhwa w’eribya akahindana n’endeko. (Lebaya akasanduku “ Ebyo abigha b’eBiblia bangakola batoke erikula bunya-kirimu erihika okw’ibatisibwa.”) Aliwe, ngoko omwatsi owakwamire akendikangania, hane ebindi bindu bitano ebyo abakangirirya b’eBiblia bangakola eriwatikya abigha erihika okw’ibatisibwa.