1-2. Ngoko kiri omo 1 Timoteo 6:20, Timoteo mwasabwa erikolaki?

TUKANAHA abandi b’ebindu byetu by’obughuli tuti batubikirebyo. Eky’erileberyako, twanganabika esyofranga syetu sy’omo banki. Tukakola tutya kundi tunasi ngoko esyofranga syetu sikendibikwa ndeke, sisyangahera kutse eribwa. Kwesi tunasi ngoko ni ky’omughaso eriyiketera omundu oyo tukabikisaya ebindu byetu by’obughuli.

² Soma 1 Timoteo 6:20. Omukwenda Paulo mwibukya Timoteo ngoko abiribana ekindu ky’obughuli bunene​—eriminya ekwenene ey’erisonda ly’oMungu oko bandu. Timoteo mwahabwa olusunzo olw’eritula “Engulu Yowene” n’erikola “omubírí wʼeritula Engulu Yowene.” (2 Tim. 4:2, 5) Paulo mwabwira Timoteo ati ateghaye ndeke eby’abirihabwa eribika. Nga Timoteo, netu twabirihabwa eribika ebindu by’obughuli. Ebindu by’obughuli ebyo ni byahi? Kandi busanaki tutolere itwateya ebindu by’obughuli ebyo Yehova abirituha?

3-4. Ebikakanganaya ngoko ekwenene y’eBiblia ni y’omughaso ni byahi?

³ Yehova abirituha ekwenene oy’obughuli bunene eyikabanika omo Kinywa kiwe, eBiblia. Ekwenene eyo ni y’obughuli kundi yikatukangiriraya ngoko twangayira obwira obuwene haghuma na Yehova kandi ngoko twangabana obutseme obw’ekenene. Omughulu tukaligha ekwenene eyo n’erikwamayo, ikatulusaya omo bukobe bw’amakangirya w’amabehi, kandi ikatuwatikaya eribya n’emibere eyuwene.​—1 Kor. 6:9-11.

⁴ Ekindi ekikanganaya ngoko ekwenene eyiri omo Kinywa ky’oMungu ni y’obughuli bunene ni busana Yehova akabisulirayo abali “n’omutima owatolere, NWT.” (Emib. 13:48) Abandu  bolo abo bakaligha enzira eyo Yehova akakolesaya munabwire eritukangirirya ekwenene. (Mat. 11:25; 24:45) Sitwangowa ekwenene eyi omo butoki bwetu, kandi sihali ekilengire eryowa ekwenene eyo.​—Emis. 3:13, 15.

5. Ni lundi lusunzo lwahi olo Yehova abirituha eribika?

⁵ Kandi, Yehova abirituha olusunzo lw’erikangirirya abandi ekwenene okwiye n’erisonda liwe. (Mat. 24:14) Engulu eyo tukatula ni y’obughuli bunene kundi yikawatikaya abandu eribya baghuma b’oko kihanda kya Yehova, kandi yikabaha akanya akeribana engebe y’erikota. (1 Tim. 4:16) Nomo twangatulira kutsibu kutse iyehe erikwamana n’obutoki bwetu, tukawatikaya oko mubírí w’omughaso owakakolawa lino. (1 Tim. 2:3, 4) Tuli n’olusunzo lunene olw’erikola haghuma n’oMungu!​—1 Kor. 3:9.

6. Ekyahikira abatateghaya olusunzo lwabo lw’eribya bakoli haghuma n’oMungu ni kyahi?

⁶ Abandu balebe b’oko mughulu wa Timoteo mubataluka eriteya ndeke olusunzo olw’eribya bakoli haghuma n’oMungu. Dema mwatswa oko Paulo busana n’eryanza ebindu eby’ekihugho. (2 Tim. 4:10) Alinga Figelo na Hermogene mubaleka eritulira busana n’erisagha eryendereribwa eryo Paulo abana. (2 Tim. 1:15) Himeneo, Alesanduro na Fileto mubayisamambula oko kwenene. (1 Tim. 1:19, 20; 2 Tim. 2:16-18) Alinga abandu aba babya ibananzire Yehova, aliwe mubatalangira olusunzo lwabo lw’erikola haghuma na Yehova mo l’omughaso.

7. Sitani akakolesaya ebitegho byahi eritukuna eritenditeya eby’oMungu abirituha?

⁷ Sitani akakolesaya ebitegho byahi eritukuna eritenditeya eby’oMungu abirituha eribika? Tulebaye ebitegho bilebe ebyo akakolesaya. Kusangwa Sitani syanzire itwateya ekenene, akakolesaya emyatsi y’eriyitsemesyamo, etelevizyo, esyofilme, e Enternete, ebitabu n’eyindi myatsi atoke erikanyirirya emighendere, amalendekania n’emibere eyituwene. Akasonda eritubahisya tuleke eritulira. Akakolesaya abandu abakatubughako muhanda n’eryendereribwa. Sitani anzire itwaleka ekwenene, neryo akakolesaya abandu abakayisamambula oko kwenene batukune erihulikirira “omwatsi owakahulawa nabi mo menge.”​—1 Tim. 6:20, 21.

8. Eky’erileberyako kya mughala wetu Daniel kyamakwighisyaki?

⁸ Tutetayiteya, twanganaleka ekwenene yo lyolo-lyolo. Tulebaye eky’erileberyako kya mughala wetu Daniel, * oyo abya anzire eritsanga ebitsange by’evideo. Akabugha ati: “Nabere n’abiyira emyaka nga 10 namatsuka eritsanga  oko bitsange by’evideo. Oko mwanzo, iningatsanga oko bitsange eby’evideo ebitolere hake. Aliwe, munatsuka lyolo-lyolo eritsanga ebitsange eby’evideo ebiswiremo amalwa n’emyatsi y’esyombinga.” Daniel, mwahika oko kika ky’eribya akalabya esyosaha nga 15 oko kiro akatsanga oko bitsange eby’evideo. Daniel akatomekako ati: “Omo mutima waghe nabya ininasi ngoko omuhanda w’ebitsange ebyo ngatsangako n’esyondambi esyongalabaya kubyo, binemutsandya bolo-bolo obwira baghe haghuma na Yehova. Aliwe, munabya ngayibwira niti ebyo eBiblia yikabugha sibinyilebirye.” Tutetayiteya ndeke, eby’eriyitsemesyamo byanganaleka itwatateya ekwenene. Ekyo kyamabibya, itwanganaherya n’ebindu by’obughuli ebyo Yehova abirituha.

9. Ngoko kiri omo 1 Timoteo 1:18, 19, Paulo mwasosekania Timoteo ng’andi?

⁹ Soma 1 Timoteo 1:18, 19. Paulo mwasosekania Timoteo ng’omusuda oyukalola embere erilwa “amalwa owene.” Amalwa ayo si malwa wa kinya-mubiri, aliwe ni malwa w’obunya-kirimu. Omo nzira syahi aBakristo bali ng’abasuda abali omo malwa? Abasuda ba Kristo batolere ibabya n’emibere yahi? Tulebaye emyatsi itano eyo twangigha omo ky’elileberyako ekyo Paulo akolesaya. Emyatsi eyo yikendituwatikya eriteya ekwenene eyo twabirihabwa.

10. Busanaki litolere itwakenga oMungu?

¹⁰ Ukenge oMungu. Omusuda mubuya akasighala mutaleghula. Akalwa kutsibu atoke eriteya omundu oyo anzire kutse ekindu ekyo akalangira mo ky’omughaso. Paulo mwabwira Timoteo ati akenge oMungu. (1 Tim. 4:7) Twamakenga oMungu n’erimwanza kutsibu, tukanza eriteya ekwenene.​—1 Tim. 4:8-10; 6:6.

11. Busanaki litolere itwayibegherya erikola ekyuwene?

¹¹ Uyibegheraye erikola ekyuwene. Omusuda atolere inyayibegherya kutsibu atoke eriyiteghekania oko malwa mughulu wosi. Timoteo mwasighala inyanakalire bunya-kirimu kusangwa mwakwama erihano lya Paulo eryasondolawa n’ekirimu elyamubwira ati asaghe esyongumbu esyobulwana, akwamirire eritunganene n’eribya haghuma n’aBakristo balikyabo. (2 Tim. 2:22) Ekyo mukyasaba Timoteo eriyibegherya erikola ekyuwene. Kikasaba eriyibegherya erikola ekyuwene tutoke erisinga esyongumbu syetu esituwene. (Rom. 7:21-25) Kandi kikasaba eriyibegherya erikola ekyuwene tutoke erileka emibere yetu yakera n’erikulya emibere eyuwene. (Efe. 4:22, 24) Kandi eriya oko mihindano enyuma sy’omubírí itwabiriluha nakyo kikasaba eriyibegherya erikola ekyuwene.​—Ebr. 10:24, 25.

12. Ni myatsi yahi yo yangatuwatikya eriminya ndeke erikolesya eBiblia?

¹² Omusuda atolere inyayibegherya atoke elikolesya ebimano biwe by’amalwa. Kandi amanza ati atoke erikolesyabyo ndeke, litolere inyayibegherya kangyi-kangyi. Netu kutya, litolere itwaminya ndeke erikolesya Ekinywa k’oMungu. (2 Tim. 2:15) Oko mihindano yetu, tukigha esyonzira mbiriri-mbiriri esy’erikolesya Ekinywa ky’oMungu. Aliwe litolere itwayibegherya erigha eBiblia twamanza eriwatikya abandi batoke erilangira ekwenene eyiri muyo mo y’omughaso. Litolere itwakolesya Ekinywa ky’oMungu erighumya obwikirirya bwetu. Eki kikasaba bingyi kulenga erisoma eBiblia lisa; kikasaba erilengekenia buli oko ebyo tukasoma n’erikwesa-kwesa omo bitabu byetu tutoke eryowa ndeke ebyo tukasoma n’eriminya erikolesya Amasako. (1 Tim. 4:13-15) Aho itukendibya n’obutoki bw’erikolesya Ekinywa ky’oMungu erikangirirya abandi. Kandi, erikangirirya abandi kikasaba bingyi kulenga erisomerabo Amasako lisa. Twanzire eriwatikya abahulikiriri betu eryowa ndeke omulondo  n’erilangira ngoko bangakolesyagho. Kwesi, twamabya tukigha eBiblia y’ebiro byosi itukendibya bakangirirya babuya.​—2 Tim. 3:16, 17.

13. Ngoko kiri omo Abaebrania 5:14, litolere itwakolaki tutoke erisombola ekibuya n’ekibi?

¹³ Ukolesaye amenge. Omusuda atolere inyakolesya amenge eriminya ahangasira ekyangamuhutalya atoke eriyihighula kukyo. Netu kutya, litolere itwabya tukaminya emyatsi eyangatuhutalya n’eriyihighula kuyo. (Emi. 22:3; Soma Abaebrania 5:14.) Eky’erileberyako, litolere itwakolesya amenge tukasombola emyatsi eyo tukendiyitsemesyamo. Kangyi-kangyi esyotelevizyo n’esyofilme bikakanganaya emyatsi eyituwene. Emyatsi eyo yikahitanaya oMungu kandi siyangabula erituhutalya. Tukayihighula oko by’eriyitsemesyamo ebiri ng’ebyo kusangwa byanganakehya lyolo-lyolo olwanzo lwetu oko Mungu. Tunasi ngoko Yehova aponire abandu abawite emighendere eyituwene, kandi abandu abo banganayihutalya kutse ibahutalya abandi.​—Efe. 5:5, 6.

14. Erikola n’amenge mulyawatikya liti mughala wetu Daniel?

¹⁴ Mughala wetu Daniel, oyo tulyakanayako, mwatsuka erilangira ngoko eritsanga oko bitsange by’evideo ebirimo amalwa n’emyatsi y’esyombinga sikyowene. Mwasondya-sondya emyatsi oko Watchtower Library eyangamuwatikya eriyihighula oko bitsange by’evideo ebyo. Neryo, mwaleka eritsanga oko bitsange by’evideo ebitatolere. Mwayilusya oko bitsange by’evideo ebyo abya inyabiriyihandikisyako oko Enternete, kandi mwaleka eribya akatsanga n’abandi abakatsanga ebitsange ebyo. Mughala wetu Daniel akabugha ati: “Omo mwanya w’eribya ngasiba omo nyumba, munatsuka eribya ngalabya endambi y’ehihya kutse ngayabana abaghala n’abali wetu b’omo ndeko.” Lino, mughala wetu Daniel ni mupainia kandi ni musyakulu w’endeko.

15. Busanaki erihulikirira emyatsi y’amabehi kyanganahira engebe yetu y’omo bwiko?

¹⁵ Nga Timoteo, litolere itwakolesya amenge eriminya ngoko erihulikirira esyongulu esy’ababiriyisamambula oko kwenene kyanganahira engebe yetu y’omo bwiko. (1 Tim. 4:1, 7; 2 Tim. 2:16) Eky’erileberyako, banganalalaghania emyatsi y’amabehi oko baghala n’abali betu eyangaleka itwatsuka eribya n’eritika-tika oko ndondeko ya Yehova. Emyatsi y’amabehi ng’eyo hanganakehya obwikirirya bwetu. Litolere itwayihighula oko myatsi y’amabehi ng’eyo. Busanaki? Kundi emyatsi  ng’eyi, yikalalaghanibawa n’abandu “bʼobulengekania obutsandire,” abatawite “omwatsi wʼekwenene.” Ekyo bakakwamirira ry’erileta “obuhaka nʼerinegena.” (1 Tim. 6:4, 5) Banzire itwikirirya amabehi wabo n’erileka eriyiketera abaghala n’abali betu.

16. Litolere itwayihighula oko myatsi yahi?

¹⁶ Ubye n’ebingyi by’erikola. “Ngʼomusirikani [omusuda] mubuya wa Kristo Yesu,” Timoteo abya atolere iribya n’emyatsi mingyi y’erikola omo mubírí w’eritulira, butsira erikwamirira ebindu by’ekinya-mubiri kutse eyindi myatsi. (2 Tim. 2:3, 4) Nga Timoteo, netu silitolere tukatebwa n’engumbu y’eryanza eriyira ebindu binene by’ekinya-mubiri. “Amatebo w’ebindu” anganaleka olwanzo lwetu oko Yehova ilwakeha, itutasyaswatsemera Ekinywa ky’oMungu, n’omuhwa wetu w’erikanirya abandi kukyo inyakeha. (Mat. 13:22) Litolere itwabya n’engebe eyolobire n’erikolesya endambi n’akaghala ketu eritsuka “erisonda Obwami.”​—Mat. 6:22-25, 33.

17-18. Litolere itwakolaki tutoke eriteya obwira bwetu haghuma na Yehova?

¹⁷ Uyiteghekanaye erikola luba. Omusuda atolere inyaminya embere sy’endambi ekyo akendikola eriyiteya. Twamanza eriteya ndeke ebindu ebyo Yehova abirituha eribika, litolere itwakola luba omughulu kukalangira ekyangatuhutalia. Ekyangatuwatikya erikola luba niki? Litolere itwayiteghekania ngoko tukendikola embere sy’omwatsi eribya.

¹⁸ Tuterilengekania okweki, omulimi w’amange akahimba akanyumba kake emoli embere sy’omughulu w’embula. Busanaki? Kusangwa embula yamasa kitsumbukirania inyane emoli, anganuwama omo kanyumba ako. Netu kutya twanganayiteghekania embere, neryo itwabya itunasi ekyo twangakola omughulu emyatsi y’obusingiri, emyatsi eyirimo amalwa kutse emyatsi eyabakayisamambula oko kwenene yamayileta kitsumbukirania tukakwama evideo kutse etelevizyo kutse itune oko Enternete. Twamabya itunayiteghekenie oko myatsi eyangahika, itukendikola luba tutoke eriteya obwira bwetu haghuma na Yehova.​—Esy. 101:3; 1 Tim. 4:12.

19. Twamabiteya ndeke ebindu by’obughuli ebyo Yehova abirituha eribika itukendibana miyisa yahi?

¹⁹ Litolere itwateya ebindu by’omughaso ebyo Yehova abirituha​—ekwenene y’eBiblia n’olusunzo lw’erikangiriryayo abandi. Twamakola tutya, itukendibya n’obunya-mutima obuwene, engebe eyiri n’omughaso n’eribana obutseme obukalwira omw’iwatikya abandi eriminya Yehova. Yehova anganatuwatikya eriteya ndeke ebyo abirituha eribika.​—1 Tim. 6:12, 19.